اسلام آباد: نان فائلرز کیلئے پراپرٹی فروخت کرنے پر تاریخ کا بلند ترین ودہولڈنگ ٹیکس عائد کردیا گیا، 9.5 فیصد ودہولڈنگ ٹیکس لاگو ہوگا۔
تفصیلات کے مطابق نوید قمر کی زیرِصدارت قومی اسمبلی کی قائمہ کمیٹی برائے خزانہ کا اجلاس ہوا، حکام نے بتایا کہ نان فائلرز پر ودہولڈنگ ٹیکس عائد کیا گیا ہے جس کے تحت 10کروڑ روپے کی پراپرٹی فروخت کرنے پر 9.5 فیصد ودہولڈنگ ٹیکس عائد ہو گا۔
حکام نے بتایا کہ 10 کروڑروپے کی پراپرٹی فروخت کرنے پر ٹیکس 8فیصد سے بڑھاکر 9.5فیصد کیا گیا ہے، 10 کروڑروپے سے کم کی پراپرٹی فروخت کرنے پر 8.5فیصد ودہولڈنگ ٹیکس دینا ہوگا۔
5کروڑ روپے سے کم کی پراپرٹی فروخت کرنے پر 7.5فیصد ودہولڈنگ ٹیکس ہوگا، نئے فنانس بل 2025 میں نان فائلرز کیلئے انتہائی سخت اقدامات اٹھائے گئے ہیں۔
حکام نے مزید بتایا کہ فنانس بل 2025-26 میں نان فائلرز کے پراپرٹی خریدنے پر ٹیکس کم کیا گیا ہے، پراپرٹی خریدنے پر جو ٹیکس کم ہوا وہ پراپرٹی فروخت کرنے والے پر منتقل کیاگیا ہے۔
فاٹا/پاٹا کیلئے سیلزٹیکس کے علاوہ باقی تمام ٹیکس چھوٹ کو مزید ایک سال بڑھادیا گیا، اسپیشل اکنامک زونز کیساتھ اسپیشل ٹیکنالوجی زونز کیلئے بھی تمام ٹیکس چھوٹ ختم کیے گئے ہیں۔
چیئرمین ایف بی آر ٹیکس عائد کرنے کے حوالے سے کہا کہ آئی ایم ایف کے سامنے ہاتھ بندھے ہیں ٹیکس چھوٹ ممکن نہیں۔
دوسری طرف پبلک فنانس مینجمنٹ ایکٹ میں ترامیم کیلئے تجویز کی سینٹ کی قائمہ کمیٹی خزانہ سے مخالفت سامنے آئی ہے۔
کمیٹی نے کہا کہ تمام سرکاری ملکیتی اداروں کے ریونیو فیڈرل کنسولیڈیٹڈ فنڈ میں منتقل ہونے چاہیے، کمیٹی نے تجویز دی کہ ان اداروں کو ریونیو جمع کر کے اپنے ہی پاس رکھنے کا اختیار نہیں دیا جا سکتا۔
