کراچی : ایم کیو ایم، پی ایس پی اور ڈاکٹر فاروق ستار کے آپس میں انضمام کا فارمولہ طے پا گیا اور بلدیاتی انتخابات میں بھی بھرپور تیاری سے اترنے کا فیصلہ کیا گیا۔
تفصیلات کے مطابق ایم کیو ایم، پی ایس پی اور ڈاکٹر فاروق ستار کے آپس میں انضمام کا فارمولہ طے پا گیا، اس بات کا فیصلہ گورنر ہاؤس کراچی میں گورنر سندھ سے ایم کیو ایم پاکستان، پی ایس پی اور تنظیم بحالی کمیٹی کے رہنماؤں کے اجلاس میں ہوا۔
ذرائع کا کہنا ہے کہ اجلاس میں بلدیاتی انتخابات میں بھی بھرپور تیاری سے اترنے کا فیصلہ کیا گیا ہے ، جس میں پی ایس پی اور فاروق ستار کے امیدوار ایم کیو ایم کے حق میں دستبردار ہوکر ان کے لیے مہم چلائیں گے۔
ذرائع نے بتایا کہ ایم کیو ایم پاکستان، پی ایس پی اور تنظیم بحالی کمیٹی کے سربراہوں نے پہلے گورنر سندھ سے ون آن ون ملاقات کی، جس میں الیکشن کمیشن کے فیصلے پر شدید تحفظات کا اظہار کیا۔
گورنرنے یقین دلایا کہ وہ جلد وفاقی حکومت سے اس پر بات کریں گے، جس کے بعد مشترکہ اجلاس میں تمام اراکین کو فیصلوں پر اعتماد میں لیا گیا۔
ذرائع کے مطابق آئندہ چند روز میں ڈاکٹر فاروق ستار اور مصطفی کمال اپنے کارکنان اور رہنماؤں کے ہمراہ ایم کیو ایم میں شامل ہوجائیں گے۔
اجلاس میں بلدیاتی انتخاب ایک نشان اور ایک پرچم کے تحت لڑنے کے لیے حکمت عملی بھی ترتیب دی گئی ہے ، اجلاس میں گیارہ جنوری کو الیکشن کمیشن کے سامنے بھرپور احتجاج ریکارڈ کرانے پر اتفاق کیا گیا ہے۔
