سیالکوٹ: الیکشن کمیشن آف پاکستان نے این اے 75 ڈسکہ میں ضمنی انتخاب کی تاریخ تبدیل کر دی۔
تفصیلات کے مطابق الیکشن کمیشن نے کہا ہے کہ این اے 75 ڈسکہ میں ضمنی انتخاب اب 10 اپریل کو ہوگا۔
پی ٹی آئی امیدوار علی اسجد ملہی نے کہا ہے کہ تاریخ کی تبدیلی ہماری درخواست پر کی گئی ہے، پولنگ 23 اسٹیشنز پر ہوں یا پورے حلقے میں، یہ فیصلہ ہونا ابھی باقی ہے۔
یاد رہے کہ گزشتہ روز الیکشن کمیشن آف پاکستان نے کہا تھا کہ پنجاب کے انتخابی حلقے این اے 75 ڈسکہ میں ضمنی الیکشن 18 مارچ کو ہوں گے۔
ڈسٹرکٹ ایجوکیشن اتھارٹی کی جانب سے کہا گیا تھا کہ انتخابی حلقے میں 21 پولنگ اسٹیشنز پر نیا عملہ کام کرے گا۔
الیکشن کمیشن نے این اے 75 ڈسکہ میں ضمنی الیکشن کی تاریخ کا اعلان کر دیا
ڈی ای اے کے مطابق 339 پولنگ اسٹیشنز پر 19 فروری والا عملہ کام کرے گا، ڈیوٹی آرڈر کی اطلاع واٹس ایپ کے ذریعے کر دی گئی ہے، پولنگ اسٹیشن نمبر 346 کا پریذائیڈنگ افسر بھی تبدیل کر دیا گیا ہے۔
واضح رہے کہ گزشتہ روز سپریم کورٹ نے سیالکوٹ کے حلقے این اے 75 سے پی ٹی آئی امیدوار علی اسجد ملہی کی جانب سے دائر درخواست کو منظور کرتے ہوئے آج کیس کی سماعت کرنے کا حکم نامہ جاری کیا تھا۔
پی ٹی آئی امیدوار نے الیکشن کمیشن کے فیصلے کے خلاف اپیل کی ہے، جس پر رجسٹرار آفس نے فریقین کو گزشتہ روز نوٹس جاری کر دیے تھے۔
