کراچی: سول ایوی ایشن اتھارٹی اور پاکستان ایئرپورٹ اتھارٹی کے نئے لوگو جاری کردیے گئے جبکہ پہلے مرحلے میں انٹرنل طور پر ویب سائٹ کو بھی الگ الگ کردیا گیا۔
تفصیلات کے مطابق وفاقی حکومت ن نے سول ایوی ایشن کو دو حصوں میں تقسیم کر کے پاکستان ایئرپورٹس اتھارٹی اور سول ایوی ایشن کے محکموں کو علیحدہ کردیا جس کے بعد دونوں کا نیا لوگو جاری کردیا گیا۔
ذرائع کے مطابق سی اے اے کا ہیڈ کوارٹرز کا رساز جبکہ ایئرپورٹ اتھارٹی کا ہیڈکوارٹرز ٹرمینل ون پر رکھنے کا فیصلہ کیا گیا ہے۔
ذرائع کا بتانا ہے کہ ملازمین کو انکی تعلیمی قابلیت اور تجربہ کی بنیاد پر ٹرانسفر کیا جائے گا، دو محکمے بنانے سے دونوں کے سربراہان کا تقرر نئی منتخب حکومت کرے گی۔
واضح رہے کہ عالمی سول ایوی ایشن آرگنائزیشن نے ایئرپورٹ سروس اور ریگولیٹری کو توڑ کر 2 نئے محکمے بنانے کی ہدایت کی تھی، سول ایوی ایشن اور پاکستان ائیرپورٹ اتھارٹی کے ایکٹس کو 10 نومبر سے نافذ کیا گیا۔
