The news is by your side.

Advertisement

بہترین طبّی سہولیات، قومی ادارہ برائے امراض قلب نے 15 ایوارڈ‌ز اپنے نام کرلیے

کراچی: قومی ادارہ برائے امراض قلب (این آئی سی وی ڈی ) کو ہیلتھ کیئر نیٹ ورک میں 15  ایوارڈز سے نوازا گیا ہے۔

نمائندہ اے آر وائی نیوز کے مطابق این آئی سی وی ڈی کو انٹرنیشنل کارپوریٹ سوشل ریسپانسبلٹی (سی ایس آر) برائے سال 2021 کے 15ایوارڈز سے نوازا گیا ہے۔

 قومی ادارہ برائے امراضِ قلب  (این آئی سی وی ڈی) کو یہ اعزاز پورے ملک سے آنے والے مریضوں کو بلا امتیاز طبّی خدمات فراہم کرنے پر دیا گیا ہے۔

این آئی سی وی ڈی کے ترجمان کی جانب سے جاری اعلامیے میں کہا گیا ہے کہ ’یہ کامیابی این آئی سی وی ڈی کے ایگزیکٹیو ڈائریکٹر کی بے مثال قیادت، ادارے کے مینجمنٹ کنسلٹنٹ اور  چیف آپریٹنگ آفیسر  کی غیرمعمولی کاوشوں اور انتھک محنت کا نتیجہ ہے‘۔

ادارے کے ترجمان کا کہنا ہے کہ ’این آئی سی وی ڈی میں امراضِ قلب کے مریضوں کو ہمیشہ جدید و معیاری سہولیات فراہم کی جاتیں ہیں، جبکہ رہائشیوں کے گھروں کے قریب بھی انہیں بالکل مفت طبی سہولیات فراہم کی جارہی ہیں، جس کے سلسلے کو وقت کے ساتھ ساتھ مزید بہتر بنایا جارہا ہے‘۔

مزید پڑھیں: قومی ادارہ برائے امراض قلب کے لیے 10 ایوارڈز

ترجمان کے مطابق این آئی سی وی ڈی کو دنیا میں امراضِ قلب کے علاج کے لئے بہترین ادارہ بنانے پر پروفیسر ندیم قمر اور حیدر اعوان مبارک باد کے مستحق  ہیں۔

 این آئی سی وی ڈی منجمنٹ نے ٹیم کو مبارک باد دیتے ہوئے کہا کہ ’پروفیسر ندیم قمر کے وژن کے مطابق پورے صوبہ سندھ میں این آئی سی وی ڈی کے اسپتالوں اور سینے کے درد کے یونٹس کا جال بچھایا جارہا ہے، تاکہ ہامراض قلب کے مریضوں کو اُن کے گھروں پر ہی جدید علاج فراہم کیا جاسکے‘۔

انہوں نے مزید کہا کہ 4سال کے مختصر عرصے میں 10اسٹیٹ آف دی آرٹ اسپتال اور 19چیسٹ پین یونٹس قائم کیے گئے ہیں، جو ادارے کی بے مثال کامیابی کی روشن مثال ہیں۔

یہ بھی پڑھیں: این آئی سی وی ڈی میں فائرنگ : سی ٹی ڈی اہلکار کیخلاف مقدمہ درج

اعلامیے کے مطابق این آئی سی وی ڈی ہیلتھ کیئر نیٹ ورک پورے ملک سے آنے والے مریضوں کو امراضِ قلب کا علاج بالکل مفت فراہم کرنے میں دن رات مصروف عمل ہے۔

Comments

یہ بھی پڑھیں