بنگلہ دیش میں ہونے والے متنازعہ انتخابات میں حکمران جماعت عوامی لیگ نے اپوزیشن کے بائیکاٹ کے باعث فیصلہ کن برتری حاصل کرلی ہے، پولنگ کے دوران پرتشدد واقعات میں اٹھارہ افراد ہلاک ہوئے اور چار سو پولنگ اسٹیشنز پر پولنگ معطل کردی گئی۔

بنگلہ دیش کی تاریخ کے سب سے متنازعہ انتخابات میں حکمران جماعت عوامی لیگ نے تین سو میں سے دو سو بتیس سیٹیں جیت کر فیصلہ کن برتری حاصل کرلی ہے، خالدہ ضیا کی بنگلہ دیش نیشنلسٹ پارٹی کی زیر قیادت اٹھارہ جماعتی اپوزیشن اتحاد کی جانب سے الیکشن کے بائیکاٹ کے باعث ایک سو پانچ سیٹوں پر عوامی لیگ کے امیدوار بلا مقابلہ منتخب ہوئے ہیں۔

پولنگ کے دوران پر تشدد واقعات میں اٹھارہ افراد ہلاک اور پولنگ اسٹیشنز پر جلاؤ گھیراؤ کے باعث چار سو پولنگ اسٹیشنز پر پولنگ معطل کردی گئی ہے، پولیس اور دیگر سکیورٹی اداروں کے اہلکاروں نے ملک بھر میں مظاہرین پر طاقت کا استعمال کیا، بنگلہ دیش مین انتخابی مہم کے دوران اب تک سو سے زائد افراد ہلاک ہوچکے ہیں۔

پولنگ کے دوران شہر شہر پرتشدد واقعات کے باعث عوام گھروں سے نہیں نکلے، حکومتی اعلانات کے باوجود اکثر شہروں کی سڑکیں سنسان رہیں اور پولنگ اسٹیشنز پرووٹرز کی تعداد نہ ہونے کے برابر رہی، انتخابی مہم کے دوران بنگلہ دیش کی گارمنٹ انڈسٹری جس پر ملک کی اسی فیصد برآمدات کا دارومدار ہے۔

امن و امان کی خراب صورتحال کے باعث بری طرح متاثر ہوئی ہے، ماہرین کا کہنا ہے کہ اپوزیشن بائیکاٹ کے سبب عوامی لیگ الیکشن تو جیت تو گئی ہے لیکن اس کی قانونی حیثیت پر سوالیہ نشان کھڑے ہوگئے ہیں، انتخابات کی نگرانی کے لئے امریکہ، یورپی ممالک اور دولت مشترکہ نے اپنے مبصرین بھیجنے سے پہلے ہی انکار کردیا تھا۔

چین دارالحکومت بیجنگ کی ایک مسجد میں دوران تقریب بھگدڑ کے ہو جانے سے چودہ افراد جاں بحق دس زخمی ہوگئے۔

سرکاری میڈیا کے مطابق یہ واقعہ چین شمال مغربی کے شہر ننگزیا میں ایک مسجد میں کھانے کی تقسیم کے دوران ہوا، مسجد میں اجتماع ہونے کی وجہ سے لوگوں کی تعداد ذیادہ تھی، واقعے میں زخمی ہونے افراد کو فوری قریبی اسپتال بھیج دیا گیا۔

اسپتال ذرائع کا کہنا ہے کہ زخمیوں میں چار کی حالت نازک ہے، واقعے کی مزید تحقیقات شروع کردی گئی ہے، ننگزیا علاقے میں زیادہ تر مسلمان آباد ہیں۔
   

امریکی وزیر خارجہ جان کیری نے سعودی عرب کے شاہ عبداللہ اور سعودی وزیر خارجہ شہزادہ سعود الفیصل بن عبدالعزیز آل سعود سے ملاقات کی۔

امریکی وزیر خارجہ جان کیری اسرائیل کا دورہ مکمل کرکے سعودی عرب پہنچ گئے، جہاں انہوں نے سعودی عرب کے شاہ عبداللہ سے ملاقات کی، ملاقات میں انہوں نے مشرقی وسطی میں قائم امن کے حوالے سےتبادلہ خیال کیا۔

امریکی وزیر خارجہ جان کیری کا دورہ اسرائیل اور فلسطین کے درمیان امن معاہدہ کرانے کی کوششوں کا حصہ ہے۔
    
