لاہور: ضلع چکوال کی تحصیل تلہ گنگ کے علاقے شیرا کوٹ میں نومولود بچہ مبینہ طور پر قتل کر دیا گیا جب کہ پولیس نے لاش قبضے میں لے کر موسٹ مارٹم کے لیے اسپتال منتقل کر دی۔
رپورٹس کے مطابق 4 دن کے بچے کا مبینہ طور پر قتل ہونے پر والد اور چچا نے پولیس کو اطلاع دی۔ بچے کی ماں شوہر سے جھگڑ کر والدین کے گھر شیرا کوٹ آئی تھی۔
بچے کی تدفین کی تیاری کی جا رہی تھی کہ پولیس نے موقع پر پہنچ کر لاش قبضے میں لے لی۔ پولیس نے بچے کی لاش پوسٹ مارٹم کے لیے اسپتال منتقل کر دی۔
اس سے قبل لاہور میں فروری میں ایسا ہی ایک افسوس ناک واقعہ پیش آیا تھا جس میں سوتیلے باپ نے چارپائی پر پیشاب کرنے پر تین سالہ بچے کو قتل کر دیا تھا۔
پولیس نے ملزم اور بچے کی ماں کو گرفتار کرلیا تھا۔ پولیس کے مطابق رائیونڈ میں تین سالہ بچے عباس نے پیشاب کیا تو ملزم غلام عباس طیش میں آگیا اور تشدد کر کے بچے کو مار دیا۔
