رواں سال 2013ء میں ماہ نومبرکے دوران ٹریکٹروں کی پیداوار اور فروخت میں نمایاں اضافہ ریکارڈ کیا گیا، پاکستان ایسوسی ایشن آف آٹو موٹو پارٹس اینڈ مینوفیکچرز کے اعدادوشمارکے مطابق ٹریکٹرتیارکرنے والی دو بڑی کمپنیوں کی نومبر2013ء کے دوران پیداوار بالترتیب 3 ہزار720 اور 4 ہزار 319 یونٹس رہی جوگزشتہ سال کے اسی عرصے کے دوران 3 ہزار 210اور 3 ہزار 292 یونٹس تھی، حکام کے مطابق نومبر 2013ء کے دوران ٹریکٹروں کی فروخت دو ہزار 58 یونٹس ریکارڈ کی گئی۔
لاہور کے علاقے جوہر ٹاؤن میں گلوکارہ سائرہ نسیم کے گھر پر نامعلوم افراد نے بلا اشتعال فائرنگ کردی، سائرہ نسیم فائرنگ سے محفوظ رہیں۔
گلوکارہ سائرہ نسیم کے مطابق رات گئے ایک تقریب سے گھر واپسی پر انکی گاڑی کے پیچھے مشکوک افراد لگ گئے جو پیچھا کرتے کرتے انکے گھر تک پہنچ گئے، نامعلوم افراد نے پہلے انکی گاڑی اور پھر انکے گھر کے دروازے پر فائرنگ کی، فائرنگ سے انکی گاڑی اور گھر کے دروازے کو شدید نقصان پہنچا۔
گلوکارہ سائرہ نسیم کا کہنا ہے کہ ون فائیو پر واقعے کی اطلاع کے ایک گھنٹے بعد پولیس پہنچی، گلوکارہ نے وزیراعلی پنجاب سے فنکاروں کو سیکورٹی فراہم کرنے کا مطالبہ کیا ہے۔
لاہور کے اہم تجارتی مرکز لبرٹی مارکیٹ میں دو تاجر گروپوں کے درمیان تصادم اور ہوائی فائرنگ سے مارکیٹ بند ہوگئی۔
لبرٹی مارکیٹ کے تاجروں کے دو گروپوں میں تصادم اور ہوائی فائرنگ کے باعث لبرٹی مارکیٹ میں خوف و ہراس پھیل گیا اور شاپنگ پر آئے افراد میں بھگدڑ مچ گئی۔
واقعہ کے بعد تاجروں نے دکانیں بند کردیں، پولیس نے موقع پر پہنچ کر متعدد افرد کو حراست میں لے لیا، ایک گروپ کا کہنا ہے کہ مخالف گروپ سود کا کاروبار کرتا ہے، روکنے پر انہوں نے فائرنگ کی اور بٹ مار کر ہمارے ایک ساتھی کو زخمی کیا۔
آل پاکستان آرمی نیزہ بازی کے مقابلے لاہور میں اختتام پذیر ہوگئے، گوجرانوالہ کور لاہور کو ہرا کر نئی چیمپیئن بن گئی۔
آرمی نیزہ بازی مقابلوں کے فائنل میں پاک فوج کی چیمپیئن لاہور کور اپنے اعزاز کا دفاع نہ کرسکی، لاہور کینٹ پولو گراؤنڈ میں ہونے والے دو روزہ فائل مقابلوں کے آخری روز گوجرانوالہ کور نے لاہور کو ٹف ٹائم دیتے ہوئے آل پاکستان آرمی نیزہ بازی چیمپیئن شپ کا ٹائٹل اپنے نام کرلیا۔
کھلاڑی نیزہ بازی سنگل مقابلے میں بھی گوجرانوالہ کور آگے رہی جبکہ ڈبل مقابلے میں راولپنڈی نے میدان مار لیا، نیزہ بازی کے علاوہ آرمی پولو کے مقابلے بھی لاہور میں جاری ہیں، پولو اور نیزہ بازی مقابلے جیتنے والے کھلاڑیوں کیلئے ایوارڈ تقریب اتوار کو ہوگی۔
سابق صدر پرویز مشرف نے پہلی رات راولپنڈی کے اے ایف آئی سی کے سی سی یو میں گزاری، حالت میں اب تک کوئی بہتری نہیں آسکی ہے۔