   

جنوبی سوڈان کے سیاسی بحران کے خاتمے کے لیے کی جانے والی کوششیں تاحال کامیاب نہ ہوسکیں، باغیوں کے حملے میں ایک جنرل مارا گیا۔

غیر ملکی میڈیا کے مطابق جنوبی سوڈان کے متحارب گروہوں کے مابین ایتھوپیا کے دارلحکومت ادیس ابابا میں ہونے والے مذاکرات تیسرے دن میں داخل ہوگئے ہیں، تاہم فریقین اب تک جنگ بندی کے معاہدے تک نہیں پہنچ سکے۔

صدر سلوا کیر اور اپوزیشن رہنما ریک مچار نے تصدیق کی ہے کہ ادیس ابابا میں مذاکرات کار فائر بندی کے کسی سمجھوتے تک پہنچنے کی کوشش کریں گے، باغی رہنما نے مذاکرات کامیاب بنانے کے لئے ملک میں نافذ ہنگامی صورتحال اٹھانے اور سیاسی قیدیوں کی رہائی کا مطالبہ کیا ہے۔

دوسری جانب جنوبی سوڈان میں باغیوں کے حملے میں ایک جنرل کے مارے جانے کی اطلاعات ہیں، جنوبی سوڈان میں خانہ جنگی میں ہزار سے زائد افراد ہلاک اور لاکھوں بے گھر ہوچکے ہیں۔

عراق کے دارالحکومت بغداد کے تجارتی علاقوں میں کار بم دھماکے میں اننیس افراد جاں بحق جبکہ متعدد زخمی ہوگئے۔

پولیس ذرائع کا کہنا ہے کہ بغداد میں سڑک کے کنارے اور کام میں نصب کئے گئے بم دھماکے بغداد کے تجارتی علاقے میں کئے گئے، دھماکے سے عمارتوں اور گاڑیوں کو نقصان پہنچا۔

اسپتال ذرائع کا کہنا ہے کہ زخمیوں میں بعض کی حالت نازک ہے، عراق میں دوہزار آٹھ سے تشدد کی لہر جاری ہے، تاہم حالیہ چند مہینوں کے دوران تیزی آ گئی ہے، دوہزارتیرہ میں آٹھ ہزار سے زائد افراد تشدد کے واقعات میں ہلاک ہوگئے تھے۔
    
   

امریکی ائیرلائن کے طیارے میں بم کی اطلاع پر طیارے کو ہنگامی بنیادوں پر کنساس ائیرپورٹ پر لینڈنگ کرالیا گیا جبکہ تمام مسافر محفوظ رہے۔

امریکی میڈیا کے مطابق حکام کے مطابق امریکی ائیر لائن کا طیارہ نیو یارک سے سان فرانسسکو جارہا تھا، طیارے میں بم کی موجودگی کی اطلاع پر کنساس ائیرپورٹ پر ہنگامی لینڈنگ کروائی گئی جبکہ ائیرپورٹ پر ایمرجنسی بھی نافذ کی گئی۔

ائیرپورٹ حکام کے مطابق فلائٹ میں سوار عملے اور مسافروں کو اتار لیا گیا ہے، بم ڈسپوزل اسکواڈ طیارے کی تلاشی لے رہا ہے۔

افریقی تارکین وطن کی ایک بڑی تعداد نے اسرائیل میں زیرحراست افراد کی رہائی کے لئے اسرائیلی حکومت کے خلاف ریلی میں شرکت کی۔

مظاہرین کا مطالبہ تھا کہ اسرائیلی حکومت فوری طورپر نئے قوانین منسوخ کرے، تمام قیدیوں کو رہا اور تارکین وطن کوانسانی صحت کے حقوق، کام کرنے کی اجازت کے ساتھ ساتھ تمام انسانی بنیادی حقوق دے۔

اسرائیلی حکام کا کہنا ہے کہ دو ہزار چھ سے مصر کے راستے غیر قانونی طور افریقی ممالک سےساٹھ ہزار سے زائد افراد اسرائیل میں غیر قانونی طور پر موجود ہیں۔

انسانی حقوق کے گروپوں کا کہنا ہے کہ اسرائیلی پارلیمنٹ کی طرف منظور کئے گئے نئے قانون کے بعد سے تقریبا تین سو افراد کو گرفتار کیا جاچکا ہے۔