پرویز مشرف کی بیماری کا معاملہ بنا لیکن ایم کیو ایم اور پیپلز پارٹی میں ٹھن گئی، پیپلز پارٹی نے ایم کیو ایم کی تنقید کی پُر زور مذمت کردی، قمر زمان کائرہ نے ایم کیو ایم سے وضاحت طلب کرلی۔

غداری کیس کے ملزم پرویز مشرف کیا بیمار پڑے، سیاسی جماعتوں میں کھلبلی مچ گئی، پیپلز پارٹی کے چیئرمین بلاول بھٹو زرداری کا بیان مشرف کی پیشی پر بھی بازی لے گیا۔

ایم کیوایم کی جانب سے سخت تنقید کی گئی تو پیپلز پارٹی نے مذمت کردی اور ساتھ ہی یہ بھی بتا دیا کہ آصف زرداری نے گیارہ سال جیل کی سختیاں بہادری سے برداشت کیں لیکن حاکم وقت کے سامنے سر نہیں جھکایا۔

وہیں قمر زمان کائرہ نے ایم کیو ایم سے وضاحت مانگ لی ہے کہ ایم کیو ایم پرویز مشرف کے ساتھ ہے، یا بلاول اور آصف زرداری کے خلاف ہے یا کوئی پوائنٹ اسکورننگ کی جارہی ہے۔

قمر زمان کائرہ کا کہنا تھا کہ ڈکٹیٹر کو اس کے کئے کی سزا ملنی چاہیے۔ پیپلز پارٹی کا کہنا ہے کہ کیس ایک آمر کیخلاف ہے، اس میں سیاسی جماعتوں کو آپس میں نہیں الجھنا چاہئے۔
   

سابق صدر پرویز مشرف نے پہلی رات راولپنڈی کے اے ایف آئی سی کے سی سی یو میں گزاری، حالت میں اب تک کوئی بہتری نہیں آسکی ہے۔

گزشتہ روز غداری کیس میں پیشی کیلئے جاتے وقت سابق صدر پرویز مشرف کی طبیعت اچانک خراب ہوگئی تھی، جس کے باعث انہیں اے ایف آئی سی اسپتال میں داخل کیا گیا تھا، ذرائع کے مطابق گزشتہ رات سابق صدر نے بات کرنے کی کوشش کی تاہم وہ بات کرنے سے قاصر رہے، جس پر ڈاکٹروں نے انہیں بات کرنے سے منع کرتے ہوئے مکمل آرام تجویز کیا ہے۔

ادویات کے زیراثر سابق صدر کی طبیعت میں بے چینی اور طلاطم تھا اور انکی حالت میں بہتری نہیں آئی، آج سابق صدر کے دوبارہ ٹیسٹ ،ای سی جی اور خون بھی ٹیسٹ کیا جائے گا، سینئرز ڈاکٹرز پر مشتمل سات رکنی بورڈ ان کی انجیو گرافی ہائی ٹافسی اور دیگر ٹیسٹ کی رپورٹ پر دوبارہ غور کریگا۔ واضح رہے کہ ہائی ٹافسی رپورٹ میں سابق صدر کے دل کی متعدد شریانیں بند ہونے کا انکشاف ہوا ہے۔

ذرائع کے مطابق میڈیکل بورڈ ،رپورٹس کے مطابق ان کی ادویات کی تبدیلی کیساتھ ملک یا بیرون ملک انکےعلاج پر بھی غور کررہا ہے، سابق صدر کی اے ایف آئی سی میں منتقلی کے باعث اسپتال میں سیکورٹی کے سخت ترین انتظامات کئے گئے ہیں۔