اسلام آباد: سنی اتحاد کونسل کی جناب سے وزیر اعظم کیلیے نامزد امیدوار عمر ایوب کا کہنا ہے کہ یہ ایوان نامکمل ہے اور اسپیکر کا الیکشن بھی نامکمل ہے۔
قومی اسمبلی کے افتتاحی اجلاس سے خطاب میں عمر ایوب نے کہا کہ یہاں بے ضابطیاں ہوں گی تو گلا خراب ہی ہوگا لیکن گلا کٹ بھی جائے تب بھی ہم آواز اٹھائیں گے۔
عمر ایوب نے کہا کہ ہماری خواتین کی سیٹیں مکمل نہیں ہیں عالیہ حمزہ ایوان میں نہیں ہیں، آرٹیکل 51 دیکھ لیں آپ کا اسپیکر کا الیکشن نامکمل ہے، گھس بیٹھیے اسپیکر اور ڈپٹی اسپیکر کیلیے ووٹ نہیں ڈال سکتے۔
انہوں نے کہا کہ ہمیں بانی پی ٹی آئی کو اسمبلی میں واپس لانا ہے، عوامی مینڈیٹ پر ڈاکا ڈالنے والوں کو ایوان سے نکالا جائے، یہ ہاؤس آر او کی مرضی سے نہیں چل سکتا۔
اجلاس میں رانا تنویر اور عمر ایوب میں سخت جملوں کا تبادلہ ہوا۔ عمر ایوب نے سخت لہجے میں رانا تنویر کو اپنی نشست پر بیٹھنے کا اشارہ کیا۔
عمر ایوب نے کہا کہ یہ شخص کل بھی آیا تھا اس نے بیہودہ نعرے لگائے تھے، ہمیں معلوم ہے (ن) لیگ اور پیپلز پارٹی کا بڑا اچھا ریلیشن ہے، چیک کروائیں یہ شخص کس کی اسپانسر شپ پر یہاں آیا تھا۔
انہوں نے کہا کہ یہاں پر جوش خص بیٹھا تھا اس نے کل بھی بیہودہ گالیاں نکالیں، اسپیکر صاحب آپ نے ایف آئی آر کروانی ہے ہم اس شخص کے خلاف تحریک لائیں گے۔
