واشنگٹن: کرونا وائرس کے سب سے زیادہ متعدی ویرینٹ اومیکرون کے بعد امریکا میں کیسز کا ریکارڈ ٹوٹ گیا ہے۔
تفصیلات کے مطابق اومیکرون کے پھیلاؤ کے باعث دنیا بھر میں کرونا وبا شدت اختیار کر گئی ہے، امریکا میں کیسز کا ریکارڈ ٹوٹ گیا، ایک دن میں 5 لاکھ 72 ہزار سے زیادہ کیسز رپورٹ ہوئے۔
امریکا میں کرونا وائرس انفیکشن کی وجہ سے گزشتہ چوبیس گھنٹوں کے دوران ایک ہزار 362 مریض ہلاک ہو گئے ہیں۔
امریکا میں اب تک کرونا وائرس سے 8 لاکھ 45 ہزار 7 سو سے زائد افراد ہلاک ہو چکے ہیں، جب کہ وائرس سے متاثر ہونے والوں کی مجموعی تعداد 5 کروڑ 52 لاکھ 52 ہزار سے زائد ہے۔
ادھر برطانیہ میں مسلسل دوسرے روز بھی ایک لاکھ 89 ہزار سے زائد کیسز سامنے آئے ہیں، جب کہ 332 افراد جان سے گئے، جس کے بعد برطانیہ میں مجموعی اموات 1 لاکھ 48 ہزار ہو گئی ہیں۔
فرانس میں مسلسل دوسرے روز 2 لاکھ سے زیادہ کیسز رپورٹ ہوئے ہیں، کینیڈا کے شہر کیوبک میں رات کا کرفیو نافذ کر دیا گیا ہے، ترکی میں ریکارڈ 37 ہزار کیسز رپورٹ ہوئے، جب کہ 7 یورپی ممالک نے ترک مسافروں کے داخلے پر پابندی لگا دی ہے۔
دوسری طرف جنوبی افریقہ نے اومیکرون ویرینٹ پر قابو پا نے کا دعویٰ کر دیا ہے، کہا گیا کہ ملک میں وبا کی چوتھی لہر گزر چکی ہے۔
