الطاف حسین نے کہاقائد اعظم کےافکار اور تعلیمات پر اصل روح کے مطابق عمل پیرا ہوئے بغیر ملک و قوم کو دہشت گردی اور انتہاء پسندی سے نجات نہیں دلائی جاسکتی۔
ایم کیو یام کے قائد نے ایک بیان میں کہا ملک پر قابض دوفیصد مراعات یافتہ طبقے نے آج بھی قائد اعظم کے تصورات ، افکار اور تعلیمات سے دوری اختیار کر رکھی ہے، الطاف حسین نے کہاقائد اعظم محمد علی جناح پاکستان کو روشن خیال ، اعتدال پسنداسلامی ریاست بنانا چاہتے تھے۔
وزیراطلاعات پرویزرشید نے کہا ہے کہ مشرف کا ٹرائل خوشی کا دن ہے، پاک بھارت ڈی جی ایم اوز کے مثبت نتائج سامنے آئیں گے۔
اسلام آبادمیں صحافیوں سے گفتگو کرتے ہوئے وفاقی وزیراطلاعات پرویزرشید نے کہا پرویزمشرف کا ٹرائل ہونا خوشی کی بات ہے، انہوں نے کہا قدم آگے بڑھانے کےلئے اٹھائے جاتے ہیں۔
پاک بھارت ڈائریکٹرجنرل ملٹری آپریشنزکی ملاقات خوش آئندہے، وفاقی وزیرنےکہاجہالت غربت اور پسماندگی کےخاتمے کےلئے مل کرجدوجہدکرناہوگی، خطے کی تمام ریاستوں کو امن کے ساتھ رہنا چاہئے۔
مسلم لیگ ق کے سربراہ سینیٹر چوہدری شجاعت حسین نے کہا ہے کہ وزیراعظم قومی، معاشی ایجنڈے کو طے کرنے کے لئے کُل جماعتی گول میز کانفرنس بلائیں۔
لاہور میں قائداعظم ڈے کے حوالے سے تقریب سے خطاب کرتے ہوئے چودھری شجاعت حسین نے کہا کہ آج پھر آئی ایم ایف کے در کا بھکاری بنادیا گیا ہے، جبکہ ہمارے دور میں اس سے نجات حاصل کرلی گئی تھی، حکومت اور عوام گھروں اور میدانوں میں سبزیاں آگانے کی مہم شروع کریں۔
چودھری شجاعت کا کہنا تھا کہ سبزیاں لگانے والوں کو مفت کھاد اور بیج فراہم کیا جائے تاکہ اربوں روپے کا زرمبادلہ ضائع نہ ہو، آج قائد اعظم کے پاکستان میں دہشتگردی، ڈرون حملے، لوڈشیڈنگ، مہنگائی اور بیروزگاری عروج پر ہے۔
تقریب سے خطاب کرتے ہوئے پرویز الہٰی نے کہا کہ قائد اعظم نے مسلمانوں کو اسلامی فلاحی مملکت قائم کرکے دی تاکہ وہ اپنی زندگی آزادانہ گزار سکیں، ہمارے دور میں صوبہ بھر میں مفت ادویات اور تعلیم دی جاتی تھیں، طالبات کو وظیفہ دیا جاتا تھا، موجودہ حکومت نے صوبے کے پانچ ہزار سکول بند کردئیے۔
پرویز الہٰی نے کہا کہ اسپتالوں کی ایمرجنسی میں مریضوں کو صرف دھکے ملتے ہیں، ریسکیو 1122 ہمارے دور کا انمول تحفہ ہے، آج ہر شخص بدحال ہے، شہباز شریف ترکی کے وزیراعظم کو ایچی سن کالج لے گئے بہتر تھا وہ انہیں کسی دانش سکول لے جاتے۔
وینا کی دبئی کے بزنس مین اسد بشیر سے شادی خانہ آبادی ہو گئی، نرالے ریکارڈز، اسکینڈلز کی بھر مار اور خبروں میں ان رہنے والی وینا کی اپنی ہی خبروں کو بریک لگ گیا اور پھر دھڑکتے دلوں کو بریک کرنے والی وینا ملک نے اپنے نکاح کی تصدیق بھی کردی، وینا ملک کے والد ملک اسلم نے بیٹی کے نکاح کی تصدیق کردی۔
ویسے وینا کی شادی خبریں تو متعدد بار سننے کو ملیں لیکن کبھی کسی کے ذریعے کبھی خود انکی زباں سے اور کبھی سماجی رابطے کی ویب سائٹ پر دی کبھی خبر کبھی پریس کانفرنس میں اعتراف کیا ۔
