دمشق میں القاعدہ سے تعلق رکھنے والے باغی گروپ کے سربراہ نے شام میں جاری خانہ جنگی کے خاتمے کے لئے حزب اختلاف کے دھڑوں کے درمیان جنگ بندی کی اپیل کی ہے۔

باغی گروپ کےسربراہ ابو محمد گولانی نے اپنے ایک آڈیو ریکارڈڈ پیغام میں شامی صدر بشار الاسد کیخلاف گذشتہ پانچ دن سے جاری خونریز لڑائی کے بعد دونوں دھڑوں کےدرمیان جنگ بندی کی اپیل کر دی۔

حزب اختلاف کی ایک مانیٹرنگ گروپ کے مطابق گذشتہ سال سے تاحال باغی گروپوں کے درمیان جھڑپوں کے نتیجے میں تقریبا دو سو چوہتر افراد جاں بحق ہوچکے ہیں۔

عراق میں پرتشدد کاروائیاں جاری ہیں، فائرنگ کے تازہ ترین واقعے میں سات خواتین سمیت بارہ افراد جاں بحق اور متعدد زخمی ہوگئے۔

  پولیس ذرائع کے مطابق فائرنگ کا واقعہ عراقی دارالحکومت بغداد کے مشرقی علاقے زایونا کے رہائشی اپارٹمنٹ میں پیش آیا، نامعلوم مسلح افراد کی فائرنگ سے سات خواتین سمیت بارہ افرادجاں بحق ہوئے۔

زایونا میں ہونیوالا واقعہ اپنی نوعیت کا دوسراواقعہ ہے، اسپتال ذرائع کے مطابق زخمیوں میں بعض کی حالت نازک بتائی جاتی ہے، جاں بحق افراد میں پانچ مرد اور سات خواتین شامل ہیں۔

فوری طور پر کسی گروپ نے واقعے کی ذمہ داری قبول نہیں کی ہے، عراق میں دو ہزارآٹھ سے تشدد کی لہر جاری ہے تاہم حالیہ چند مہینوں کے دوران تیزی آ گئی ہے۔
   

پینٹاگون کے سابق سربراہ رابرٹ گیٹس نے اوباما کی عراق افغان جنگ کی حکمت عملی پر شدید تنقید کرتے ہوئے انکشاف کیا ہے کہ الیکشن جیتنے کیلئے اوباما نے امریکی عوام اور دنیا کو بے وقوف بنایا۔

امریکی میڈیا کی رپورٹس کے مطابق سابق امریکی سیکیریٹری دفاع اور پینٹاگون کے سابق چیف رابرٹ گیٹس نے اپنی یاداشتوں میں مزید کہا ہے کہ فوج کی جانب سے اختیارات کی فراہمی پر اوبامہ بدظن ہوچکے تھے۔

انہوں نے اس بات کا بھی انکشاف کیا کہ اس میں کوئی شک نہیں کہ اوباما کی پالیسی اور فوج بھیجنے پر میں نے ان کی حمایت کی تھی۔
   

لندن کے نواحی علاقے نورفوک میں امریکی فوجی ہیلی کاپٹر گر کر تباہ ہوگیا، جس کے نتیجے میں چار امریکی ہلاک ہوگئے۔

خبررساں ایجنسی کے مطابق امریکی فضائیہ کا ہاک ہیلی کاپٹر معمول کی پرواز پر تھا کہ فنی خرابی کےباعث گرکر تباہ ہوگیا، امریکی فضائیہ نے ہیلی کاپٹر گرنے اور اہلکاروں کے مارنے جانے کی تصدیق کر دی ہے۔

قانون نافذ کرنیوالے اداروں نےجائے حادثہ کو گھیرے میں لیکر امدادی کاروائیاں شروع کر دیں۔
   

امریکی وزیرخارجہ جان کیری کا کہنا ہے کہ شمالی کوریا کو ایک جوہری ریاست کے طور پرقبول نہیں کریں گے۔

جنوبی کوریا کے وزیرخارجہ کے ساتھ دو طرفہ بات چیت کے بعد مشترکہ نیوز بریفنگ کے دوران انکا کہنا تھا کہ امریکہ سمیت بین الاقوامی برادری شمالی کوریا کے جوہری پروگرام کیخلاف ہیں کیونکہ اس سے خطے میں امن کی سلامتی کونقصان پہنچ سکتا ہے۔

جنوبی کوریا کے وزیر خارجہ کا کہنا تھا کہ جنوبی کوریا پر کسی بھی ممکنہ حملے کی صورت میں امریکہ اس کا جواب دینے کے لیے تیار ہے، ملاقات میں دونوں ممالک نے شمالی کوریا کے ایٹمی پروگرام کی روک تھام کے لیے دوطرفہ تعاون پر زور دیا۔

ترکی میں حکومتی حلقوں پر بدعنوانی کے الزامات سنگین صورتحال اختیار کر گئے، تین سو سے زائد پولیس اہلکاروں کو برطرف کر دیا گیا، اپوزیشن نے بلال اردوان پر بدعنوانی کے بعد القاعدہ کے حامی سے ملاقات کا الزام بھی عائد کر دیا گیا۔

خبر رساں ادارے کے مطابق ان اہلکاروں کو مالیاتی اسکینڈل فاش کرنے کی پاداش میں برطرف کیا گیا، حکومت کو پہلے ہی بدعنوانی کے الزامات کا سامنا ہے اور اب دہشت گردوں سے تعلقات کے الزامات نے ایک نئی مشکل کھڑی کر دی ہے۔

ترکی میں گذشتہ ماہ بدعنوانی کا اسکینڈل سامنے آنے کے بعد اب تک ملک بھر میں سینکڑوں پولیس اہلکاروں کو برطرف یا تبادلہ کیا جا چکا ہے۔

چلی کے صدر سبسٹین پینرا نے کہا ہے کہ چلی اور پیرو سرحدی تنازعہ پر عالمی عدالت انصاف کے حتمی فیصلے کو من و عن تسلیم کرکے دنیا میں امن کی اعلٰی مثال قائم کرسکتے ہیں۔

دارلحکومت سان تیاگو میں چلی کی نو منتخب صدر مشیل بچلیٹ سے ملاقات میں دونوں رہنماؤں نے اس بات پر اتفاق کیا کہ سرحدی تنازعے پر عالمی عدالت انصاف کے فیصلے کو تسلیم کیا جائے گا، تین گھنٹے تک جاری رہنے والی ملاقات میں دونوں رہنماؤں نے مختلف امور پر بھی تبادلہ خیال کیا۔

چلی کے سبکدوش ہونے والے صدر پینرا نے پریس کانفرنس کرتے ہوئے کہا کہ بین الاقوامی قوانین کے تحت ہر ریاست دوسری ریاست کے ساتھ کیے جانے والے معاہدوں کی پاسداری کرنے سمیت عالمی عدالت انصاف کے فیصلے کو بھی من و عن تسلیم کرنے کی بھی پابند ہے۔

دوسری جانب پیرو کے صدر اولانٹا ہومالا بھی متعدد بار کہہ چکے ہیں کہ دونوں ملکوں درمیان سرحدی تنازعہ پر عالمی عدالت انصاف کے فیصلے کو تسلیم کرینگے۔

واضح رہے کہ پیرو نے دوہزار آٹھ میں عالمی عدالت سے رجوع کیا تھا کہ چلی اس کی اڑتیس ہزار کلومیٹر سرحدی علاقے پر قابض ہے، عالمی عدالت انصاف ستائیس جنوری چلی اور پیرو کے درمیان سرحدی تنازعہ کا فیصلہ سنائے گی۔