اسلام آباد : وزیراعظم عمران خان نے وفاقی کابینہ کے اجلاس میں ذخیرہ اندوزوں کیخلاف سخت کارروائی کی ہدایت کرتے ہوئے کہا اشیا ضروریہ کی قیمتوں میں ہر صورت کمی چاہیئے۔
تفصیلات کے مطابق وزیراعظم عمران خان کی زیر صدارت وفاقی کابینہ کا اجلاس ہوا، جس میں وفاقی کابینہ نے ملک کی سیاسی، معاشی اورمہنگائی کی صورتحال پر غور کیا گیا جبکہ اپوزیشن کی تحریک اورحکومت مخالف جلسوں کاجائزہ لیا گیا۔
وفاقی کابینہ نے 6 نکاتی ایجنڈے پر غور کیا اور متعدد نکات کی منظوری دے دی، کابینہ اجلاس میں مہنگائی کے معاملے پرآج پھر بحث ہوئی ، بعض وزرانے اظہار تشویش کرتے ہوئے وفاقی وزیربرائے فوڈاینڈ سیکیورٹی فخرامام سے سوالات کئے۔
فخرامام سےسوال کیا گیا کہ گندم اورآٹےکی صورتحال کب تسلی بخش ہوگی؟ آپ ٹائم لائن دیں تا کہ عوام کوآگاہ کر سکیں، اس موقع پر وزیراعظم نے کہا قیمتوں سمیت سپلائی اینڈ ڈیمانڈ پر نظررکھنےکی ضرورت ہے، پہلے دن سے کہہ رہاہوں قیمتوں پرکنٹرول کیاجائے، ذخیرہ اندوزوں کیخلاف سخت کارروائی کی جائے، اشیاضروریہ کی قیمتوں میں ہر صورت کمی چاہیئے۔
ذرائع کے مطابق وفاقی کابینہ کے فیصلوں پرعملدرآمد رپورٹ موخر کردی گئی جبکہ گن اینڈکنٹری کلب میں عارضی انتظامی کمیٹی کی تشکیل کی منظوری، سندھ انفراسٹکچرڈیولپمنٹ کمپنی کاانتظامی کنٹرول وزارت منصوبہ بندی کو دینے کی منظوری اور سندھ انفراسٹرکچرڈیولپمنٹ کمپنی کےسی ای اوپوسٹ پراضافی ذمہ داری دینےکی منظوری دی۔
ذرائع کا کہنا ہے کہ وفاقی کابینہ نے ادارہ جاتی اصلاحات سے متعلق کابینہ کی کمیٹی کے فیصلوں اور اقتصادی رابطہ کمیٹی کے 14اکتوبرکےفیصلوں کی توثیق کردی۔
