اوکاڑہ : چند روز پہلے گھریلو رنجش پر ایک کمسن بچی کو قتل کردیا گیا تھا، تفتیش کے بعد قاتل کوئی اور نہیں اسی بدنصیب مقتولہ کے والدین نکلے۔
تفصیلات کے مطابق اوکاڑہ کے علاقہ بصیر پورہ میں چند روز قبل قتل ہونے والی ذہنی معذور کمسن بچی کے قتل کا معمہ پولیس نے حل کرلیا، والدین نے خود اپنی بیٹی کو جان سے مار ڈالا۔
اس حوالے سے پولیس حکام نے میڈیا کو تفصیلات بتاتے ہوئے کہا کہ مقتولہ بچی کے سفاک والدین نے ہی اپنی معصوم بیٹی کو قتل کیا، بچی کو والد اور والدہ نے ہی قتل کرکے پھینکا تھا۔
اوکاڑہ پولیس کے مطابق بچی کے والدین پر شک ہونے پر ان کو شامل تفتیش کیا گیا، تحقیقات کے دوران انکشاف ہوا کہ دونوں میاں بیوی اپنی بچی کے قتل کاالزام بھائی بھابھی پر ڈالنا چاہتے تھے، ملزمان نے علاقہ مجسٹریٹ کے سامنے اپنے جرم کا باقاعدہ اعتراف کرلیا ہے۔
یاد رہے کہ اس سے قبل رواں سال مئی میں اوکاڑہ میں ہی گھریلو تنازعہ پر6 ماہ کی بچی ماں کے ہاتھوں قتل ہوگئی تھی، بچی کی والدہ نے غصے میں آکر 6 ماہ کی معصوم بچی کو زمین پر پٹخ دیا تھا جس سے وہ موقع پر ہی ہلاک ہوگئی تھی۔
یاد رہے کہ وزیر اعلیٰ پنجاب نے بچی کی لاش ملنے کے واقعے کا نوٹس لے کر رپورٹ طلب کی تھی، ملزمان نے اعتراف جرم کرکے عدالت سیکشن164 کے بیان بھی درج کروا دیئے۔
