راولپنڈی: سکیورٹی فورسز نے شمالی وزیرستان میں انٹیلیجنس بیسڈ آپریشن کے دوران 3 خارجی دہشتگردوں کو ہلاک کر دیا۔
فوج کے شعبہ تعلقات عامہ (آئی ایس پی آر) کے مطابق ضلع دتہ خیل میں خفیہ کارروائی کے دوران دہشتگرد برقعے میں فرار ہوتے ہوئے ہلاک ہوئے۔
آئی ایس پی آر کے مطابق آپریشن کے دوران ہتھیار اور گولیاں برآمد کی گئیں، ہلاک خوارج متعدد دہشتگرد کارروائیوں میں ملوث تھے، انٹیلیجنس بنیادوں پر آپریشن 6 اور 7 فروری کی درمیانی شب کیا گیا۔
یہ بھی پڑھیں: ڈیرہ اسماعیل خان میں نائب افغان گورنر کا بیٹا دہشتگردوں کیساتھ مارا گیا
علاقے میں کسی ممکنہ خارجی کے خاتمے کیلیے کلیئرنس آپریشن جاری رہا۔
گزشتہ روز سکیورٹی فورسز نے شمالی وزیرستان کے علاقے حسن خیل میں انٹیلیجنس بیسڈ آپریشن کے دوران 12 خارجی دہشتگردوں کو ہلاک کیا تھا۔
آئی ایس پی آر نے بتایا تھا کہ دہشتگردوں کے ساتھ جھڑپ میں لانس نائیک محمد ابراہیم شہید ہوگیا، 34 سالہ شہید کا تعلق ہنگو سے تھا۔
ہلاک خارجی دہشتگردوں سے بڑی مقدار میں ہتھیار اور گولہ بارود برآمد کیا۔ دہشتگرد سکیورٹی فورسز پر حملوں اور شہریوں کی ٹارگٹ کلنگ میں بھی ملوث تھے۔
علاقے کو دہشتگردوں اور ان کے سہولت کاروں سے پاک کرنے کیلیے کلیئرنس آپریشن کیا گیا تھا۔
