دبئی: امریکا ایران کشیدگی کے نتیجے میں خام تیل کی قیمت 10 ماہ کی بلند ترین سطح پر پہنچ گئی۔
غیرملکی خبررساں ادارے کی رپورٹ کے مطابق امریکا اور ایران کے درمیان کشیدگی کے باعث خام تیل کی قیمت میں 2 ڈالر 41 سینٹس کا اضافہ ہوگیا، برینٹ خام تیل کی قیمت 68 ڈالر 70 سینٹس فی بیرل ہوگئی۔
امریکی خام تیل کی قیمت میں 1 ڈالر 85 سینٹس فی بیرل اضافہ ہوا جس کے بعد امریکی خام تیل کی قیمت 63 ڈالر 3 سینٹس فی بیرل ہوگئی۔
رپورٹ کے مطابق عالمی منڈی میں خام تیل کی قیمت میں 3 فیصد اضافہ ریکارڈ کیا گیا ہے جبکہ دونوں ممالک کے درمیان کشیدگی کے باعث قیمتوں میں مزید اضافہ متوقع ہے۔
مزید پڑھیں: ایران امریکا کشیدگی، عالمی معیشت پر گہرے اثرات
واضح رہے کہ امریکا ایران کشیدگی کے باعث عالمی حصص بازاروں میں مندی کا رجحان برقرار ہے، امریکی ڈاؤجونز میں 234 پوائنٹس کی کمی ریکارڈ کی گئی۔ نیسڈیک میں72 پوائنٹس کی کمی ہوئی۔
جرمن اسٹاک مارکیٹ میں167 پوائنٹس کی کمی دیکھی گئی۔ جبکہ جاپانی نکئی میں 181پوائنٹس کی کمی ریکارڈ کی گئی۔ چینی اور ہانگ کانگ حصص بازاروں میں بھی مندی ریکارڈ کی گئی ہے۔
یاد رہے کہ گزشتہ روز بغداد کے ایئر پورٹ پر امریکی فضائی حملے میں ایرانی جنرل سمیت 9 افراد ہلاک ہو گئے تھے۔ فضائی حملے میں ہلاک جنرل قاسم سلیمانی القدس فورس کے سربراہ تھے، عراقی میڈیا کا کہنا تھا کہ دیگر ہلاک شدگان میں ایران نواز ملیشیا الحشد الشعبی کا رہنما بھی شامل ہے۔
