لندن : برطانیہ میں ملکہ الزبتھ کی موت کے بعد بادشاہ کا مرتبہ حاصل کرنے والے بادشاہ چارلس سوئم کی تصویر والے سکے تیار کرلیے گئے جو کرسمس کے موقع پر جاری کیے جائیں گے۔
غیرملکی خبر رساں ادارے کی رپورٹ کے مطابق شاہ چارلس کی تصویر والے پہلے برطانوی سکوں کی نقاب کشائی رائل منٹ نے کی ہے، ان سکوں میں شاہی روایات کو برقرار رکھتے ہوئے نئے بادشاہ کی تصویر ان کی آنجہانی والدہ ملکہ الزبتھ کے مخالف سمت میں بنائی گئی ہے۔
اس حوالے سے شاہی ٹکسال کی جانب سے جاری بیان میں کہا گیا ہے کہ برطانوی بادشاہ چارلس سوئم کی تصویر والے دو نئے سرکاری سکوں کا ڈیزائن مجسمہ ساز مارٹن جیننگز نے تیار کیا ہے۔
View this post on Instagram
منظر عام پر آنے والے یادگاری سکوں میں ایک 5 پاؤنڈ کا جبکہ دوسرا سکہ 50 پینس کا ہے۔ مذکورہ سکے کرسمس کے موقع پر مارکیٹ میں لائے جائیں گے جہاں وہ ملکہ الزبتھ دوئم کی تصویر والے موجودہ سکوں کے ساتھ ساتھ استعمال ہوں گے۔
غیر ملکی میڈیا کے مطابق بینک آف انگلینڈ کی جانب سے کہا گیا ہے کہ ابھی سکے بدل رہے ہیں لیکن برطانیہ کے بینک نوٹ تاحال وہی رہیں گے۔
بینک آف انگلینڈ کے اعلان کے مطابق بینک فی الحال آنجہانی ملکہ کی خصوصیت والے موجودہ نوٹ جاری کرتا رہے گا تاہم شاہی خاندان کی رہنمائی کے بعد ماحولیاتی اور مالیاتی تبدیلیوں کو مدنظر رکھتے ہوئے کوئی فیصلہ کیا جائے گا۔
اس تصویر کے چاروں طرف ایک لاطینی تحریر بھی درج کی گئی ہے جس کا اردو ترجمہ ہے کہ کنگ چارلس تھری خدا کے فضل سے عقیدے کا محافظ ہے۔