گزشتہ روز غداری کیس میں پیشی کیلئے جاتے وقت سابق صدر پرویز مشرف کی طبیعت اچانک خراب ہوگئی تھی، جس کے باعث انہیں اے ایف آئی سی اسپتال میں داخل کیا گیا تھا، ذرائع کے مطابق گزشتہ رات سابق صدر نے بات کرنے کی کوشش کی تاہم وہ بات کرنے سے قاصر رہے، جس پر ڈاکٹروں نے انہیں بات کرنے سے منع کرتے ہوئے مکمل آرام تجویز کیا ہے۔
ادویات کے زیراثر سابق صدر کی طبیعت میں بے چینی اور طلاطم تھا اور انکی حالت میں بہتری نہیں آئی، آج سابق صدر کے دوبارہ ٹیسٹ ،ای سی جی اور خون بھی ٹیسٹ کیا جائے گا، سینئرز ڈاکٹرز پر مشتمل سات رکنی بورڈ ان کی انجیو گرافی ہائی ٹافسی اور دیگر ٹیسٹ کی رپورٹ پر دوبارہ غور کریگا۔ واضح رہے کہ ہائی ٹافسی رپورٹ میں سابق صدر کے دل کی متعدد شریانیں بند ہونے کا انکشاف ہوا ہے۔
ذرائع کے مطابق میڈیکل بورڈ ،رپورٹس کے مطابق ان کی ادویات کی تبدیلی کیساتھ ملک یا بیرون ملک انکےعلاج پر بھی غور کررہا ہے، سابق صدر کی اے ایف آئی سی میں منتقلی کے باعث اسپتال میں سیکورٹی کے سخت ترین انتظامات کئے گئے ہیں۔
سابق صدر پرویز مشرف کے خلاف غداری کے مقدمہ کی سماعت کرنے والی خصوصی عدالت نے علالت کے باعث پرویز مشرف کو عدالت میں حاضری سے عارضی استثنیٰ دیدیا، وارنٹ گرفتاری کی درخواست بھی مسترد کردی، احمد رضا قصوری کا کہنا ہے کہ سیاسی لوگوں کے فیصلے سیاسی طریقے سے ہوتے ہیں۔
سابق صدر پرویز مشرف نکلے تو عدالت جانے کیلئے تھے لیکن اسپتال پہنچ گئے، جمعرات کی صبح تقریباً گیارہ بجے سابق صدر پرویز مشرف سخت سیکیورٹی حصار میں اپنے فارم ہاؤس سے نکلے لیکن دل میں تکلیف کے باعث انھیں راستے سے ہی آرمڈ فورسز انسٹی ٹیوٹ آف کارڈیالوجی راولپنڈی منتقل کردیا گیا۔
سابق صدر پرویز مشرف کےخلاف غداری کے مقدمہ کی سماعت کرنے والی خصوصی عدالت نے پرویز مشرف کو بیماری کے باعث ایک دن حاضری سے استثنیٰ دیدیا، خصوصی عدالت کے جسٹس فیصل عرب نے سابق صدر کی عدم پیشی پر وارنٹ گرفتاری کی استدعا مسترد کرتے ہوئے قرار دیا کہ پیر کو صورتحال دیکھ کر فیصلہ دیا جائے گا۔
پرویز مشرف کے وکلا میں شامل بیرسٹر سیف کا کہنا تھا کہ عدالت نے حالات کو مدنظر رکھ کر فیصلہ دیا، بیرسٹر احمد رضا قصوری نے کہا کہ ان کی پرویز مشرف سے ملاقات نہیں ہوسکی لیکن سیاسی لوگوں کے فیصلے سیاسی طریقے سے ہوتے ہیں، عدالتوں سے نہیں، اس سے پہلے سابق صدر پرویز مشرف غداری کے مقدمہ میں خصوصی عدالت میں پیش نہ ہوئے توعدالت نے برہمی کا اظہار کیا۔
جسٹس فیصل عرب نے قرار دیا کہ پرویز مشرف ہر صورت پیش ہوں بصورت دیگر ان کے وارنٹ جاری کئے جاسکتے ہیں لیکن دل کے عارضے کے باعث عدالت نے عبوری حکم جاری کرتے ہوئے سابق صدر پرویز مشرف کو حاضری سے استثنیٰ دے دیا اور سماعت پیر تک ملتوی کردی۔
ملک میں جاری شدید سردی کی لہر کے باعث وفاق کے زیرانتظام تعلیمی ادارے گیارہ جنوری تک بند رہیں گے۔
