برصغیر کی تاریخ میں جہاں تقسیمِ ہند وہ موضوع ہے جسے ایک نہایت ہنگامہ خیز جدوجہد کے اختتام پر ایک عظیم ہجرت اور ناقابلِ‌ فراموش یادوں کے تسلسل میں ہر دور میں ضبطِ تحریر میں‌ لایا جاتا رہے گا اور محمد علی جناح کا نام ایک عظیم سیاسی لیڈر کے طور پر ہمیشہ لیا جاتا رہے گا۔

پاکستان ہی نہیں‌ بلکہ تاریخِ عالم میں محمد علی جناح صرف ہندوستان کی سیاست کا ایک ناقابلِ فراموش کردار ہی نہیں‌ ہیں‌ بلکہ ان کی کرشماتی شخصیت بھی اکثر زیرِ بحث رہتی ہے۔ اور بانیِ پاکستان کی نفاست پسندی اور خوش پوشاکی ضربُ المثل رہی ہے۔

اس دور کے مسلمان قائدین اور محمد علی جناح کے رفقاء ہی نہیں کانگریس کے بڑے بڑے نام اور سیاسی راہ نما کے ساتھ ساتھ انگریز وائسرائے بھی قائد اعظم سے متاثر ہوئے اور ان کی نفاست پسندی کے معترف رہے ہیں۔

یہاں ہم لارڈ چمسفورڈ اور لارڈ ہارڈنگ کا تذکرہ کر رہے ہیں جنھوں نے محمد علی جناح کی نفاست پسندی اور جامہ زیبی کا کئی مواقع پر اعتراف کیا۔ لارڈ چمسفورڈ ہندوستان کے وائسرائے بھی رہے ہیں۔ ہندوستان میں برطانوی دور کے ایک اور منتظم لارڈ ریڈنگ تھے جن کی اہلیہ نے اپنی والدہ کے نام ایک خط میں مسلمانانِ ہند کے عظیم لیڈر کا تذکرہ ان الفاظ میں کیا: ’’بمبئی کے جواں سال وکیل جناح کو عموماً خوش لباسی اور جامہ زیبی میں لائیڈ جارج تصور کیا جاتا ہے۔‘‘

اگر بات کی جائے ہندوستان کے عام مسلمانوں کی تو وہ روایتی ملبوس اور اس دور کی قدروں کو اہمیت دیتے تھے۔ یہاں کے مسلمان کپڑے کی بنی ہوئی ٹوپی سے سَر ڈھانپتے تھے جسے شرافت اور تہذیب کی علامت سمجھا جاتا تھا۔ جب سلطنتِ عثمانیہ اور تحریکِ خلافت کا شہرہ ہوا تو ان کی اکثریت نے مذہبی ہم آہنگی کی بنیاد پر اپنے لباس میں ترکی ٹوپی کو بھی شامل کرلیا۔

قائدِ اعظم لندن میں اور دورِ وکالت میں ہمیشہ کوٹ، پتلون، ٹائی اور فلیٹ ہیٹ ہی استعمال کرتے رہے، لیکن بعد میں مسلم لیگ کے راہ نما اور تحریکِ آزادی کے اس عظیم قائد نے اچکن اور تنگ پاجامہ، شیروانی جیسے ملبوس کے ساتھ ایک مخصوص ٹوپی پہننا شروع کی اور جلسوں اور مختلف تقاریب میں‌ اسی لباس میں شریک ہونے لگے۔ مسلمانوں نے اپنے قائد کے اس انداز کو بہت پسند کیا اور قائدِ‌اعظم کی وہ قراقلی ٹوپی عوام میں اتنی مقبول ہوئی کہ سب اسے جناح کیپ کہنے لگے۔

یہ ٹوپی دراصل دنبے کی ایک خاص نسل قراقلی کی کھال سے تیّار کی جاتی ہے اور اسی سے موسوم ہے۔ اس جانور کی یہ مخصوص کھال افغانستان اور بیرونِ ملک سے منگوا کر متحدہ ہندوستان اور تقسیم کے بعد پاکستان میں بھی قراقلی ٹوپی کی تیّاری کے لیے استعمال کی جاتی رہی، لیکن وقت کے ساتھ اس کا رواج ختم ہو گیا۔

بانیِ پاکستان محمد علی جناح سے اپنی والہانہ محبّت اور ان سے عقیدت و احترام کے اظہار کے لیے اس دور میں ہندوستانی مسلمانوں کی اکثریت جناح کیپ پہن کر جلسوں اور تقاریب میں شریک ہوتی تھی۔

بڑے لوگوں کی باتیں اور مقاصد بھی بڑے ہوتے ہیں اور وہ کسی بھی معاشرے کے لیے اپنے قول و فعل سے ایک مثال بنتے ہیں۔ بڑا آدمی جب اپنے مقصد کی تکمیل اور منزل کے لیے عملی کوشش شروع کرتا اور پختہ ارادے کے ساتھ آگے بڑھتا ہے تو کام یابی اس کے قدم چومتی ہے۔

