پاکستان انڈر نائنٹین ٹیم نے افغانستان کو شکست دیکر جونئیر ایشیا کرکٹ کپ کے فائنل میں جگہ بنالی ہے۔ اب پاکستان اور بھارت کے درمیان فائنل چار جنوری کو کھیلا جائیگا۔

متحدہ عرب امارات میں کھیلے جارہے انڈر نائنٹین ایشیا کپ کے سیمی فائنل میں پاکستان نے افغانستان کو سنسنی خیز مقابلے کے بعد دو وکٹوں سے شکست دیکر فائنل میں جگہ بنائی ہے۔

افغان ٹیم نے پہلے کھیلتے ہوئے ایک سو چھیانوے رنز بنائے، پاکستان کیلئے کرامت علی نے پانچ وکٹیں حاصل کیں۔ جواب میں پاکستان نے اعصاب شکن مقابلے کے بعد آٹھ وکٹوں کے نقصان پر ہدف حاصل کرلیا، کپتان سمیع اسلم پچھتر رنز کی اننگز کھیل کر نمایاں رہے۔

پاکستان کرکٹ بورڈ کی عبوری انتظامی کمیٹی نے بنگلہ دیش میں ہونے والے ایشیا کپ اور آئی سی سی ورلڈ ٹی ٹوینٹی کے لئے تحفظات کا اظہار کر دیا ہے۔

قذافی اسٹیڈیم میں ہونے والے اجلاس میں بنگلہ دیش کی موجودہ سیاسی صورتحال کے باعث ایشیا کپ اور ورلڈ ٹی ٹوینٹی میں شرکت پر تبادلہ خیال ہوا، اس بات پر اتفاق کیا گیا ہے کہ آئی سی سی، اے سی سی اور حکومت سے اس بار ےمیں تجاویز مانگی جائیں گی، اجلاس میں قلیل المدتی فنانس پالیسی، ملازمین کی اکتیس جنوری تک مدت ملازمت میں توسیع کی منظوری بھی دی گئی۔
   

پاکستان کرکٹ ٹیم کی انتظامیہ نے فاسٹ بائولر عمر گل کو مکمل فٹ نہ ہونے پر سری لنکا کے خلاف ٹیسٹ سیریز سے فارغ کر دیا ہے۔

فاسٹ بولر عمر گل نے قومی کرکٹ ٹیم کے فزیو ڈیل نیلر کے ساتھ ایک ہفتے تک فزیکل ٹریننگ میں حصہ لیا تھا۔ جس کے بعد ٹیم انتظامیہ نے عمر گل کو یو اے ای سے واپس وطن بھیجنے کا فیصلہ کیا اور ہدایت کی ہے کہ عمر گل مکمل فٹ ہونے تک نیشنل کرکٹ اکیڈمی لاہور میں ٹریننگ جاری رکھیں اور ڈومیسٹک میچز میں بھی حصہ لیں۔ عمر گل نے سری لنکا کیخلاف ون ڈے سیریز کیلئے قومی ٹیم میں اچھا کم بیک کیا تھا۔