سعودی وزیر تعلیم یوسف البنیان نے پرائمری اسکول میں نئے داخلوں کے لیے آن لائن رجسٹریشن سروس کا افتتاح کیا ہے۔
اخبار 24 کے مطابق آن لائن اندراج سروس سے پرائمری اسکول کے نئے طلبہ کے سرپرستوں کو سہولت ہوگی، وزارت تعلیم نے پہلی بار یہ سروس متعارف کرائی ہے۔
نئی سروس کے ذریعے یہ بات آسانی سے معلوم کی جاسکے گی کہ امیدوار طالبعلم پرائمری اسکول میں داخلے کا مستحق ہے یا نہیں۔
داخلے کی اہلیت کا فیصلہ تاریخ پیدائش سے ہوگا، امیدواروں کا ڈیٹا آن لائن مہیا ہوگا، نیشنل انفارمیشن سینٹر، ریئل سٹیٹ جنرل اتھارٹی، سعودی پوسٹل (سبل)، وزارت صحت اور وزارت انصاف کے ڈیٹا سے مدد لی جائے گی۔
نئے تعلیمی سال پرمملکت میں 12 ہزار سے زیادہ پرائمری اسکولوں میں نئے داخلے کے امیدواروں کا اندراج منظم طریقے سے ممکن ہوگا۔
پہلے مرحلے میں نئی سروس سے ساڑھے چار لاکھ سے زیادہ طلبہ کو فائدہ ہوگا۔
