لاہور : ادویات کی قیمتیں مقرر کرنے کا اختیار فارماسوٹیکل کمپنیز کو دینے کے اقدام کو لاہور ہائیکورٹ میں چیلنج کر دیا گیا۔
تفصیلات کے مطابق ادویات کی قیمتیں مقرر کرنے کا اختیار فارماسوٹیکل کمپنیز کو دینے کے اقدام کیخلاف درخواست دائر کردی گئی۔
ندیم سرور ایڈوکیٹ کے توسط سے لاہور ہائیکورٹ میں درخواست دائر کی گئی، جس میں موقف اختیار کیا گیا ہے کہ نگران کابینہ نے دواؤں کی قیمتیں مقرر کرنے کا اختیار ڈریپ سے لیکر فارماسوٹیکل کمپنیز کو دیا اور موجودہ وفاقی حکومت نے بھی نگران حکومت کے فیصلے کی غیر قانونی تائید کی۔
درخواست میں بتایا گیا کہ عدالت نے وفاقی کابینہ کو معاملے کا اَز سر نو جائزہ لینے کا حکم دیا لیکن عدالتی احکامات کے باوجود نگران حکومت کے فیصلے کی تائید غیر آئینی ہے۔
درخواست گزار کے مطابق فارماسوٹیکل کمپنیز من مانے ریٹس پر دوائیں فروخت کر کے عوام پر بوجھ ڈال رہی ہیں، اس لئے دواؤں کی قیمتیں مقرر کرنے کا اختیار کمپنیز کو دینے کا نوٹیفکیشن کالعدم قرار دیا جائے۔
