ٹنڈو محمد خان: صوبہ سندھ کے ضلع ٹنڈو محمد خان میں ایک دن کے بچے کو 50 ہزار روپے میں فروخت کرنے والے والد اور بچے کے خریدار کو پولیس نے حراست میں لے لیا ہے۔
تفصیلات کے مطابق ٹنڈو محمد خان میں نومولود کو فروخت کرنے کے معاملے میں اسپتال کی سی سی ٹی وی فوٹیج سامنے آ گئی ہے، جس میں نومولود کے والد سہیل پلیجو اپنا بچہ ہرے رنگ کی قمیض شلوار پہنے شخص کے حوالے کرتے دیکھا گیا۔
پولیس حکام کے مطابق فوٹیجز کی مدد سے بچہ لینے والے شخص کو پہچان لیا گیا ہے، والد سہیل اور غلام حیدر کو حراست میں لے لیا گیا ہے، پولیس کے مطابق والد نے بتایا اس نے پیسوں کے لیے بچہ غلام حیدر کے حوالے کیا تھا، جب کہ غلام حیدر نے بیان میں کہا اس نے بچہ حیدرآباد میں کسی کو دے دیا ہے۔
باپ نے ایک دن کے بچے کو 50 ہزار روپے میں فروخت کردیا
یاد رہے کہ گزشتہ روز باپ نے ایک دن کا بچہ 50 ہزار روپے میں فروخت کیا تھا، والدہ کا کہنا تھا اسپتال انتظامیہ نے بل کا مطالبہ کیا تو شوہر نے ادھار لے کر بل ادا کیا، جس سے رقم لی بچہ بھی اس کو دے دیا۔ معاملہ سامنے آنے پر اسپتال انتظامیہ نے بل کی مد میں ادا کی گئی رقم متاثرہ خاتون کو واپس کر دی ہے۔
واضح رہے کہ پولیس نے بچے کو تلاش کر کے ماں کے حوالے کر دیا ہے، اور مذکورہ اسپتال میں ان کا علاج بھی مفت ہو رہا ہے۔
