اسلام آباد : شدید سردی کے سبب ملک میں ڈینگی کیسز کی تعداد میں نواسی فیصدکمی ہوگئی، ذرائع کا کہنا ہے بلوچستان، آزادکشمیر اورقبائلی اضلاع میں ڈینگی کا مکمل خاتمہ ہوگیا جبکہ سندھ سے ڈینگی وائرس کا تاحال خاتمہ نہیں ہو سکا۔
تفصیلات کے مطابق ملک میں ڈینگی کیسز کی تعداد میں 89 فیصد کمی آ گئی، ذرائع وزارت صحت کا کہنا ہے کہ بلوچستان، آزادکشمیر، قبائلی اضلاع ڈینگی سے مکمل خاتمہ ہوگیا جبکہ اسلام آباد ڈینگی وائرس سے 98 فیصد، پنجاب 93 فیصد پاک ہوگیا ہے۔
ذرائع کے مطابق سندھ سے ڈینگی وائرس کا تاحال خاتمہ نہ ہو سکا، ملک کے موجودہ 92 فیصد ڈینگی کیسز کا تعلق سندھ سے ہے جبکہ سندھ کے 94 فیصد ڈینگی کیسز کا تعلق کراچی سے ہے۔
وزارت صحت کا کہنا ہے کہ گزشتہ 24 گھنٹوں کے دوران ملک میں 125 ڈینگی کیس سامنے آئے، جس میں سے اسلام آباد سے 6، پنجاب سے 6،بلوچستان سے 1 کیس شامل ہیں جبکہ خیبرپختونخواہ و قبائلی اضلاع، آزاد کشمیر سے کوئی ڈینگی کیس سامنے نہیں آیا۔
ذرائع کے مطابق چوبیس گھنٹوں میں سندھ سے 112 ڈینگی کیس سامنے آئے اور ڈینگی وائرس سے 2 افراد جاں بحق ہوئے جبکہ ملک میں ڈینگی کیسز کی مجموعی تعداد 52248 ہے ،رواں برس سب سے ذیادہ 15304 ڈینگی کیس سندھ سے رپورٹ ہوئے۔
رواں برس وفاقی دارالحکومت سے 13282، پنجاب 10045 ،بلوچستان 3386 ، خیبرپختونخوا 7079، قبائلی اضلاع 793 کیس رپورٹ ہوئے ہیں، آزادکشمیر سے 1690 ڈینگی کیسز سامنے آئے ہیں جبکہ گلگت بلتستان سے رواں برس ڈینگی وائرس کا کوئی کیس رپورٹ نہیں ہوا۔
وزارت صحت کا کہنا ہے کہ رواں برس ملک میں ڈینگی سے 91 اموات ہو چکی ہیں، جس میں سندھ میں ڈینگی سے 42، وفاقی دارالحکومت میں 22 ، پنجاب 23،بلوچستان 3،آزادکشمیر میں 1 شخص جاں بحق ہوا جبکہ کے پی، قبائلی اضلاع میں ڈینگی سے تاحال اموات واقع نہیں ہوئیں۔