دو ہزار دس میں آصف کے سنگ کبھی سنی گئی افواہیں جس کا وینا نے باقائدہ خود اعلان کیا تھا، پھر خبر آئی کے دو ہزار پندرہ میں یہ کام سر انجام دیں گیں، وینا کی کبھی ہاں اور کبھی نا کے سبب زیادہ تر لوگوں کا کہناہے کہ سب کو چونکا دینے میں وینا کومزہ آتا ہے۔
صدر پاکستان ممنون حسین نے کہا ہے کہ ملک کو دہشتگردی اور انتہاپسندی کے چیلنجز کاسامنا ہے، ایوان صدر اسلام آباد میں قائد اعظم محمد علی جناح کے یوم پیدائش کے حوالے سے تقریب منعقد ہوئی صدر ممنون حسین نے اپنے خطاب میں کہا کہ خوشی ہے ہم سب مل کر بابائے قوم کی سالگرہ منارہے ہیں۔
انھوں نے کہا کہ قائد کی سوچ اورافکارکواجاگر کرکے وطن عزیز کو ان کی سوچ اور امنگوں کے مطابق ڈھال سکتے ہیں۔صدر پاکستان نے کہا کہ ملک کومعاشی ،سماجی اور دیگرچیلنجز کے ساتھ دہشتگردی اور انتہاپسندی کا بھی سامنا ہے۔
انھوں نے کہا کہ قوم نےجمہوریت کے استحکام اور فروغ کے لئے قربانیاں دیں، انھوں نے کہا کہ ہمیں اپنی صلاحیتیوں اورتوانائی کو قائدکےمقاصد کے حصول کیلئے صرف کرنے کا عہد کرنا ہوگا۔
مسلم لیگ ن کے رہنما اور سینیٹ میں قائدایوان راجہ ظفرالحق نے کہا ہےبنگلہ دیش میں انتخابات کےباعث پاکستان مخالف بیانات دیے جا رہے ہیں۔
اسلام آباد میں تقریب سے خطاب میں انھوں نے کہا مسیحی برادری سمیت تمام اقلیتوں کوساتھ لے کر چلنا ہےاورقائدکے خواب کی تعبیر کرنی ہے۔
اس موقع پرصدیق الفارق نے کہاعمران خان غیرسنجیدہ شخص ہیں جوملک میں غیر یقنی صورتحال پیداکرناچاہتےہیں۔
سینیٹر ظفرشاہ نےکہاوہ آمر جس نےجمہوری حکومت ختم کی آج عدالتوں میں حاضر ہو رہا ہے، تقریب میں قائداعظم کے یوم پیدائش اور کرسمس کا کیک بھی کاٹا گیا۔
آج ملک بھرمیں بانی ِ پاکستان محمد علی جناح کا 137 واں یوم ولادت منایاجارہا ہے، قائد اعظم 25 دسمبر 1876 کو اپنے گھر میں پیدا ہوئے، جسکا نام وزیر مینشن ہے اور وہ کراچی کے علاقے کھارادر میں واقعہ ہے۔
قائد اعظم کے والد جناح پونجا آپکی ولادت سے تقریباً ایک سال قبل گجرات سےکراچی آکرآباد ہوئے ، وزیرمینشن کی پہلی منزل انہوں نے کرائے پر لی تھی انہوں نے اپنی زندگی کے کئی سال یہاں گزارے، قائد اعظم کے تمام بہن بھائیوں کی ولادت بھی اسی عمارت میں ہوئی۔
سن 1953 میں حکومت پاکستان نے عمارت کو اسکے مالک سے خرید کر باقاعدہ قومی ورثے کا درجہ دیا گیا، اسکی زیریں منزل کو ریڈنگ ہال میں اور پہلی منزل کو گیلری بنایا گیا اور اسکے بعد اسے 14 اگست 1953 کو عوام کے لئے کھول دیا گیا۔
ایک گیلری کا اضافہ اس وقت کیا گیا جب 1982 میں قائد اعظم کی ایک اور بہن شیریں جناح نے مزید کچھ نوادرات قائد اعظم ریلکس کمیشن کے حوالے کیں۔
دو منزلوں پر مشتمل گیلریوں میں قائداعظم کا فرنیچر ، انکے کپڑے ، انکی اسٹیشنری ، انکی ذاتی ڈائری اور انکی دوسری بیوی رتی بائی کے استعمال کی اشیا کی نمائش کی گئی ہے۔ سب سے اہم اثاثہ جو وزیر مینشن کے علاوہ کہیں میسر نہیں وہ قائداعظم کی قانون کی کتابیں ہیں جنکی مدد سے وہ اپنے مقدمات کی پیروی کرتے تھے۔
