کراچی: سعودی سول ایوی ایشن گاکا نے مملکت میں داخلے کے لیے نیا سفری ہدایت نامہ جاری کر دیا۔
تفصیلات کے مطابق گاکا نے مملکت میں داخلے سے متعلق نیا ہدایت نامہ جاری کیا ہے، جس میں سعودی ایئر لائن سمیت تمام ایئر لائنوں کو عمل درآمد کی سخت ہدایت کی گئی ہے۔
گاکا نے سعودی عرب جانے والے مسافروں کے پاس ویزے اور پاسپورٹ کی اسکین کاپی کا ہونا لازمی قرار دے دیا ہے۔
سعودی ایوی ایشن نے کہا ہے کہ اگر ویزے پر پاسپورٹ کے مطابق تفصیلات درج نہ ہوں تو ایئر لائن انتظامیہ اس صورت میں مسافروں کو بورڈنگ پاس جاری نہ کرے۔
سعودی ایوی ایشن نے کہا ہے کہ غلط کاغذات پر سفر کرنے والے مسافروں کی رہائش اور واپسی کے اخراجات ایئر لائن انتظامیہ خود برداشت کرے گی۔
گاکا کا کہنا ہے کہ ایئر لائن مسافر کو فوراً اگلی ہی پرواز سے واپس بجھوانے کی پابند ہوگی، اس حوالے سے تمام ایئر لائنز اپنے عملے کی ٹریننگ کریں، خلاف ورزی کی صورت میں ایئر لائن جرمانہ ادا کرے گی۔
