کراچی: شہر قائد کے مختلف علاقوں میں ہلکی بارش سے موسم خوشگوار ہوگیا اور ٹھنڈی ہواؤں کا راج ہے۔
تفصیلات کے مطابق کراچی کے مختلف علاقوں میں رات گئے ہلکی بارش ہوئی جس کی وجہ سے شہر کا موسم خوشگوار ہوگیا اور ٹھنڈی ہواؤں کے بھی ڈیرے ہیں۔
شہر کے جن علاقوں میں ہلکی بارش ہوئی ان میں ناظم آباد، شادمان ٹاؤن، نارتھ کراچی، سرجانی ٹاؤن، نارتھ ناظم آباد، ایف بی ایریا اور منگھوپیر شامل ہے۔
دو روز قبل بھی شہر میں رات گئے بوندابادی سے موسم خوشگوار ہوگیا تھا، کراچی کے علاقے ناظم آباد، نارتھ کراچی اور سرجانی ٹاؤن، سہراب گوٹھ، منگھوپیر اور اورنگی ٹاؤن میں بھی ہلکی بارش ہوئی تھی۔
کراچی کے مختلف علاقوں میں بونداباندی، موسم خوشگوار
دوسری جانب محکمہ موسمیات نے کہا تھا کہ شہر میں تیز بارش کا کوئی امکان نہیں ہے۔
یاد رہے کہ دو ہفتے قبل کراچی میں ہلکی بارش کے بعد کے الیکٹرک کی ٹرانسمیشن لائن ٹرپ کرگئی تھی، شہر کے بیشترعلاقوں میں بجلی کی فراہمی معطل ہو گئی تھی۔
واضح رہے کہ شہر میں پچھلے چند دنوں سے موسم میں تبدیلی دکھائی دی ہے، جبکہ دو روز قبل صبح اور رات گئے بھی ہلکی بونداباندی ہوئی تھی۔