یہ عمارت 2003 سے 2010 تک تزئین و آرائش کے لئے بند رہی۔
میوزم کے عملے میں سے ایک شخص نے بتایا کہ 1992میں جب نیلسن منڈیلا پاکستان تشریف لائے تو وہ یہاں بھی آئے تھے لیکن بدقسمتی سے مہمانوں کی کتاب جس میں انکے دستخط تھے وہ گم ہوچکی ہے۔
قائد اعظم کے یوم ِ پیدائش پر انکی جائے ولادت پر آنے والوں کی نا ہونے کے برابر تعداد سے یہ بات واضح ہوجاتی ہے کہ بحیثیت قوم ہمیں قائد اعظم اوران سے منسلک تمام چیزوں کی اہمیت کو سمجھنا ہوگا ورنہ یہ سب کچھ قصہ ِ پارینہ بن کر رہ جائے گا۔
الیکشن کمیشن نے ارکان اسمبلی کے اثاثہ جات کی وہ تفصیلات افشا کی ہیں جو سیاستدانوں انہیں فراہم کیں، ملک کی بڑی سیاسی جماعتوں، ن لیگ، تحریک انصاف اور پیپلزپارٹی کے سربراہان کے ظاہر کردہ اثاثے الیکشن کمیشن نے اپنی ویب سائٹ پر جاری کر دیئے ہیں۔
غریب ملک کے امیر سیاستدان، الیکشن کمیشن نے اثاثوں کی تفصیلات جاری کردیں، وزیراعظم نواز شریف ایک ارب ،بیاسی کروڑ، چالیس لاکھ، چوالیس ہزار دو سو تینتیس روپے کے مالک ہیں، وزیراعظم کی اہلیہ کے زیورات کی مالیت پندرہ لاکھ ظاہر کی گئی، حمزہ شہباز کے اثاثوں کی مالیت پچیس کروڑ ہے، جسمیں شریف پولٹری فارم فقط دس ہزار اور کرسٹل پرائیویٹ کی مالیت صرف پینتالیس ہزار بتائی گئی ہے۔
تحریک انصاف کے چیئرمین عمران خان نے اثاثے دو کروڑ چھیانوے لاکھ ظاہر کئے، ان کا بنی گالہ کا گھر تحفے میں جبکہ لاہور کا گھر ،میانوالی اور بھکر کی اراضی وراثت میں ملی ہے، جن کی مالیت ظاہر نہیں کی گئی، پیپلز پارٹی کے صدر امین فہیم راولپنڈی میں فارم ہاوس، دبئی میں اپارٹمنٹ پانچ بنگلوں اور ان کے بچے تین سو ایکڑ زرعی اراضی کے مالک ہیں، مولانا فضل الرحمان کے کل اثاثے تہتر لاکھ اٹھارہ ہزار تین سو اسی روپے کے ہیں،
مولانا کے بینک اکاوٴنٹس میں سولہ لاکھ آٹھ ہزارتین سو اسی روپے جبکہ زیورات کی مالیت ساڑھے نولاکھ کے لگ بھگ ہے، فاروق ستار کے کل اثاثوں کی مالیت چھتیس لاکھ اکتالیس ہزار ایک سو اڑسٹھ روپے ظاہر کی گئی ہے، فہمیدہ مرزا کے بینک اکاؤنٹ میں بیالیس لاکھ اڑتالیس ہزار روپے ہیں، کروڑوں کی زمین اور گھر بھی ان کے نام ہیں، شازیہ مری کے پاس پانچ تولے سونا اور پچیس ہزار روپے نقد کے علاوہ بینک میں ایک لاکھ باہتر ہزار روپے ہیں، ان کے پاس کوئی گاڑی نہیں۔
فریال تالپور کے مطابق ان کے پاس پندرہ کروڑ اٹھہتر لاکھ ننانوے ہزارنو سو ننانوے روپے ہیں، نوید قمر کے اثاثوں کی مالیت سترہ کروڑ باہتر ہزار سے زیادہ ہے، خورشید شاہ کے مطابق ان کے پاس ہیں پچھتر لاکھ روپے کے بانڈز، کیش اور ان کے نام سوا کروڑ کی زمین بھی ہے لیکن ان کے پاس کوئی گاڑی نہیں، شفقت محمود کی گھرکی مالیت پچیس لاکھ اور تیرہ کروڑ چالیس لاکھ کے پلاٹ ہے۔
