ایلف شفق ترکی اور انگریزی زبان کی مشہور ناول نگار ہیں جن کی کئی کتابیں‌ اشاعت کے بعد قارئین میں مقبول ہوچکی ہیں۔ ’فورٹی رولز آف لو‘(Forty rules of love) انہی میں‌ سے ایک ہے اور اسے ایلف شفق کا بہترین ناول شمار کیا جاتا ہے۔ مصنفہ نے اس ناول میں مولانا جلال الدین رومی کی شمس تبریز سے عقیدت، گہری وابستگی اور تصوف کو خوب صورتی سے پیش کیا ہے۔

اس ناول میں ایلف شفق نے آٹھ سو سال قدیم کرداروں یعنی رومی اور شمس میں‌ عقیدت اور اُنس کو اکیسویں صدی کے ایک کردار کے ذریعے دل چسپ انداز میں پیش کیا ہے۔

ایلف شفق کا مختصر تعارف کرواتے ہوئے ہم اس ناول کی طرف بڑھیں گے۔ مصنفہ 25 اکتوبر 1971ء کو فرانس میں پیدا ہوئیں۔ ان کا آبائی وطن ترکیہ ہے، اور والدین میں علیحدگی کے بعد ایلف شفق اپنی والدہ کے ساتھ رہنے لگیں۔ ناول نگار ایلف شفق کی تعلیم کے مختلف مدارج اسپین، امریکا اور برطانیہ میں طے ہوئے۔ فورٹی رولز آف لو کا متعدد زبانوں‌ میں ترجمہ ہوا جن میں اردو بھی شامل ہے۔

’فورٹی رولز آف لو‘ دراصل مولانا روم کی روحانی وابستگی اور مرشد سے عقیدت کے ساتھ ان کی گوشہ نشینی اور شاعری کو بیان کرتا ہے لیکن اس میں‌ ایک ایسی خاتون کی کہانی بھی بیان کی گئی ہے جو آسائش اور ہر قسم کی آسانی کے باوجود اطمینان و تسکینِ قلب سے محروم ہے اور اسی دوران وہ ایک شخص سے آشنا ہوتی ہے جو اسے شمس تبریز جیسے خیالات و احساسات کا مالک دکھائی دیتا ہے۔ یہ خاتون اس کی شخصیت کے سحر میں گرفتار ہوجاتی ہے اور اپنے خاندان اور تعلقات کو ترک کرکے راہِ عشق میں بے اختیار نکل پڑتی ہے۔ اس ناول کی خاص بات جو اکثر قارئین کے لیے اہم ہے وہ شمس تبریز کے مشہور چالیس اصول ہیں‌ جنھیں‌ ایلف شفق نے ناول کے مختلف کرداروں کے ساتھ جوڑ کر کہانی کو ایک خاص تصورِ حیات اور روحانیت کی طرف دھکیلا ہے۔ صرف اتنا نہیں بلکہ ناول میں خاص طور پر افسانوی ناموں پر مشتمل کرداروں کو شامل کرکے مصنفہ نے صوفی ازم کو بہت خوب صورتی سے پیش کیا ہے۔ خیال کیا جاتا ہے کہ ناول کسی قاری کی زندگی میں فکری اور روحانی طور پر تبدیلیاں لانے کا باعث بن سکتا ہے۔

کہتے ہیں کہ 1244ء میں مولانا رومی کا شمس تبریز سے سامنا ہوا تو رومی 37 برس اور شمس تبریز 60 سال کے تھے۔ اس ملاقات کا احوال مصنفہ نے انتہائی دل چسپ پیرائے میں بیان کیا ہے۔ صوفی شمس تبریز نے قونیہ میں مولانا روم کے علم و حکمت کے چرچے سنے تھے اور انھیں بھی ان ملنے کا اشتیاق ہوا۔

