کراچی: نارتھ کراچی کا رہائشی 7 سالہ بچے صارم کے مبینہ اغوا کا مقدمہ 2 روز کے بعد درج کرلیا گیا ہے۔
تفصیلات کے مطابق نارتھ کراچی میں 7 سالہ بچے صارم کا دو روز گزرنے کے باوجود کچھ پتہ نہ چل سکا، صارم 7 جنوری منگل کی دوپہر فلیٹ میں مدرسے میں پڑھنے گیا اور لاپتہ ہوگیا۔
اہل خانہ کے مطابق قاری نے بتایا صارم پڑھنے کے بعد اپنے بھائی کے ہمراہ واپس چلا گیا تھا، صارم جن فلیٹس میں رہتا ہے وہیں اندر مدرسہ بنا ہوا ہے۔
تاہم اب دو روز کے بعد پولیس نے اس واقعے کا مقدمہ والد محسن پرویز کی مدعیت میں بلال کالونی تھانے میں اغوا کی سیکشن تحت مقدمہ درج کرلیا ہے، بچے کی والدہ نے اپیل کی ہے کہ میرے بیٹے کو جو بھی لے کر گیا ہے واپس کردے۔
والد محسن نے پولیس کو بتایا کہ میرا بیٹا 3 بجکر 40 منٹ پر مدرسے سے واپس آجاتا ہے لیکن بیٹا 5 بجے تک واپس نہیں آیا تو بیوی نے فون پر اطلاع دی، قاری صاحب نے بتایا 3 بجکر 40 منٹ پر چھٹی کر کے جاچکا ہے۔
والد نے پولیس کو بتایا کہ جب میں واپس آرہا تھا تو مسجد کی سیڑھیوں پر صارم کے دستانے ملے، مجھے لگتا ہےکسی نے میرے بیٹے کو اغوا کر لیا ہے۔
پولیس کا کہنا ہے کہ جس وقت واقعہ ہوا علاقے میں لوڈشیڈنگ تھی، کرائم سین کے اطراف 214 فلیٹس کی تلاشی لی ہے اور بظاہر لگتا ہے کسی اپنے جاننے والے کا ہی کام ہے، تاہم بچے کی بازیابی کیلئے ٹیمیں تشکیل دےدی گئی ہیں۔
