عمان : کورونا وائرس کی عالمی وبا کے پیش نظر عمان حکومت کی جانب سے لگائے گئے کرفیو میں نرمی کردی گئی ہے، تاہم اس حوالے سے نئے احکامات جاری کیے گئے ہیں۔
عمانی ذرائع ابلاغ کے مطابق جمعرات کو شہریوں اور گاڑیوں کے لیے رات کا کرفیو ختم کر دیا گیا ہے لیکن رمضان کے شروع ہونے تک کاروباری سرگرمیاں شام کو بند کرنے کی پابندی برقرار ہے۔
اس سے قبل حکومت کی جانب سے بازاروں اور دکانوں کے لیے شام آٹھ بجے سے صبح پانچ بجے تک کاروباری سرگرمیاں معطل رکھنے کے احکامات جاری کیے گئے تھے۔
سرکاری میڈیا نے اس بات کی تصدیق کی ہے کہ کاروباری سرگرمیاں رمضان کی پہلی صبح تک شام آٹھ بجے سے صبح پانچ بجے تک معطل رہیں گی۔
عمانی حکام نے اس سے قبل کورونا وائرس کے پھیلاؤ کو روکنے کے لیے سخت اقدامات کیے تھے، جن میں مساجد میں باجماعت تروایح اور ہر طرح کے اجتماعات پر پابندی شامل ہے۔
اس کے علاوہ کھیلوں سمیت تمام معاشرتی اور ثقافتی سرگرمیاں جو اجتماع کی صورت میں ہوتی ہیں ان پر بھی رمضان کے دوران پابندی عائد رہے گی۔
عمان میں داخلہ بھی عمانی شہریوں اور شہریت رکھنے والے تک محدود رکھا گیا ہے جبکہ رمضان کے دوران سمندر پار سفر پر پابندی کے گریز کرنے کا کہا گیا ہے، تاہم ضرورت کے تحت سفر کی اجازت دی گئی ہے۔
واضح رہے کہ سلطنت میں کورونا وائرس کے ایک ہزار203 نئے کیسز رپورٹ ہوئے ہیں اور ایک رات میں سات کوویڈ-19 کی وجہ سے ہلاکتیں ہوئی ہیں۔ اس کے کیسز بڑھ کر ایک لاکھ 66 ہزار 685 ہوگئے ہیں اور ہلاکتوں کی تعداد ایک ہزار 735 تک پہنچ گئی ہے۔
