وسطی نائیجیریا میں مسلح افراد نے گاؤں پر دھاوا بول دیا، اندھا دھند فائرنگ کے نتیجے میں تیس افراد موقع پر ہی قتل کر دیئے گئے، مسلح افراد نے املاک کو نذر آتش جبکہ جانوروں کو بھی زندہ جلا دیا۔

غیر ملکی خبر ایجنسی کی رپورٹ کے مطابق مسلح افراد نے وسطی نائیجیریا کے گائوں میں گھس کر اندھا دھند فائرنگ کردی جبکہ وہاں کے رہائشیوں کی املاک اور جانوروں کو زندہ جلادیا۔

میڈیا رپورٹس کے مطابق فوج کے مقامی ترجمان نے واقعہ کی تصدیق کرتے ہوئے بتایا ہے کہ ہلاکتوں میں اضافے کا خدشہ ہے، یاد رہے کہ نائیجیریا میں فرقہ ورانہ اور نسلی فسادات کا سلسلہ جاری ہے اور ان میں اب تک ہزاروں افراد لقمہ اجل بن چکے ہیں۔
    
   

 
  شام میں باغی گروپوں کے درمیان جھڑپیں کا دائرہ دیگر شہروں تک پھیل گیا۔
    خانہ جنگی کے شکار ملک شام میں اسد حکومت کے خلاف برسرپیکار باغیوں میں اختلافات شدت اختیار کرتے جا رہے ہیں اور مختلف انتہا پسند گروپ اب ایک دوسرے کے خلاف مسلح کاروائیوں پر اتر آئے ہیں۔

شمالی شام کے مختلف علاقوں میں شامی باغیوں کو القاعدہ سے وابستگی رکھنے والے جہادی جنگجوؤں کی مسلح مزاحمت کا سامنا ہے، شامی شہر حلب میں ڈاکٹر حسین سلیمان کو ہلاک کئے جانے کے بعد سے باغی گروپ آپس میں لر پڑے تھے، جس کے بعد کئی شہروں میں شدید لڑائی کی اطلاعات ہیں۔
   

جمہوریہ وسطی افریقی ملک میں حالیہ پرتشدد واقعات کے نتیجے میں نو لاکھ پینتیس ہزار افراد بے گھر ہوگئے۔

اقوام متحدہ کی کمیشن برائے مہاجرین کی ایک رپورٹ میں بتایا گیا ہے کہ وسطی جمہوریہ افریقہ میں ہلاک ہونے والوں کی تعداد ان کے اندازوں سے دگنی ہے۔

باغیوں نے دو دنوں کے دوران خواتین اور بچوں سمیت ایک ہزار سے زائد شہریوں کا قتل عام کیا جبکہ لاکھوں شہری بے گھر ہوئے، جنہوں نے گرجا گھروں اور اسکولوں میں پناہ حاصل کی۔

اقوامِ متحدہ کی جانب سے علاقے میں امن بحال کرنے کی کوششوں کے سلسلے میں فرانس کے سینکڑوں فوجی اہلکار بنگوئی پہنچ چکے ہیں، فرانس کے صدر فرانسوا اولاند نے کہا تھا کہ ساڑھے چھے سو فوجی فوری طور پر علاقے میں روانہ کیے گئے۔
   

بنگلہ دیش کی حزب اختلاف کی جماعتوں نے ملک کی تاریخ کے پر تشدد ترین انتخابات کو مسترد کردیا ہے، اپوزیشن رہنما خالدہ ضیا نے غیر جانبدار اورغیر سیاسی انتظامیہ کے تحت نئے انتخابات کروانے کا مطالبہ کردیا ہے۔

بنگلہ دیش کی حکمراں جماعت عوامی لیگ نےعام انتخابات میں کامیابی حاصل کرلی ہے لیکن یہ نتائج کسی سے پوشیدہ نہیں تھے کیونکہ خالدہ ضیا کی بنگلہ دیش نیشنلسٹ پارٹی کی زیر قیادت اٹھارہ جماعتی اپوزیشن اتحاد نے الیکشن کا بائیکاٹ کیا، جس کے باعث حکمراں جماعت کے ایک سو تریپن امیدوار تو پہلے ہی بلامقابلہ منتخب ہوچکے تھے۔

پولنگ کے دوران پورے ملک میں شدید ہنگامہ آرائی ہوئی، پولیس کے مطابق انتخابات کے دوران پر تشدد واقعات میں بیس سے زائد افراد ہلاک ہوئے اور نامعلوم افراد کی جانب سے دو سو سے زائد پولنگ اسٹیشن نذر آتش کر دیئے گئے، اطلاعات کے مطابق تقریباً بیس فیصد ہی ووٹ ڈالے گئے، جس پر اپوزیشن رہنما خالدہ نے غیر جانبدار اور غیر سیاسی انتظامیہ کے تحت نئے انتخابات کا مطالبہ کردیا ہے۔

ان کا کہنا ہے کہ عوام نے یک طرفہ انتخابات کو مسترد کردیا ہے، بنگلہ دیشی وزیراعظم شیخ حسینہ واجد نے بھی اپوزیشن کا پرتشدد مظاہرے ختم کرنے پر نئے انتخابات کرانے پر غور کی تجویز دی ہے۔

