شیخ وقاص اکرم نے کہا ہے کہ بیلاروس کے صدر کے دورہ پاکستان کا ہمیں علم تک نہیں تھا، بیلاروس کے صدر کے دورہ پاکستان کی تاریخ سے پہلے ہم نے کال دی تھی۔
اے آر وائی کے پروگرام اعتراض ہے میں گفتگو کرتے ہوئے سیکریٹری اطلاعات پی ٹی آئی نے کہا کہ بانی پی ٹی آئی نے فائنل کال دی تھی جس پر احتجاج کرنے جارہے ہیں، احتجاج کا مقصد 26ویں ترمیم، مینڈیٹ کی واپسی اور بےگناہوں کی رہائی ہے، پی ٹی آئی نے کروڑوں ووٹ لیے ہیں، احتجاج پہلی مرتبہ نہیں کررہے۔
شیخ وقاص اکرم نے کہا کہ فارم 47 کی فسطائیت کی باوجود سب سے زیادہ ایم این اے منتخب ہوئے، پی ٹی آئی کو افغان شہریوں کی ضرورت نہیں، پاکستانی عوام ہمارے ساتھ ہے۔
انھوں نے کہا کہ عظمیٰ بخاری نے جو بیان دیا کہ افغان یوتھ فورس بنارکھی ہےغلط ہے، چیزوں کو سیاق وسباق سے ہٹ کر پیش کرنا درست عمل نہیں، سعودی عرب کیساتھ پی ٹی آئی سمیت ہر پاکستانی کا رشتہ عقیدت کا ہے۔
سیکریٹری اطلاعات پی ٹی آئی نے کہا کہ مذاکرات شروع ہوئے ہی نہیں تو جاری یا ختم ہونے کی بات ختم ہوجاتی ہے، علی امین گنڈاپور خیبرپختونخوا سے قافلے کو لیڈ کریں گے۔
انھوں نے کہا کہ محسن نقوی ملک کے وزیرداخلہ ہیں وہ کیوں کرم نہیں گئے، پاکستان ہم سب کا ہے، کرم کا واقعہ بہت افسوسناک ہے، ہمارے دو وزرا اور ایم پی ایز اس وقت کرم میں موجود ہیں۔
شیخ وقاص نے کہا کہ کرم میں صوبائی حکومت کی قیادت میں ایک جرگہ ہوچکا ہے، کرم میں کل دوسرا جرگہ ہوگا، امن قائم کرنے کی کوشش کی جارہی ہے، کےپی کے منسٹرز ہیلی کاپٹر کے ذریعے کرم پہنچے ہیں۔
ہمارا پُرامن احتجاجی مارچ ہے جو پُرامن طریقے سے جائےگا، ہمارے لوگ نہتے ہیں کوئی اسلحہ نہیں، ربڑ کی گولیاں اور آنسو گیس کے شیل حکومت کے پاس ہیں، راستے بند نہ کریں، خندقیں نہ کھودیں لوگ آرام سے چلے جائیں گے۔
