کراچی: ساحل پر پھنسے بحری جہاز کو نکالنے کا آپریشن تیسرے دن بھی ناکام ہوگیا ، کرین بردار بوٹ پھنسنے کی وجہ سے آپریشن نہ ہوسکا، ریسکیو ٹیموں کے پاس کل آخری دن ہے۔
تفصیلات کے مطابق کراچی کے ساحل سی ویو پر پھنسا جہاز حکام کیلئے چیلنج بن گیا ، تیسرے دن بھی جہاز نکالنے کے آپریشن میں ناکامی کا سامنا کرنا پڑا اور آپریشن ملتوی کردیا گیا۔
کرین بردار بوٹ پھنسنے کی وجہ سے آپریشن نہ ہوسکا، کرین بردار کشتی کو نکالنے کا کام کیا جارہا ہے ، موسم موافق ہونے اور کرین بردار بوٹ نکلنے کے بعد آپریشن جمعہ کو کیا جائے گا۔
جہاز نکالنے کیلئے آج بھی دو دفعہ کوشش کی گئی جس میں ناکامی کا سامنا ہوا، جہاز نکالنے کیلئے ریسکیو ٹیموں کے پاس کل آخری دن ہے ، 13اگست کے بعد 22اگست کو دوبارہ جہاز نکالنے کا آپریشن شروع کیا جائے گا۔
جہاز نکالنے کیلئے 22 اور23اگست کو صرف دو دن جہاز نکالنے کی اجازت ہوگی ، 23اگست کے بعد پورٹ انتظامیہ سمندر کی لہروں کی پوزیشن اور ریسکیو ٹیموں کی تیاریوں کو دیکھنے کے بعد جہاز نکالنے کی اجازت دے گی۔
جہاز کے مالک نے پیسے کی بچت کیلئے ہائی پاور کی خصوصی غیر ملکی ٹگ بوٹ نہیں منگوائی بلکہ مقامی نجی کمپنی کی ٹگ بوٹ استعمال کرنے کی وجہ سے آپریشن میں مسلسل ناکامی کا سامنا کرنا پڑا۔
وزارت بحری امور جہاز کو پہلے ہی تحویل میں لینے کا اعلان کرچکی ہے ، 13 اگست کے بعد لو ٹائیڈ ہونے کی وجہ سے انتظامیہ نے جہاز مالکان کو 22اگست تک آپریشن ملتوی کرنے کے احکامات جاری کردیئے جبکہ جہاز نکالنے والی کرین شپ بھی تاحال جہاز کے پاس ہی ریت میں پھنسی ہوئی ہے۔
