آزاد کشمیر کے علاقے کوٹلی میں جنگلی سؤروں نے دیہاتی علاقوں کے ساتھ ساتھ اب شہروں کا رُخ کرنا بھی شروع کر دیا ہے۔

اے آر وائی نیوز مطابق آزاد کشمیر کے علاقے کوٹلی میں جنگلی سؤروں نے دیہاتی علاقوں کے ساتھ ساتھ اب شہروں کا رخ بھی کرنا شروع کر دیا ہے اور ماہ جنوری میں یہ جانور اب تک 12 سے زائد شہریوں کو زخمی کر چکے ہیں۔

جنگلی سؤروں کے آزادنہ شہروں میں نقل وحرکت پر شہریوں میں شدید خوف وہراس پایا جاتا ہے اور انہوں نے حکام سے اس کے تدارک کی اپیل بھی کی ہے۔

گزشتہ روز بھی نکیال میں جنگل سؤر آبادی میں دیکھے گئے اور کوٹلی شہر کے مرکز میں کچہری کے ساتھ گلیوں میں یہ جانور آزادانہ مٹر گشت کرتے پائے گئے ہیں۔

محکمہ وائلڈ لائف نے جنگلی سوروں سے پچنے کے لیے صرف ایس او پیز جاری کی ہیں لیکن ان سے عوام کے تحفظ کے لیے کوئی عملی اقدامات نہیں کیے ہیں۔

حکومت آزاد کشمیر جنگلی سؤروں کی بڑھتی ہوئی تعداد کے خاتمہ کے لیے اپوزیشن لیڈر خواجہ فاروق کی اسمبلی میں پیش کی گئی قرار داد پر 7 رکنی ٹیم تشکیل دے چکی ہے۔ تاہم یہ حکومتی کمیٹی بھی تدارک کے لیے اب تک کوئی عملی قدم نہیں اٹھا سکی ہے۔

اسلام آباد : جسٹس عائشہ ملک کی کسٹم ریگولیٹر ڈیوٹی کیس سننے سے معذرت سے متعلق وجوہات سامنے آگئیں۔

تفصیلات کے مطابق جسٹس عائشہ ملک نے کسٹم ریگولیٹر ڈیوٹی کیس سننے سے معذرت کے بعد تحریری وجوہات جاری کردیں۔

جس میں کہا گیا کہ بحیثیت جج ہمیں عدالتی ،انتظامی احکامات میں واضح فرق کوبرقرار رکھنا چاہیے، عدالتی احکامات کی تقدس کو محفوظ اور برقرار رکھنا چاہیے۔

تحریری وجوہات میں بتایا گیا کہ ہمیں یہ یقینی بنانا چاہیے کہ ہمارے احکامات پرعمل ہو، ہمارے احکامات کی کسی کے ذریعے نظر انداز یا خلاف ورزی نہ کی جائے۔

جسٹس عائشہ نے کہا کہ کیس نہیں سننا چاہتی تاکہ 16جنوری کےعدالتی حکم کاتقدس محفوظ رہے، 16 جنوری کو یہ کیسز تین رکنی بینچ کے سامنے مقرر کئے گئے تھے، کیس میں بینچ کے دائرہ اختیار کے بارے میں سوال اٹھایاگیا، یہ بینچ آئین کی 26ویں ترمیم کے تحت آئینی بینچ نہیں تھا۔

ان کا کہنا تھا کہ عدالت نے کمیٹی سے بینچ کی دوبارہ تشکیل کا حکم دیا، بینچ دوبارہ تشکیل دینےکےبجائےواپس لیکرآئینی بینچ کمیٹی کےسامنےرکھنےکاحکم دیاگیا۔

جسٹس عائشہ نے مزید کہا کہ آئینی بینچ کمیٹی نے17جنوری کی میٹنگ میں ان کیسز کو27 جنوری کیلئےمقرر کیا، دونوں کمیٹیوں نے 16جنوری کے عدالتی حکم کو نظرانداز کیا۔

اسلام آباد : سینیٹ میں ڈیجیٹل نیشن پاکستان بل 2025 کثرت رائے سے منظور کر لیا گیا ، اب منظوری کیلئے صدر کو بھجوایا جائے گا۔

تفصیلات کے مطابق وزیر قانون اعظم نذیر تارڑ نےڈیجیٹل نیشن پاکستان بل 2025 سینیٹ میں پیش کردیا۔

بل کی شق وار منظوری لی گئی ، اس دوران ایوان میں اپوزیشن نے نعرے لگائے اور شور شرابہ کیا۔

کامران مرتضیٰ نے کہا اس بل پر میرے اعتراضات ہیں ،یہ صوبائی اختیارات میں مداخلت ہے۔

کامران مرتضیٰ نے اپنی ترامیم پیش کیں تاہم سینیٹ میں کامران مرتضیٰ کی ترامیم مسترد کر دی گئیں۔

مزید پڑھیں : حکومت کا ڈیجیٹل نیشن پاکستان بل کیا ہے؟

احتجاج کرنے پر ڈپٹی چیئرمین سینیٹ نے سینیٹر فلک ناز کو ہاؤس سے نکالنے کی تنبیہ کی ، سینیٹر فلک ناز نے کہا کہ ہاؤس کو یرغمال بنا لیا گیا ہے، مذاق بنا ہواہے۔

جس پر سینیٹر اعظم نذیر تارڑ کا کہنا تھا کہ ابھی پیکا ترمیمی بل پر نہیں ڈیجیٹل نیشن پاکستان بل پر بات ہورہی ہے۔

بعد ازاں سینیٹ میں ڈیجیٹل نیشن پاکستان بل 2025 کثرت رائےسےمنظورکرلیا گیا ، اب منظوری کیلئے صدر کو بھجوایا جائے گا۔

گذشتہ روز سینیٹ کی قائمہ کمیٹی برائے انفارمیشن ٹیکنالوجی اور ٹیلی کام نے ڈیجیٹل نیشن پاکستان بل 2025 منظور کیا تھا، اس بل کے حق میں چار اور مخالفت میں دو ووٹ آئے تھے۔