وزیراعظم شہباز شریف نے رمضان المبارک میں صوبہ پنجاب کے ایک کروڑ 58 لاکھ گھرانوں کو مفت آٹا دینے کا اعلان کیا ہے۔
اے آر وائی نیوز کے مطابق وزیراعظم شہباز شریف کی زیر صدارت رمضان پیکیج کے تحت مفت آٹے کی فراہمی سے متعلق جائزہ اجلاس ہوا جس میں پنجاب کی نگراں حکومت کی رمضان میں مفت آٹے کی تقسیم کے پروگرام پر تفصیلی بریفنگ دی گئی۔
اجلاس میں نگراں وزیراعلیٰ پنجاب محسن نقوی، وزیراعظم کے مشیر احمد چیمہ ودیگر متعلقہ حکام نے شرکت کی۔
اجلاس سے خطاب کرتے ہوئے وزیراعظم نے کہا کہ پہلی بار غریب کے لیے رمضان المبارک میں مفت آٹے کی فراہمی کا پیکیج تیار کیا گیا ہے۔ اس ماہ مقدس میں پنجاب بھر کے ایک کروڑ 58 لاکھ گھرانوں کو مفت آٹا تسیم کیا جائے گا اور یہ تقسیم صوبے کے ساڑھے 8 ہزار یوٹیلیٹی اسٹورز کے ذریعے کی جائیگی۔
شہباز شریف نے مزید کہا کہ مفت آٹے کی یہ تقسیم 25 شعبان سے شروع کی جائیگی جو 25 رمضان تک جاری رہے گی۔ یوٹیلیٹی اسٹورز کے علاوہ آٹے کی تقسیم کے مزید 20 ہزار پوائنٹس قائم کیے جائیں گے۔
انہوں نے ہدایت کی کہ مفت آٹے کی تقسیم شفاف طریقے سے یقینی بنائی جائے اور آٹے کی فراہمی میں چوری روکنے کیلیے جدید ٹیکنالوجی کا استعمال کیا جائے۔
وزیراعظم نے واضح کیا کہ مفت آٹے کے معیار پر کسی قسم کا سمجھوتا قبول نہیں ہوگا۔ مفت آٹا اسکیم میں لوگ اپنی اہلیت ایس ایم ایس کے ذریعے جانچ سکیں گے جب کہ وفاقی حکومت دیگر صوبوں کو بھی اس پروگرام میں معاونت فراہم کرے گی۔
