پاکستان کے سابق اسٹار فاسٹ بولر عمر گل کو افغانستان کی قومی ٹیم کا نیا بولنگ کوچ اور کنسلٹنٹ مقرر کر دیا گیا ہے۔
ڈومیسٹک اور مختلف لیگز میں کوچنگ کا تجربہ رکھنے والے 37 سالہ بولر نے کہا کہ وہ 4 اپریل کو ابوظہبی میں افغانستان کرکٹ ٹیم کے کیمپ میں شامل ہوں گے۔
400 سے زائد انٹرنیشنل وکٹیں لینے والے دائیں ہاتھ کے تیز گیند باز نے کہا کہ ابتدائی طور پر افغانستان کرکٹ بورڈ (اے سی بی) کے ساتھ تین ہفتوں کے لیے معاہدہ کیا گیا تھا یہ میعاد مکمل ہونے کے بعد ممکن ہے کہ توسیع کی جائے گی.
یاد رہے کہ انگلینڈ کے سابق بلے باز گراہم تھورپ کو چند روز قبل ہی افغانستان کا ہیڈ کوچ مقرر کیا گیا تھا۔
عمر گل نے پاکستان کی قومی کرکٹ ٹیم کے لیے 13 سال کی خدمات میں تمام فارمیٹس کے 237 بین الاقوامی کھیلوں میں 427 وکٹیں حاصل کیں۔ 37 سالہ کو کوئٹہ گلیڈی ایٹرز (پی ایس ایل) اور گال گلیڈی ایٹرز (ایل پی ایل میں) کے ساتھ کوچنگ کا تجربہ ہے۔
