عیسائیوں کے مذہبی اور روحانی مرکز ویٹی کن سٹی کے سینٹ پیٹرز برگ اسکوائر میں ایک شخص نے خودسوزی کرلی۔
خود سوزی کرنے والے باون سالہ شخص کا دھڑ آگ لگنے کی وجہ سے شدید زخمی ہوگیا، ویٹی کن کے مذہبی پیشواؤں کا کہنا ہے کہ ریسکیو سروس کے پہنچنے سے قبل انہوں نے اس شخص کے جسم پر لگی آگ کو بجھانے کی کوشش کی تھی تاہم وہ اسے بچانے میں ناکام رہے، خود سوزی کرنیوالے شخص کی شناخت اور خود سوزی کی وجہ تا حال نہیں ہوسکی۔
امریکی خاتون اول مشل اوباما نے بچوں کے لئے کھلونے جمع کرنے کی مہم حصہ لیا۔
امریکی خاتون اول مشل اوباما نے اینا کوسٹیا بولنگ بیس کا دورہ کیا، جہاں انہوں نے ننھے بچوں کے لئےکھلونے نامی مہم میں حصہ لیا، اپنے دورے میں وہ امریکی فوجی اہلکاروں کے بچوں سے بھی ملیں۔
اس موقع پر خطاب کرتے ہوئے ان کا کہنا تھا کہ جن بچوں کا بچپن غربت کی لکیر کے نیچے کہیں کھو جاتا ہے، ان بچوں کے لئے تحائف اور کھلونے جمع کرنے سے انہیں بہت خوشی حاصل ہورہی ہے۔
یاد رہے کہ ننھے بچوں کے لئے کھلونے نامی یہ مہم انیس سو سینتالیس سے مسلسل ہرسال امریکا میں منائی جاتی ہے۔
سندھ اسمبلی میں اپوزیشن جماعتوں نے بلدیاتی انتخابات کے حوالے سے ہائیکورٹ سے رجوع کرلیا۔
سندھ ہائی کورٹ میں بلدیاتی انتخابات میں حد بندیوں اور لوکل گورنمنٹ آرڈیننس کے خلاف درخواستوں کی سماعت جسٹس محمد علی مظہر اور جسٹس صادق بھٹی پر مشتمل دو رکنی بینچ نے کی ، متحدہ قومی موومنٹ کے رہنما بیرسٹر فروغ نسیم نے موقف اختیار کیا کہ آبادیوں کے فرق سے بنائی گئی یونین کمیٹیوں سے جمہوری حقوق متاثر ہو رہے ہیں اور یہ آئین و قانون کے ماورا ہیں۔
عدلت میں ایم کیو ایم کی جانب سے لوکل گورنمنٹ آرڈیننس کے خلاف بھی متفرق درخواست بھی دائر کردی گئی، بیرسٹر فروغ نسیم اور خواجہ اظہار الحسن مسلم لیگ ن کے رہنما عرفان اللہ مروت نے بھی سندھ ہائی کورٹ میں لوکل گورنمنٹ آرڈیننس کے خلاف آئینی درخواست داخل کردی ہے، جس میں آرڈیننس کو آئین و قانون کی خلاف ورزی اور اسمبلیوں کی توہین قراردیا گیا ہے۔
پیپلزپارٹی نے بلدیاتی انتخابات کے حوالے سے ایم کیو ایم کو منانے کی کوششیں شروع کردی ہیں۔
نثار کھوڑو نے ایم کیو ایم کے رہنما سید سردار احمد سے ملاقات کے بعد میڈیا سے گفتگو میں کہا کہ اسمبلی کا اجلاس بلانا ممبران کا حق ہے اور تمام معاملات اسمبلی میں لاکر حل کیے جائیں تو بہتر ہوگا۔
سینیئر وزیر سندھ اسمبلی ایم کیو ایم کے رہنما سردار احمد کا کہنا تھا کہ اسمبلی کا اجلاس اسی لیے بلایا کہ ایم کیو ایم اپنی بات ایوان میں رکھ سکے، بلدیاتی آرڈیننس کا معاملہ عدالت میں ہیں وہاں جو بھی فیصلہ ہوگا بہتر ہوگا، دونوں جماعتوں کے رہنماؤں نے مسائل کو اسمبلی میں بات چیت کے ذریعے حل کرنے پر اتفاق کیا۔
سابق وزیر خزانہ سلیم مانڈوی والا نے انکشاف کیا ہے کہ ان کے دور حکومت میں آئی ایم ایف نے سابق چیف جسٹس افتخار محمد چوہدری کو پاکستان کی ترقی میں سب سے بڑی رکاوٹ قرار دیا تھا۔
پارلیمنٹ ہاؤس کے باہر اے آروائی نیوزسے گفتگو کرتے ہوئے سینیٹر سلیم مانڈوی والا نے سال دوہزار تیرہ میں چیف جسٹس افتخار محمد چوہدری کی سبکدوشی کو ملکی مفاد میں اہم ترین قرار دیتے ہوئے کہا کہ افتخار چوہدری نے ملک کی سیاسی اور معاشی صورتحال کو نقصان پہنچانے میں اہم کردار ادا کیا۔
سلیم مانڈی والا ان کا کہنا تھا کہ ان باتوں سے انداز ہوتا ہے کہ اس پوزیشن پر آکر کوئی بھی شخص ملک کو کتنا نقصان پہنچا سکتا ہے۔
حضرت امام حسین کے چہلم کے موقع پر ملک بھر میں سیکیورٹی سخت کی جا رہی ہے، کئی شہروں میں موٹرسائیکل کی ڈبل سواری اور موبائل فون سروس بند رہے گی۔
