دبئی: متحدہ عرب امارات میں منعقد ہونے والے فٹنس چلینج فیسٹیول میں ساڑھے چار ہزار بچوں نے شرکت کر کے بڑا اعزاز اپنے نام کرلیا۔
میڈیا رپورٹ کے مطابق دبئی پارک اینڈ ریزورٹس میں کے ایچ ڈی اے اور محکمہ تعلیم کی جانب سے ملک کے سب سے بڑے فٹنس چیلنج کا انعقاد کیا گیا۔رپورٹ کے مطابق کیمپ میں مختلف اسکولوں سے تعلق رکھنے والے ساڑھے چار ہزار سے زائد بچوں نے حصہ لیا اور ٹرینرز کی ہدایت پر مختلف ورزشیں کیں۔
کیمپ میں حصہ لینے والے بچوں نے مختلف کھیلوں اور ورزش کے ساتھ پش اپس کی مشق بھی کی۔
بعد ازاں منتظمین کی جانب سے شرکا کو موٹینوگیٹ اور تھیم پارک کا دورہ کروایا گیا جہاں انہوں نے تفریح کی اور جھولوں سے لطف اندوز ہوئے۔ طلب علموں نے ہالی ووڈ سے متاثر ہوکر قائم ہونے والے پارک کے مختلف حصوں کو دیکھا جبکہ وہاں پر گاڑیاں بھی چلائیں۔
یاد رہے کہ دبئی میں آئندہ برس دبئی ایکسپو کے نام سے بین الاقوامی نمائش کا انعقاد کیا جارہا ہے، ایکسپو کو کامیاب بنانے کے لیے متحدہ عرب امارات کے حکام کی جانب سے مختلف اقدامات بھی کیے جارہے ہیں۔
