فیڈرل بورڈ آف ریونیو نے ٹیکس ایمینسٹی اسکیم کا ایس آر او جاری کردیا ہے، اس اسکیم سے دوہزار آٹھ سے دوہزار بارہ تک انکم ٹیکس ادا نہ کرنے والے افراد فائدہ اٹھا سکیں گے۔ ایف بی آر کے ایس آر او کے مطابق اس اسکیم کی سہولت حاصل کرنیوالے افراد جرمانے، ڈیفالٹ،آڈٹ سے مستثنیٰ ہونگے۔

جبکہ اسکیم سے استفادہ صرف این ٹی این نمبررکھنے والے افراد حاصل کرسکیں گے، ایف بی آر کے مطابق سال دویزار آٹھ سے دوہزار بارہ تک ٹیکس ادانہ کرنیوالے افراداسکیم سے فائدہ اٹھا سکتے ہیں۔

گزشتہ چار سالوں کے انکم ٹیکس میں ایمنسٹی کے لئے حصول کیلئے کم از کم اسی ہزار روپے بیس ہزارروپے سالانہ کے حساب سے ادا کرنا ہونگے۔ ٹیکس گزار ٹیکس ایڈجسٹمنٹ کا دعویٰ بھی نہیں کرسکیں گے۔

ایسے ٹیکس گزار جو کہ ان تمام سالوں کے ٹیکس ریٹرنز جمع کرو اچکے ہیں وہ اس اسکیم سے فائدہ نہیں اٹھاسکیں گے۔

وفاقی حکومت نے مالی سال 2013-14ء میں سالانہ ترقیاتی پروگرام (پی ایس ڈی پی )کیلئے مختص مجموعی رقم 540 ارب روپے میں 166 ارب 27 کروڑ روپے جاری کردیئے ہیں،

وزارت منصوبہ بندی کے جاری کردہ اعداد و شمار کے مطابق موجودہ مالی سال میں پا کستان اٹامک انرجی کمیشن کے منصوبوں کیلئے33ارب 31کروڑ روپے ، صحت کی سہولیات کیلئے 10ارب 50کروڑ روپے ، ریلوے ڈویژن کیلئے 11ارب 44کروڑ ، نیشنل ہائی وے اتھارٹی کیلئے 20ارب روپے ، ہائر ایجوکیشن کمیشن کیلئے 7ارب 39کروڑ روپے سے زائد جبکہ پانی اور بجلی ڈویژن کیلئے16ارب روپے سے زائد اور فنانس ڈویژن کیلئے اڑھائی ارب سے زائد جاری کئے گئے ، حکومت پہلی اور دوسری سہ ماہی کے دوران 20 فیصد جبکہ تیسری اور چوتھی سہ ماہی کے دوران 30 فیصدفنڈز جاری کرتی ہے۔

وفاق ہائے ایوان صنعت و تجارت (ایف پی سی سی آئی)کے صدر زبیر احمد ملک نے کہا ہے کہ پاکستان کے سچے دوست چین کی جانب سے پاکستان میں ساڑھے چھ ارب ڈالرمالیت کے دو جوہری پاورپلانٹس کی تعمیر کے فیصلے سے دونوں ممالک اور انکے عوام کے مابین قربت بڑھے گی۔

اورفیصلے سے جنوبی ایشیاء میں چین کے رسوخ اور پاکستان میں بجلی کی پیداوار میں خاطر خواہ اضافہ ہو گا ، جس سے عوام کے مسائل بھی کم ہوں گے، اپنے ایک بیان میں انہوں نے کہا کہ ایران پائپ لائن اور کالا باغ ڈیم جیسے عظیم منصوبے ناقابل عمل ہو رہے ہیں اسلئے حکومت جوہری توانائی کے آپشن کو بھرپور انداز میں استعمال کرے تاکہ جوہری توانائی پر دارومدار میں اضافہ اور ملک کے انرجی مکس کو بہتر بنایا جا سکے۔

انھوں نے کہا کہ پاکستان پر سویلین مقاصد کے لئے نیوکلئیر ٹیکنالوجی کے استعمال پر پابندی لیکن بھارت سمیت مختلف ممالک کو چھوٹ حاصل ہے ، جو امتیازی رویہ ہے، توانائی کے معاملہ میں پاکستان کی مدد کرنے والا سچا دوست اور رکاوٹ ڈالنے والا دشمن ہے۔