نیویارک: امریکی شہر نیویارک سٹی میں موسم سرما کے سیزن میں زیادہ دنوں تک برف باری نہ ہونے کا 50 سالہ ریکارڈ ٹوٹ گیا۔
امریکی میڈیا کے مطابق رواں موسم سرما میں نیو یارک سٹی پہلی برف باری کے انتظار میں ہے لیکن یہ انتظار طویل تر ہو گیا ہے، جس کے رکنے کے کوئی آثار بھی نظر نہیں آ رہے ہیں۔
رپورٹس کے مطابق نیویارک نے پیر کے روز موسم سرما کی اپنی پہلی برف باری کے طویل ترین انتظار کا ریکارڈ توڑا، یہ پیشن گوئی بھی ہے کہ اگلے کئی دنوں تک برف پڑنے کی کوئی امید نہیں۔
اے ایف پی کے مطابق اس سے قبل ان دنوں مین ہٹن کے ٹائم اسکوائر اور سینٹرل پارک برف سے ڈھکے دکھائی دیتے تھے، عام طور پر دسمبر کے وسط سے برفباری کا سلسلہ شروع ہو جاتا ہے اور نیویارک کے باسیوں کو کبھی اتنا انتظار نہیں کرنا پڑا۔
50 years & 1 day ago today a new record was broken. It was the latest 1st measurable snowfall for Central Park. Today, we break that record as no snow was recorded yesterday. This record will be broken everyday until measurable snow is observed in the park. #NYwx #snowless pic.twitter.com/lxfsS7Xqkp
— NWS New York NY (@NWSNewYorkNY) January 30, 2023
یاد رہے کہ 1972-73 کے موسم سرما میں، نیویارک میں 29 جنوری تک برف باری نہیں ہوئی تھی، لیکن آخر کار 1.8 انچ کی برفباری نے شہر کو ڈھانپ دیا تھا، لیکن اب 2023 میں 31 جنوری ہے اور یہ گنتی بدستور جاری ہے۔
اس کے ساتھ ہی طویل عرصے تک برف باری نہ ہونے کا ایک دوسرا ریکارڈ بھی خطرے میں پڑ گیا ہے، نیشنل ویدر سروسز کے مطابق 29 جنوری گزرنے کا مطلب یہ ہے کہ یہ دورانیہ اب 1869 کے بعد سے لمبا ترین عرصہ ہے۔
اسی طرح شہر موسم سرما میں برف کے بغیر مسلسل دنوں کے ریکارڈ کے بھی قریب ہے، یہ ریکارڈ 332 دنوں پر مشتمل ہے، جب کہ پیر کو 327 واں دن تھا۔