محبت کے چالیس اصول دراصل رومی کے عالم سے عاشق بننے کی داستان سناتے ہیں۔ یہ اپنے ظاہر سے اندروں کا سفر ہے جس میں اپنے روحانی استاد اور مرشد شمس تبریز کی قربت اور پھر جدائی میں رومی درویش بن گئے اور اپنی شاعری سے لازوال شہرت حاصل کی۔ اگر ہم ایلف شفق کے ناول کی مدد سے ان چالیس اصولوں کو سمجھنا چاہیں‌ تو اس میں کئی حکیمانہ اور مبنی بر تصوف باتیں پڑھنے کو ملیں گی کہ خدا کی قدرت کی نشانیاں ہر جانب موجود ہیں، اور خدا کی ذات کسی ایک جگہ محدود نہیں، اسے ڈھونڈنا ہو، تو کسی کامل عاشق کے دِل میں تلاش کرو۔ حقیقی ایمان دل کی پاکیزگی سے مشروط ہے اور نفرت اور غرور وہ بدترین چیز ہیں جنھیں دنیا کا پاک ترین پانی بھی صاف نہیں کر سکتا۔ اور سب سے بڑا نکتہ جو صوفیا اور خانقاہی دستور رہا ہے وہ یہ بیان کیا گیا ہے کہ دل کی پاکیزگی کے لیے محبّت کرنا ضروری ہے اور یہی محبّت انسان کو معراج عطا کرتی ہے۔

ناول نگار ایلف شفق نے شمس تبریز اور مولانا روم کے روحانی تعلق اور انس و لگاؤ کو صوفی ازم کا وہ فلسفہ پیش کیا ہے جو انسانوں سے محبّت کرنا سکھاتا ہے۔ کہتے ہیں‌ کہ مولانا روم اپنے مرشد اور روحانی استاد کے فراق میں ڈوب کر گوشہ نشیں ہوگئے اور ایسے اشعار کہے جن میں درد اور سوز نے سبھی کے دل پگھلا دیے۔ مولانا روم اور ان کی شاعری آج بھی زندہ و تابندہ ہے۔ مولانا روم نے 1273ء میں وفات پائی اور اُن کا مزار قونیہ میں موجود ہے۔

’فورٹی رولز آف لو‘ ایلف شفق کی وہ تصنیف ہے جو بنیادی طور پر ترک زبان میں لکھا گیا تھا اور اس کے تراجم کے بعد یہ دنیا بھر میں مقبول ناول بنا۔

آج پاک و ہند میں‌ کئی ادارے اور گروہی شکل میں‌ بھی لوگ جذبۂ خدمت سے سرشار ہوکر فلاح و بہبود کی سرگرمیوں اور رفاہِ عامّہ کے کاموں‌ میں مشغول نظر آتے ہیں۔ خدمتِ خلق اور انسانیت سے پیار کی عکاسی کرتی کئی تصویریں اور ویڈیوز ہم سوشل میڈیا پر اکثر دیکھتے رہتے ہیں، لیکن بہت کم لوگ جانتے ہیں‌ یا کم از کم نئی نسل کے لیے تو انجمنِ حمایتِ اسلام کا نام بھی نیا ہی ہوگا جسے برِصغیر کی قدیم رفاہی تنظیم اور تعلیمی ادارے کی حیثیت حاصل ہے۔

انجمنِ حمایتِ اسلام کی داغ بیل ایک ایسے نازک وقت میں ڈالی گئی کہ جب 1857ء کی جنگِ آزادی کے بعد متحدہ ہندوستان میں مسلمانوں کی سماجی و معاشی حالت نہایت دگرگوں تھی جب کہ باثروت مذہبی گروہ اپنی حمایت یافتہ تنظیموں کے ذریعے بے بس مسلمانوں کا استحصال کر رہے تھے۔ ان حالات میں یہ انجمن مسلمانوں کے لیے ایک مضبوط سہارا ثابت ہوئی۔