امریکہ نے افغانستان پر سیکورٹی معاہدہ طے کرنے پر ڈباؤ بڑھا دیا، وائٹ ہاؤس کے ترجمان جے کارنی کا کہنا ہے کہ معاہدے کو مہینوں نہیں ہفتے میں حتمی شکل دی جائے۔

وائٹ ہاؤس کے ترجمان جے کارنی نے پریس کانفرس کرتے ہوئے کہا کہ افغانستان سے سیکیورٹی معاہدے پر اتفاق رائے نہ ہوسکا تو امریکہ دو ہزار چودہ کے بعد اپنی مرضی کے مطابق منصوبہ بندی پر مجبور ہو جائے گا۔

ان کا کہنا تھا کہ معاہدے کو حتمی شکل دینے میں طویل وقت صرف کرنے سے منفی نتائج مرتب ہونگے، امریکہ اور افغانستان میں سیکیورٹی معاہدے کے حوالے سے مذاکرات کے باوجود اتفاق رائے پیدا نہیں ہوسکا ہے۔

معاہدے کے تحت آٹھ ہزار امریکی فوجی کو رواں سال افغانستان میں تعینات رہیں گے۔

عراق میں سرکاری فورسز اور جنگجوؤں کے درمیان دو مغربی شہروں میں لڑائی میں چونتیس افراد ہلاک اور درجنوں زخمی ہوگئے۔

غیر ملکی خبر رساں ادارے کے مطابق جنگجوؤں نے دو شہروں پر قبضہ کر رکھا ہے، عراق میں عہدیداروں کا کہنا ہے کہ سرکاری فورسز نے اتوار کو رمادی کے علاقے میں فضائی حملے بھی کئے، جنگجوؤں نے رمادی اورفلوجہ شہر پر گذشتہ ہفتے قبضہ کرکے کنٹرول سنبھال لیا۔

دوسری جانب عراقی وزیراعظم نور المالکی نے فلوجہ کے شہریوں اور قبائلی سرداروں سے عسکریت پسندوں کے خلاف مزاحمت کی اپیل کی ہے، وزیر اعظم نوری المالکی نے کہا کہ مسلم انتہا پسندوں کو شہر سے نکالنے کی کوششیں کی جائیں۔

امریکہ کے وزیر خارجہ جان کیری نے اتوار کو کہا تھا کہ القاعدہ کے حامی جنگجوؤں کے خلاف حکومت کی کاروائی میں امریکہ معاونت کرے گا۔
   

ایران کے نائب وزیر خارجہ عباس عراقچی ایران اور چھ عالمی طاقتوں کے درمیان تاریخی جوہری معاہدے پر عملدرآمد کے لیے جنیوا پہنچ گئے، یورپی یونین کے اہلکاروں سے ملاقات کریں گے۔

ایران اور چھ عالمی طاقتوں کے درمیان مذاکرات کے حوالے سے یورپی یونین کے اہلکار ہفتے کوملاقات کرینگے، امریکہ، روس، چین، فرانس، برطانیہ اور جرمنی نے ایران کے خلاف اقتصادی پابندیاں کم کرنے کے لئے نومبر میں اتفاق کیا تھا ایران نے بھی تمام جوہری سرگرمیاں کو روکنے کا وعدہ کیا ہے، جس سے مغربی ممالک کے درمیان جاری کشیدگی ختم کرنے اور مشرق وسطی میں ایک نئی جنگ کے خدشات کو کم کرنے میں مدد ملی۔

امریکی صدربارک اوباما نے ایران کے حوالے سے نئی پابندیوں پر قانون سازی نہ کرنے پر زور دیا ہے، چوبیس نومبردو ہزار تیرہ کو جنیوا میں ایران اور چھ عالمی طاقتوں کے درمیان طے پانے والے عبوری جوہری معاہدے میں جرمنی بھی فریق ہے، ایران کے صدر حسن روحانی نے اقوام متحدہ کی جنرل کونسل سے خطاب کرتے ہوئے کہا تھا کہ تہران اپنے ایٹمی پروگرام پر نتیجہ خیز مذاکرات کے لیے تیار ہے۔

امریکی وزیر خارجہ جان کیری اپنا مشرق وسطی کا چارروز دورہ مکمل کرکے وطن واپس لوٹ گئے۔

امریکی وزیرخارجہ جان کیری نے مشرق وسطی کے دورے کے آخری مرحلے میں سعودی وزیر خارجہ سعود الفیصل اور شاہ عبداللہ سے ملاقاتیں کیں، جس میں مسئلہ فلسطین اور اسرائیل کے پائیدار حل کے لئے کی جانے والی کوشش سے متعلق تبادلہ خیال اور علاقائی اور بین الاقوامی مسائل پر بات چیت کی۔

امریکی وزیرخارجہ نے اسرائیلی وزیر اعظم نیتن یاہو اور فلسطینی حکام کے ساتھ بھی الگ الگ ملاقاتیں کیں۔