آج بانی پاکستان قائدِ اعظم محمد علی جناح کا یومِ‌ پیدائش منایا جارہا ہے، لیکن جس جوش و جذبہ سے ہم بابائے قوم کو یاد کرتے ہیں، یہ بھی ضروری ہے کہ ہم قائد اعظم کے افکار و خیالات اور اس وطن کے حصول کے لیے ان کے عزم و استقلال، جرأت و اعتماد، دیانت داری، خلوص اور بلند حوصلگی کو اپنے لیے مثال بھی بنائیں اور انہی اوصاف کو اپنا کر انفرادی اور اجتماعی ترقی و خوش حالی کا راستہ ہموار کریں۔ یہاں ہم بابائے قوم محمد علی جناح کی زندگی کے پانچ ادوار پر نظر ڈالتے ہیں۔

بلاشبہ اس دور میں ہندوستان کی سیاست میں‌ قدم رکھنا، خاص طور پر مسلم لیگ کی قیادت کرتے ہوئے الگ وطن کے حصول کی جدوجہد کرنا قائد اعظم کی زندگی کا نہایت ہنگامہ خیز دور تھا۔ یوں تو نوجوان محمد علی جناح کی تعلیمی میدان میں کام یابیوں، بطور وکیل پیشہ ورانہ سفر اور پھر سیاسی سفر پر بہت کچھ لکھا گیا ہے، لیکن جب ہم اپنے قائد کے تعلیمی دور سے لے کر ان کی جدوجہد تک ایک مختصر جائزہ لیں تو اس میں بہت سے اہم باتیں سامنے آتی ہیں جن کا نوجوان نسل کو علم ہونا چاہیے۔

محمد علی جناح کی زندگی کے پہلے دور کو 20 برسوں پر محیط کہا جاسکتا ہے۔ یہ زمانہ تھا 1876ء سے 1896ء تک کا، جب انھوں نے تعلیم پائی اور انگلستان میں بیرسٹری کا امتحان پاس کیا۔

اس کے بعد اگلے دس سال یعنی 1896ء سے لے کر 1906ء تک کے عرصے میں انھوں نے مکمل یک سوئی اور محنت سے وکالت میں اپنی لیاقت کا لوہا منوایا۔

مؤرخین اور سوانح و خاکہ نگار محمد علی جناح کے تیسرے دور کو 1906ء سے 1916ء تک دیکھتے ہیں، جب وہ زیادہ تر کانگریس کے پلیٹ فارم سے متحرک رہے۔

قائدِ اعظم محمد علی جناح کی زندگی کا چوتھا دور بھی 20 سال پر محیط ہے اور یہ 1916ء سے 1936ء کا زمانہ ہے۔ اس میں بانی پاکستان نے کانگریس، لیگ اور ہندوؤں اور مسلمانوں کے درمیان بڑی مستقل مزاجی اور حوصلے سے مفاہمت کی کوششیں جاری رکھیں۔

پانچواں دور 1937ء سے شروع ہوتا ہے اور یہ ان کی وفات تک یعنی 1948ء تک کا ہے۔ اس دور کے ابتدائی برسوں میں محمد علی جناح نے وکالت چھوڑ کر اپنی تمام تر توجہ مسلمانانِ ہند کے اتحاد اور تنظیم پر مرکوز کردی اور پاکستان کے حصول کے لیے دن رات ایک کردیا تھا۔ بعد کے برسوں میں وہ پاکستان کے قیام کی جدوجہد میں بے حد مصروف ہوگئے اور قیامِ پاکستان کے بعد پہلے گورنر جنرل کی حیثیت سے کام کرتے رہے۔ 11 ستمبر 1948ء کو وہ اس دارِ فانی سے رخصت ہوئے۔

قائدِاعظم کی زندگی کے ان ادوار پر غور کیا جائے تو معلوم ہوگا کہ وہ ہمیشہ کسی نہ کسی مقصد اور نصبُ العین کے حصول کے لیے مصروفِ کار رہے۔

قائداعظم سے 21 جون 1937ء کو شاعرِ مشرق علّامہ اقبال نے کہا تھا: ’’ہندوستان میں صرف آپ ہی ایک ایسے مسلمان لیڈر ہوسکتے ہیں جو اپنی قوم کو اس طوفان سے، جو ان پر آنے والا ہے، بچاسکتا ہے۔ اس لیے قوم کو حق ہے کہ وہ آپ سے راہ نمائی کی امید رکھے۔‘‘

قائدِ اعظم قوم کے اس حق اور اپنے فرض کو بخوبی پہچان چکے تھے اور کانگریس سے تعلق توڑنے اور وکالت ترک کرنے کے بعد اپنی تمام زندگی حصولِ پاکستان کی جدوجہد میں گزار دی اور مسلمانوں کی قربانیوں‌ کا صلہ ہمیں آزادی کی صورت میں ملا۔