بزرگ ڈاکٹر پر بہیمانہ تشدد کرنے کے بعد ملزمان نے کتے کے پٹے سے گلا گھونٹ کر مار ڈالا جبکہ فرار ہوتے ہوئے گھر میں توڑ پھوڑ بھی کی۔
دہلی کے پوش علاقے جنگ پورہ میں ایک بزرگ ڈاکٹر کو وحشیانہ تشدد کرتے ہوئے قتل کیا گیا تھا، اب تفتیش میں یہ بات سامنے آئی ہے کہ ڈاکٹر کو تشدد کے بعد اس کے سر پر کسی چیز سے وار کیا گیا پھر کتے کے پٹے سے گلا گھونٹ کر ہلاک کردیا گیا۔
پولیس نے بتایا کہ ملزمان نے واردات کے دوران بزرگ ڈاکٹر کے دونوں کتوں کو باتھ روم میں بند کر دیا تھا۔
ڈاکٹر یوگیش چندر پال جمعہ کو جنگ پورہ ایکسٹینش کے علاقے میں اپنے گھر میں مردہ پائے گئے اور ان کے ہاتھ بندھے ہوئے تھے۔ پولیس نے گھر کے قریب لگے سی سی ٹی وی کیمرے سے فوٹیج حاصل کی ہے جس میں چار مشتبہ افراد نظر آ رہے ہیں۔
پولیس کا کہنا ہے کہ تفتیش میں یہ بات سامنے آئی ہے کہ سی سی ٹی وی فوٹیج میں دیکھا جا سکتا ہے کہ ڈاکٹر کے گھر کے باہر نظر آنے والے چار مشتبہ افراد میں سے تین ان کے گھر میں داخل ہوئے جب کہ چوتھا گھر کے باہر کھڑا ہے۔
پولیس نے بتایا کہ ملزمان نے ڈاکٹر کو مارا پیٹا، اسے کرسی سے باندھ دیا۔ وہ اسے کچن میں لے گئے جہاں ملزمان نے اس کے سر پر کند چیز سے مارا اور کتے کے پٹے سے اس کا گلا گھونٹ دیا۔
ملزمان نے ڈاکٹر پال کے دونوں کتوں کو باتھ روم میں بند کر دیا جبکہ فرار ہونے سے قبل گھر میں توڑ پھوڑ بھی کی۔ اس کیس میں کسی جاننے والے کے ملوث ہونے کے امکان کو رد نہیں کیا جاتا۔
پولیس نے قتل اور ڈکیتی کا مقدمہ درج کر کے مختلف پہلوؤں سے تفتیش شروع کر دی ہے۔ پولیس کو شبہ ہے کہ ریکی کے بعد بزرگ ڈاکٹر کو قتل کیا گیا اور ان کے گھر میں ڈکیتی کی واردات کی گئی۔
ابھی تک یہ معلوم نہیں ہوسکا کہ ملزمان کو کیسے پتہ چلا کہ کینیڈا میں رہنے والی ڈاکٹر کی بیٹی نے اپنے والد کو خطیر رقم بھیجی تھی۔
