نیوزی لینڈ کے ساحل پر منگل کی صبح زلزلے کے شدید جھٹکے محسوس کیے گئے، ریکٹر اسکیل پر زلزلے کی شدت 6.7 بتائی گئی ہے۔
غیر ملکی خبر رساں ادارے کی رپورٹ کے مطابق نیوزی لینڈ میں ہزاروں افراد نے اس زلزلے کے جھٹکے محسوس کیے، مقامی میڈیا نے عمارتوں کے لرزنے اور گھریلو سامان شیلف سے گرنے کی اطلاعات دیں۔
زلزلے کی اطلاع امریکی جیولوجیکل سروے نے زلزلے کی اطلاع سوشل میڈیا ‘ایکس’ پر ایک پوسٹ شیئر کرکے دی۔
زلزلے کے بعد حکام نے ساحلی علاقوں میں رہنے والے لوگوں کو سمندر سے دور رہنے اور ساحلوں سے دور ہٹنے کی وارننگ جاری کی ہے کیونکہ طاقتور اور غیر معمولی لہریں خطرہ پیدا کر سکتی ہیں۔
اس زلزلے کا مرکز 10 کلومیٹر زیر زمین تھا، زلزلے کا مرکز زیادہ گہرائی میں ہونے کی وجہ سے بہت زیادہ نقصان کا امکان کم ہوجاتا ہے۔
رپورٹ کے مطابق ابھی تک کسی قسم کے جانی نقصان کی اطلاع نہیں ہے، ایمرجنسی مینجمنٹ ایجنسی نے پورے ملک میں الرٹ جاری کردیا ہے، حکام کا کہنا تھا کہ خطرہ ابھی ٹلا نہیں ہے۔ انہوں نے کہا کہ زلزلے کی شدت بہت زیادہ ہے، تاہم فی الحال سونامی کا خطرہ نہیں ہے۔
مقامی حکام صورتحال پر گہری نظر رکھے ہوئے ہیں، ابھی تک نیوزی لینڈ سول ڈیفنس اینڈ ایمرجنسی مینجمنٹ نے تصدیق کی ہے کہ سونامی کا کوئی خطرہ نہیں ہے۔
سول ڈیفنس اینڈ ایمرجنسی مینجمنٹ (سی ڈی ای ایم) نے متاثرہ علاقوں کے لوگوں سے بھی چوکنا رہنے اور ممکنہ آفٹر شاکس کے لیے تیار رہنے کی تاکید کی ہے۔
رہائشیوں کو مشورہ دیا گیا ہے کہ وہ سرکاری معلومات اور حفاظتی ہدایات پر عمل کریں، خاص طور پر اس خطے میں زلزلے کی سرگرمیاں اچانک آفٹر شاکس کا باعث بن سکتی ہیں جو عوامی تحفظ کے لیے خطرہ بن سکتے ہیں۔