ترجمان وفاقی امور کے مطابق یہ فیصلہ ملک میں جاری شدید سردی کے باعث کیا گیا ہے، وفاقی دارالحکومت اسلام آباد میں آج سے گیارہ جنوری بروز ہفتہ تک وفاق کے زیرانتظام تمام تعلیمی ادارے بند رہیں گے، جو تعطیلات کے بعد تیرہ جنوری بروز پیر سے معمول کے مطابق دوبارہ کھول دئیے جائیں گے۔
ملک بھر میں ریکارڈ توڑ سردی کا زور ٹوٹنے کو ہے، محکمہ موسمیات کے مطابق آئندہ دو سے تین روز کے دوران سردی کی شدت میں کسی حد تک کمی کا امکان ہے۔
ملک بھر میں سردی کی لہر برقرار ہے، کہیں ٹھنڈی اور تیز ہواوں نے ڈیرے ڈال رکھے ہیں تو کہیں پہاڑوں پر برف باری کا سلسلہ جاری ہے، بالائی علاقے شدید سردی کی لپیٹ میں ہیں۔
محکمہ موسمیات کے مطابق آئندہ چوبیس گھنٹوں کے دوران پنجاب کے میدانی علاقوں پشاور اور سکھر ڈویژن میں کہیں کہیں دھند چھائے رہنے کا امکان ہے جبکہ ملک کے بیشتر شہروں میں دو سے تین روز کے دوران سردی کی شدت میں کسی حد تک کمی کا امکان ہے۔
محکمہ موسمیات نے آئندہ چوبیس گھنٹوں کے دوران ملک بھر میں موسم شدید سرد اور خشک رہنے کی پیش گوئی کی ہے تاہم مالاکنڈ، ہزارہ اور گلگت بلتستان میں مطلع جزوی طور پر ابر آلود رہنے اور ایک دو مقامات پر ہلکی بارش اور برف باری کی پیش گوئی کی ہے۔
آج ملک میں سب سے کم درجہ حرارت اسلام آباد میں منفی تین، لاہور ایک، کراچی نو، پشاور صفر اور کوئٹہ میں منفی نو ڈگری سینٹی گریڈ ریکارڈ کیا گیا۔
کراچی سمیت سندھ بھر میں دو روز کی بندش کے بعد چوبیس گھنٹے کیلئے سی این جی فراہم کی گئی، جس کے بعد آج سے دوبارہ اگلے اڑتالیس گھنٹے کیلئے سی این جی بند کر دی گئی ہے۔
رواں ہفتے کے لئے کراچی سمیت سندھ بھر میں سی این جی اسٹیشنز کی بندش کا نیا شیڈول جاری کر دیا گیا ہے، دو روز کی بندش کے بعد کھلنے والے سی سی این جی اسٹیشن اب جمعہ تین جنوری صبح آٹھ بجے سے اتوار پانچ جنوری صبح آٹھ بجے تک اڑتالیس گھنٹوں کے لیے دوبارہ بند کر دیئے گئے۔
سی این جی اسٹیشن پر گاڑیوں کی لمبی قطاریں لگی ہوئیں ہیں، جس سے ٹریفک کی روانی بھی متاثر ہو رہی ہے ۔
اسٹیٹ بینک نے بینکوں اورمالیاتی اداروں پرہاؤسنگ سیکٹرمیں قرضے جاری کرنےکی حد مقررکردی۔
اسٹیٹ بینک نے ہاؤسنگ سیکٹر کیلئے پہلی بار قرضوں کی حد مقرر کردی ہے۔ بینکس اورترقیاتی مالیاتی ادارے ہاؤسنگ سیکٹر کو اپنے اثاثوں کا دس فیصد سے زائد قرضےنہیں دے سکیں گے۔
اس سے قبل کوئی حد مقرر نہیں تھی۔ اسٹیٹ بینک نے رئیل اسٹیٹ سیکٹر کیلئے ایکسپوژر لمٹ کا سرکلر نمبر بی پی آر ڈی جاری کردیا ہے۔۔ اِدھرایسوسی ایشن آف بلڈرز اینڈ ڈویلپرزنے اسٹیٹ بینک کے اس اقدام کو ہاؤسنگ انڈسٹری کیلئے نقصان قرار دیا ہے۔
بینکنگ انڈسٹری کے ذرائع کے مطابق اسٹیٹ بینک نے بڑھتے ہوئے غیرفعال قرضوں کو کنٹرول کرنے کیلئے یہ فیصلہ کیا ہے۔ ہاؤسنگ سیکٹر میں ڈوبے ہوئے قرضوں کا حجم 45 ارب روپے تک پہنچ گیا ہے
