اسلام آباد: وفاقی وزیر مراد سعید کا کہنا ہے کہ آصف زرداری نے سیکورٹی کے نام پر 163 ارب روپے خرچ کیے، جاتی امرا کی سیکورٹی پر 214 کروڑ روپے خرچ کیے گئے۔
تفصیلات کے مطابق وفاقی وزیر مواصلات مراد سعید نے میڈیا سے گفتگو کرتے ہوئے کہا کہ ملک میں 10سالوں میں 24 ہزار ارب روپے قرضہ لیا گیا، سابق وزرائے اعظم کے اخراجات قابل قبول نہیں تھے، سابق حکومت ملک کو قرضوں کی دلدل میں پھنسا کر گئی۔
مراد سعید کا کہنا تھا کہ یوسف رضا گیلانی نے 5 کیمپ آفس بنا رکھے تھے، شہباز شریف نے 5 کیمپ آفس بنائے ہوئے تھے، آصف زرداری نے 3 کیمپ آفس بنا رکھے تھے، سابق صدر نے سیکورٹی کے نام پر 163 ارب روپے خرچ کیے۔
وفاقی وزیر کا کہنا تھا کہ جاتی امرا کی سیکورٹی پر 214 کروڑ روپے خرچ کیے گئے، جاتی امرا کی دیوار پر 27 کروڑ روپے خرچ ہوئے، شریف خاندان کی سیکورٹی پر 2 ہزار 753 اہلکار مامور تھے۔
مراد سعید کا کہنا تھا کہ بیرون ملک علاج کے لیے نواز شریف خصوصی طیارے پر گئے، نواز شریف نے لندن کے 55 نجی دورے پر کیے۔ انہوں نے کہا کہ نواز شریف کے جہاز کو 556 بار شہباز شریف نے استعمال کیا۔
وفاقی وزیر کے مطابق گزشتہ 10 سال میں 24 ہزار ارب قرضہ لیا گیا، سابق حکومت تمام ادارے خسارے میں چھوڑ کر گئی، ایک ماہ میں سارا پیسہ ان سے ریکور کریں گے۔
