آئی سی سی چیمپئنز ٹرافی کا میلہ شروع ہونے میں صرف تین دن باقی رہ گئے ہیں اس میگا ایونٹ میں پاکستان کا ریکارڈ روایتی حریف بھارت پر حاوی ہے۔

یوں تو آئی سی سی ایونٹس میں مجموعی طور پر بھارت کی کارکردگی پاکستان سے بہتر ہے تاہم آئی سی سی چیمپئنز ٹرافی میں یہ معاملہ بالکل الٹ ہے اور منی ورلڈ کپ کے نام سے مشہور اس شوپیس ایونٹ میں گرین شرٹس کا ریکارڈ روایتی حریف کے مقابلے میں بہتر ہے۔

دونوں ممالک کے شائقین کرکٹ 8 سال قبل آئی سی سی چیمپئنز ٹرافی 2017 کا فائنل کبھی نہیں بھلا پائیں گے جس میں پاکستان نے بھارت کو چاروں شانے چت کرتے ہوئے 180 رنز کے بڑے مارجن سے فتح حاصل کر کے پہلی بار چیمپئن بننے کا اعزاز حاصل کیا تھا۔

اگر مجموعی طور پر آئی سی سی چیمپئنز ٹرافی کے پاک بھارت مقابلوں پر نظر دوڑائی جائے تو دونوں روایتی حریف اب تک پانچ بار ایک دوسرے کے خلاف میدان میں صف آرا ہوئے ہیں اور ان میں سے تین بار گرین شرٹس فاتح بن کر باہر آئی جب کہ دو بار فتح نے بھارت کے قدم چومے۔

آئی سی سی چیمپئنز ٹرافی پہلی بار 1998 میں منعقد ہوئی تھی لیکن بھارت اور پاکستان کو اپنے پہلے میچ کے لیے 2004 تک انتظار کرنا پڑا تھا۔

انگلینڈ میں کھیلی گئی چوتھی چیمپئنز ٹرافی میں دونوں ٹیمیں پہلی بار آمنے سامنے آئیں۔ پاکستان نے یہ میچ 3 وکٹوں سے جیت لیا۔ اس کے بعد 2009 میں بھی پاکستان نے بھارت کو 54 رنز سے شکست دی تھی۔

بھارت نے 2013 میں چیمپئنز ٹرافی میں پاکستان کے خلاف پہلی فتح حاصل کی تھی۔ برمنگھم میں کھیلا گیا یہ میچ بھارت نے 8 وکٹوں سے جیت لیا۔

2017 میں کھیلی گئی چیمپئنز ٹرافی میں بھارت اور پاکستان دو بار آمنے سامنے ہوئے۔ بھارت نے گروپ میچ میں پاکستان کو 124 رنز سے شکست دی تھی۔ اس کے بعد فائنل میں دونوں ٹیمیں مدمقابل ہوئیں۔ پاکستان نے فائنل میں بھارت کو 180 رنز سے شکست دے کر نہ صرف ٹائٹل اپنے نام کیا بلکہ اپنی پچھلی شکست کا بدلہ بھی لے لیا۔

اب ایک بار پھر دونوں ٹیمیں 23 فروری کو دبئی اسٹیڈیم میں چیمپئنز ٹرافی کے مقابلے میں ٹکرانے والی ہیں اور دونوں ٹیموں میں 2017 کی فائنلسٹ ٹیموں کے کئی کھلاڑی شامل ہیں۔

چیمپئنز ٹرافی کی کمنٹری کتنی زبانوں میں نشر ہوگی؟

چیمپئنز ٹرافی کے انعقاد کا وقت جیسے جیسے قریب آ رہا ہے شائقین کا تجسس بڑھتا جا رہا ہے وہ کرکٹ کے اس میلے سے متعلق ہر خبر جاننے کے لیے بے چین ہیں۔

