بھارت کی مشہور گلوکارہ نیہا ککڑ کی آواز میں ایک خاتون نے پیزا آرڈر کیا، جس کی انسٹاگرام ویڈیو وائرل ہو گئی۔
بالی ووڈ کی مقبول پلے بیک سنگر نیہا ککڑ کی خوب صورت آواز کو جہاں موسیقی کے شائقین بہت پسند کرتے ہیں، وہاں اگر کسی کو ان کی مخصوص آواز میں اگر کال آ جائے تو یقیناً وہ چونک اٹھے گا۔
اترپردیش کے شہر نوئیڈا سے تعلق رکھنے والے ایک خاتون سانگ رائٹر پرانجلی کی ایک انسٹاگرام ویڈیو وائرل ہوئی ہے، جس میں وہ نیہا ککڑ کی آواز کی نقل کر کے پیزا آرڈر کرنے کی کوشش کر رہی ہیں۔
پرانجلی نے انسٹاگرام پوسٹ پر یہ کیپشن لکھا کہ ’’نیہا ککڑ کس طرح پیزا آرڈر کرتی ہیں۔‘‘ پرانجلی نے نیہا کی آواز میں ایک مقامی پیزا آؤٹ لیٹ پر کال کی، اور رد عمل دیکھنے لگیں۔
جیسے ہی ریتھک نامی شخص نے کال کا جواب دیا، پرانجلی نے ککڑ کی آواز میں ’تم کو آرڈر پسند ہے، مجھ کو آرڈرز میں پیزا‘ گانا شروع کر دیا۔
تاہم فون پر موجود شخص آرڈر کو سمجھنے میں ناکام رہا تو پرانجلی نے کہا ’’ارے بولا میں نے بار بار بار بار ۔۔۔۔ مجھ کو پیزا دے دے یار یار یار یار۔‘‘
View this post on Instagram
پرانجلی نے جب اپنے مطلوبہ پیزا کے بارے میں گا کر بتایا، تو فون پر موجود شخص نے ان کا نام پوچھا، پرانجلی نے کہا کہ وہ ’ہندوستان کی پسندیدہ‘ نیہا ککڑ ہیں اور کال کاٹنے سے پہلے اپنا شہر ممبئی اور علاقہ اندھیری بتایا۔
واضح رہے کہ نیہا ککڑ نے 4 سال کی کم عمر میں بطور پرفارمر اپنے کیریئر کا آغاز کیا تھا، اور وہ یوٹیوب پر 4.2 ارب آرا کے ساتھ سب سے زیادہ دیکھی جانے والی خواتین فن کاروں میں سے ایک بن گئیں۔