انجمن کا قیام 1884ء میں عمل میں‌ لایا گیا۔ اس وقت اندرونِ لاہور کے موچی دروازے کی مسجدِ بکن خان میں مختصر اجتماع میں انجمن کی تشکیل کا اعلان کیا گیا تو عام لوگوں‌ نے اسے زیادہ اہمیت نہیں دی، لیکن بعد میں‌ ’’انجمنِ حمایتِ اسلام‘‘ کے پلیٹ فارم سے وہ کارنامے انجام دیے گئے جن کی مثال آج بھی دی جاتی ہے۔ کوئی نہیں‌ جانتا تھا کہ اس انجمن سے لاکھوں افراد مستفید ہونے لگیں گے اور یہ تناور درخت بن جائے گی۔ اس انجمن کا مقصد غریب، یتیم اور بے سہارا بچوں اور عورتوں‌ کی کفالت اور ان کی دینی و دنیوی تعلیم تھا۔ ادارے کے زیرِ انتظام کئی اسکول، کالج اور یتیم خانے، پناہ گاہیں، غذائی اجناس و اشیاء کی تقسیم کے کام ہوئے۔ کئی قد آور علمی و ادبی شخصیات بھی اس انجمن سے وابستہ رہی ہیں جن میں علامہ اقبال بھی شامل تھے۔

شاعرِ مشرق علاّمہ محمد اقبال کی انجمن سے وابستگی اس ادارے کی تاریخ کا بھی ایک اہم باب ہے۔ اس بابت ’’روزگار فقیر‘‘ میں سیّد وحید الدّین لکھتے ہیں کہ ’’علاّمہ اقبال، انجمنِ حمایتِ اسلام، لاہور کو مسلمانوں کی تعلیم و تنظیم اور اشاعتِ دین کا موزوں پلیٹ فارم اور ذریعہ سمجھتے تھے۔ اس لیے اس کے ساتھ ایک بار جو تعلق قائم ہوا، اُسے مرتے دم تک منقطع نہیں ہونے دیا۔ انہوں نے پہلی بار انجمن کے جلسے میں اپنی مشہور نظم، ’’نالۂ یتیم‘‘ پڑھی۔ پہلے انجمن کے جنرل سیکریٹری کے طورپر فرائض انجام دیے۔ اس کے بعد انہیں انجمن کا صدر مقرّر کیا گیا۔ شدید علالت کے سبب انہیں صدارت سے مستعفی ہونا پڑا، لیکن اس سے قبل اُن کی یہ کیفیت رہی کہ کمزوریٔ بصارت کے سبب پڑھنے میں دقّت ہوتی تو انجمن کے کاغذات پڑھوا کر سنتے اور ان پر نوٹ اور ضروری احکام لکھوا کر دست خط کرنے کے بہ جائے اپنے نام کی مہر لگواتے۔

انجمن کے جلسوں میں پابندی کے ساتھ شرکت کرتے۔ انجمن کے جلسوں میں اپنی تازہ نظمیں پڑھنا، اُن کا معمول تھا۔ انجمن کو یہ فخر حاصل ہے کہ اس کے پلیٹ فارم سے حکیمِ مشرق نے بارہا اپنی نظمیں پڑھیں۔ انہوں نے اپنی شہرۂ آفاق نظم ’’شکوہ‘‘ بھی انجمن کے سالانہ اجلاس میں پڑھی۔ 1936ء میں انجمن کی سالانہ کانفرنس میں شریک ہوئے، مگر خرابیٔ صحت اس حد تک پہنچ گئی تھی کہ خود نظم سنانے کے قابل نہ تھے۔

ان کی یہ نظم جس کا پہلا مصرع’’؎ خودی کا سِرّ نہاں لا الہ الا اللہ‘‘ ہے، ایک اور صاحب نے پڑھ کر سنائی۔ وہ انجمن کی فلاح و بہبود کی سرگرمیوں میں بھی باقاعدگی سے حصہ لیتے رہے۔ انہوں نے انجمن کے ساتھ اپنے تعلق کو جس طرح قائم رکھا اور آخری دم تک نبھایا، وہ اُن کے کردار کا ایک نمایاں اور سبق آموز پہلو ہے۔ انتقال سے قبل اپنی وصیّت میں انہوں نے اپنا ذاتی کتب خانہ انجمن کے قائم کردہ اسلامیہ کالج کی لائبریری کو عطیے کے طور پر دینے کی ہدایت کی، کیوں کہ یہی کتابیں اُن کا زندگی بھر کا سرمایہ اور اثاثہ تھیں۔‘‘