کراچی: وزیر اعظم شہباز شریف نے کراچی میں نیوکلیئر پاور پلانٹ کینپ 3 کا افتتاح کر دیا۔
تفصیلات کے مطابق وزیر اعظم شہباز شریف نے کراچی میں نیوکلیئر پاور پلانٹ کینپ 3 کا افتتاح کر دیا، یہ پاور پلانٹ چین کی شراکت سے بنایا گیا ہے، منصوبے سے بجلی کی مجموعی پیداوار 2200 میگا واٹ ہو جائے گی۔
اس موقع پر وزیر اعظم نے اپنے خطاب میں چینی بھائیوں سے بجلی کی قیمت میں کمی کی امید باندھتے ہوئے کہا کہ ہمیں امید ہے چینی بھائی مستقبل میں بجلی کے یونٹ کی قیمت میں کمی کریں گے۔
انھوں نے کہا ’’پاکستان توانائی کی مد میں 27 بلین ڈالر کی پیٹرولیم مصنوعات درآمد کرتا ہے، پاکستان کو سستے اور معیاری متبادل توانائی کے ذرائع کی ضرورت ہے۔‘‘
وزیر اعظم نے کہا ’’چین اور پاکستان بہترین دوست ہیں، نواز شریف کی سربراہی میں 2015 میں سی پیک کے اربوں ڈالر کی سرمایہ کاری ہوئی، آج سی پیک کے تحت ہزاروں میگا واٹ بجلی پاکستان میں بن رہی ہے، سی پیک کے دیگر منصوبے بھی جاری ہیں، انشا اللہ ہم چین کے ساتھ اگلے مراحل میں داخل ہوں گے۔‘‘
شہباز شریف نے کہا کہ پاکستان کو سستے ایندھن کی ضرورت ہے، ہماری بھرپور کوشش ہے کہ 1200 میگا واٹ تیزی سے آگے بڑھے۔
انھوں نے ہدایت کی کہ ایٹامک انرجی کمیشن کی تکمیل کے لیے جنھوں نے دن رات کام کی ان کی فہرست بنائی جائے، انھیں وزیر اعظم ہاؤس میں دعوت دے کر حوصلہ افزائی کی جائے گی۔
وزیر اعظم کا کہنا تھا کہ ہمیں بجلی کے منصوبے لگانا ہوں گے، شمسی توانائی اور پن بجلی منصوبوں سے ترقی اور خوش حالی آئے گی، ہم کروڈ آئل اربوں ڈالر میں امپورٹ کرتے ہیں تو اس طرح اس کی بچت ہوگی۔