آئی سی سی چیمپئنز ٹرافی کا آغاز 19 فروری سے ہو رہا ہے۔ پاکستان میزبان ملک ہونے کے ساتھ دفاعی چیمپئن ہے۔ ٹورنامنٹ میں روایتی حریف بھارت، آسٹریلیا، انگلینڈ، نیوزی لینڈ، جنوبی افریقہ، افغانستان اور بنگلہ دیش کی ٹیمیں شرکت کر رہی ہیں۔

بھارت اپنے تمام میچز ہائبرڈ ماڈل کے تحت دبئی میں کھیل رہا ہے۔ اس میگا ایونٹ کی کمنٹری بھارت میں براہ راست 9 مختلف زبانوں میں نشر کی جائے گی۔

بھارتی میڈیا کے مطابق آئی سی سی کی جانب سے باضابطہ طور پر اعلان کیا گیا کہ چیمپئنز ٹرافی کی لائیو اسٹریمنگ بھارت میں مجموعی طور پر 9 زبانوں میں ہو گی۔

لائیو ٹی وی اسٹریمنگ اور ٹی وی چینلز پر میچز کی براہ راست نشریات کے دوران ہندی اور انگریزی کے علاوہ مراٹھی، ہریانوی، بنگالی، بھوجپوری، تامل، تیلگو اور کنڑ زبانوں میں کمنٹری براہ راست نشر کی جائے گی تاکہ شائقین ملٹی کیم فیڈ سے بھی لطف اندوز ہو سکیں گے۔

’بھارت سے میچ ہار جاؤ تو گھر والے بھی فون نہیں کرتے‘

چیمپئنز ٹرافی کے پاک بھارت میچ کا بخار سابق کرکٹرز پر بھی سوار ہو گیا ہے دونوں ممالک کے سابق کرکٹرز نے دلچسپ گفتگو کی ہے۔

آئی سی سی چیمپئنز ٹرافی کے آغاز میں صرف تین دن باقی رہ گئے ہیں۔ 19 فروری کو کراچی کے نیشنل اسٹیڈیم میں میزبان اور دفاعی چیمپئن پاکستان اور نیوزی لینڈ کے درمیان افتتاحی میچ کھیلا جائے گا۔

تاہم شائقین کرکٹ کو سب سے زیادہ انتظار 23 فروری کو دبئی میں ہونے والے روایتی حریفوں پاکستان اور بھارت کے مقابلے کا ہے۔ اس بڑے مقابلے کا وقت جیسے جیسے قریب آ رہا ہے۔ عام شائقین پر کرکٹ کے ساتھ ساتھ دونوں ممالک کے سابق کرکٹرز بھی اس بخار کا شکار ہو رہے ہیں۔

ایک نجی ٹی وی پروگرام میں دونوں ممالک کے سابق کرکٹرز شاہد خان آفریدی، انضمام الحق، نوجوت سنگھ سدھو اور یوراج سنگھ شریک تھے اور موضوع گفتگو پاکستان اور بھارت میچز تھے۔

پاکسان کے سابق کپتان اور اور ون ڈے میں پاکستان کے سب سے کامیاب بلے باز انضمام الحق نے کہا کہ پاکستان اور بھارت کے میچوں میں سنسنی اتنی زیادہ ہوتی ہے کہ اگر ہم بھارت سے میچ ہار جاتے تو گھر والے بھی فون نہیں کرتے تھے۔

سابق بھارتی اوپنر نوجوت سنگھ سدھو نے کہا کہ پاک بھارت میں اتنا کرکٹ ٹیلنٹ موجود ہے کہ اگر ساتھ مل کر کھیلیں تو دنیا فتح کر لیں، اس پر یوراج سنگھ نے مزاحیہ انداز میں کہا کہ پھر تو ہمیں جگہ ہی نہیں ملتی۔

سابق قومی کپتان شاہد خان آفریدی نے چیمپئنز ٹرافی کے لیے دونوں ممالک کے اسکواڈز کا تقابل پیش کرتے ہوئے کہا کہ اس وقت بھارتی ٹیم میں میچ ونرز زیادہ ہیں۔

چیمپئنز ٹرافی کی رونمائی تقریب آج لاہور میں ہو گی