اسپیکر قومی اسمبلی سردار ایاز صادق کے گھرکی قیمت پانچ کروڑ روپے اور کل اثاثے سترہ کروڑ روپے سے زائد ہیں، خواجہ سعد رفیق سینتیس لاکھ کا کاروبار کرتےہیں، ان کے پاس ایک کروڑ دو لاکھ کا گھرسڑسٹھ لاکھ ننانوے ہزار کا پلاٹ اکتیس لاکھ کی دو گاڑیاں ہیں، غلام ربانی کھر کے اثاثوں میں پانچ لاکھ کا گھر بیوی کے نام، بیس لاکھ کا کاروبار اور چھیاسی لاکھ کی پانچ گاڑیاں بیوی کے نام، پچاس لاکھ کا زیور تحفے میں ملا۔
اویس لغاری کے پاس تیرہ کروڑ سے زائد مالیت کے اثاثے ہیں، شاہ محمود قریشی کا ملتان میں پلاٹ ہے، جس کی مالیت ساڑھے ستاون لاکھ روپے ہیں، بیٹے کے نام ایک کروڑ مالیت کی زمین لاہور اور اسلام آباد میں گھر اور بینکوں میں دو کروڑ روپے سے زائد رقم موجود ہے، جاوید ہاشمی کے اثاثوں میں زرعی زمین کی مالیت پانچ کروڑ، شہری جائیداد دو کروڑ روپے کی اور تین لاکھ کے پرائز بانڈ، سونا ساڑھے پانچ لاکھ روپے کا ہے۔
عابد شیرعلی ساڑھے تین کروڑ روپے سے زائد اثاثوں کے مالک ہیں، چوہدری پرویزالٰہی کے اثاثوں میں پچاس لاکھ چالیس ہزار کی زمین، ننانوے لاکھ ستتر ہزار کا کاروبار، ڈھائی کروڑ کے شیئرز، سات کروڑ انسٹھ ہزار روپے کا قرضہ، دو کروڑ مالیت کی گاڑیاں، چار کروڑ چھیاسٹھ لاکھ کیش شامل ہیں، چوہدری نثار گھر کے اثاثوں میں فارم ہاؤس نوفلیٹس ہیں جو سب ورثے میں ملے۔
شیخ رشید کے پاس صرافہ بازار راولپنڈی میں مارکیٹ ساڑھے سولہ لاکھ روپے ، بحریہ ٹاون میں گھر، ذاتی استعمال کی گاڑی اٹھارہ لاکھ اکسٹھ ہزار روپے کی ہے، کیپٹن (ر)محمد صفدرعباسی کے پاس دو پلاٹ جس کی مالیت دس لاکھ روپے، بی ایم ڈبلیو گاڑی جس کی مالیت ساٹھ لاکھ روپے ہیں، پی ٹی آئی کے مراد سعید کا کوئی کاروبار ہے نہ گھر نہ گاڑی اور نہ زیور ہیں۔
اسد عمر کے پاس گیارہ کروڑ کے کراچی میں ڈی ایچ اے میں پلاٹس تیس کروڑ تیس لاکھ کے گھر بیوی کے نام، نو لاکھ ترانوے ہزار کے شیئرز، انتالیس کروڑ گیارہ لاکھ کے یونٹ سرٹیفکیٹس ہیں، اسد عمر کے کل اثاثے اکسٹھ کروڑ بانوے لاکھ روپے سے زائد ہیں۔
عراق کے دارلحکومت بغداد میں چرچ کے باہر کار بم دھماکے میں پندرہ افراد ہلاک اور کئی افراد زخمی ہوگئے۔
ذرائع کے مطابق حادثہ کرسمس کے موقع پر جاری دعائیہ تقریب کے وقت پیش آیا، جب سینکڑوں افراد کرسمس پر ہونے والی خصوصی دعائیہ تقریب میں شامل ہونے چرچ آئے تھے، جائے حادثے پر امدادی ٹیمیں روانہ کردی گئیں اور ریسکیو کا کام جاری ہے۔
ہالی وڈ کی نئی اسپورٹس اور کامیڈی سے بھر پور فلم "ڈرافٹ ڈے " کا پہلا ٹریلر ریلیز کردیا گیا۔
ہالی وڈ کی نئی اسپورٹس اور کامیڈی سے بھر پور فلم "ڈرافٹ ڈے " کا پہلا ٹریلر شائقین کیلئے ریلیز کردیا گیا، ہالی وڈ کے معروف ہدایتکار آئیون ریٹمین نے فلم کی ہدایت کاری کی ہے۔
فلم کی کہانی ایک فٹ بال لیگ ٹیم کلیولینڈ براؤنز کے جنرل منیجر کے گرد گھومتی ہے، جسے اپنی ٹیم کے لیے نمبر ون ڈرافٹ حاصل کرنے کے لیے مشکل راستوں سے گزرنا پڑتا ہے۔
فلم ڈرافٹ ڈے میں معروف اداکار کیون کوسٹنراورجینیفر مرکزی کرداروں میں جلوے بکھرتے نظر آئینگے، اسپورٹس اور کامیڈی سے بھرپورفلم ڈرافٹ ڈے اگلے سال گیارہ اپریل کو سینما گھروں میں ریلیز کی جائیگی۔