حضرت امام حسین اور شُہدائے کربلا کے چہلم کے موقع پر کسی ناخوشگوار واقعے سے بچنے کیلئے ملک بھر میں سیکورٹی کے سخت انتظامات کیے جارہے ہیں، چہلم امام حسین کے موقع پر اسلام آباد میں تمام اہم امام بارگاہوں اورمساجد پرسکیورٹی بڑھا دی گئی ہے ، فوج تیار حالت میں رہے گی اور پولیس کے تین ہزاراہلکارتعینات ہونگے۔
اس موقع پر سندھ میں سیکورٹی انتظامات کا جائزہ لینے کیلئے صوبائی سیکرٹری داخلہ کی زیر صدارت اہم اجلاس ہوا، جس میں فیصلہ کیا گیا کہ کراچی اور حیدرآباد سمیت صوبے کے چھ شہروں میں موٹرسائیکل کی ڈبل سواری پر پابندی عائد کی جائے گی اور اہم شہروں میں موبائل سروس بند کرنے اور فوج کو اسٹینڈ بائی رہنےکیلئے وزارت دفاع کو خط لکھا جائے گا۔
سی سی پی او لاہور چوہدری شفیق کے مطابق میں چہلم حضرت امام حسین، حضرت داتا گنج بخش کے عرس اور کرسمس کے لئے سکیورٹی کے لئے انتظامات مکمل کرلئے گئے ہیں، اس موقع پر موٹرسائیکل کی ڈبل سواری پر پابندی رہے گی جبکہ موبائل فون سروس کی بندش کا فیصلہ چہلم سے ایک روز پہلے کیا جائے گا۔
فیصل آباد میں ڈویژنل انٹیلی جنس کمیٹی کے اجلاس میں چہلم محرم اور کرسمس سیکیورٹی انتظامات کا جائزہ لیا گیا۔
کراچی میں سچل کے علاقے عبداللہ شاہ غازی گوٹھ میں تیرہ سالہ لڑکی اجتماعی زیادتی نشانہ بنی، واقعہ کا مقدمہ لڑکی کے والد کی مدعیت میں سچل تھانے میں درج کرلیا گیا ہے۔
پولیس کے مطابق عبداللہ شاہ غازی گوٹ کی رہائشی جمعرات کی شب گھر سے سامان لینے نکلی جہاں دو ملزمان اسے اپنے ساتھ لے گئے اور اجتماعی زیادتی کا نشانہ بنایا۔
واقعہ کا مقدمہ لڑکی کے والد کی مدعیت میں سچل تھانے میں دو نامعلوم ملزمان کے خلاف درج کرلیا گیا ہے، لڑکی کو چیک اپ کیلئے جناح اسپتال منتقل کردیا گیا۔
لڑکی کے والد کا کہنا ہے کہ مجرموں کو گرفتار کرکے قرار واقعی سزا دی جائے اور انہیں انصاف فراہم کیا جائے۔
کراچی میں دومبینہ دہشتگردوں سمیت چھ ٹارگٹ کلرز پکڑے گئے جبکہ ٹارگٹڈ آپریشن میں مختلف علاقوں سے پچیس سے زائد جرائم پیشہ افراد کو حراست میں لے لیا گیا۔
سی آئی ڈی پولیس نے سرجانی ٹاون میں پولیس مقابلے کے بعد کالعدم تنظیم سے تعلق رکھنے والے دو دہشتگردوں آصف اور شہادت حسین کو گرفتار کرلیا، سی آئی ڈی حکام کے گرفتار ملزمان فرقہ وارانہ ٹارگٹ کلنگ اور ڈکیتیوں کی وارداتوں میں ملوث رہے ہیں۔
سی آئی ڈی پولیس کی مختلف ٹیموں نے لیاری اور بلدیہ ٹاون میں کاروائیاں کرتے ہوئے لیاری گینگ وار اور سیاسی جماعتوں سے تعلق رکھنے والے4ٹارگٹ کلرز کو بھی گرفتار کیا، کورنگی صنعتی ایریا میں پولیس نے مقابلے کے بعد دو ڈاکووں کو زخمی حالت میں گرفتار کیا۔
نیوکراچی اور سپر مارکیٹ سے بھی پولیس نے قتل اور بھتہ خوری میں ملوث2ملزمان کو گرفتار کرلیا، شہر کے دیگر علاقوں میں بھی سیکورٹی اداروں نے چھاپہ مار کاروائیوں کے دوران22ملزمان کو حراست میں لیکر تفتیش کیلئے نامعلوم مقام پر منتقل کردیا ہے۔
سپریم کورٹ نے لاپتہ افراد کیس میں قائم مقام آئی جی ایف سی سے تفصیلی رپورٹ طلب کرلی۔
سپریم کورٹ میں بلوچستان بدامنی اور لاپتہ افراد کی سماعت پر قائم مقام آئی جی ایف سی عدالت میں پیش ہوئے، قائم مقام آئی جی ایف سے نے عدالت عظمیٰ کو بتایا کہ ان کے پاس دس افراد تھے، جن میں سے تین کی شناخت ہوچکی ہیں، جونام یہاں دیئے گئے ہیں ان میں سے کوئی بھی ایف سی کی تحویل میں نہیں ہیں۔
سپریم کورٹ نے چھبیس دسمبر کو تفصیلی رپورٹ پیش کرنے کی ہدایت کردی، دوران سماعت صدر بلوچستان ہائیکورٹ بار نے کہا کہ صوبے میں چھبیس ڈاکٹرز اغوا کئے گئے اور سب نے تاوان دے کر رہائی پائی، پولیس حکام نے جواب میں بتایا کہ سول اسپتال اور نجی کلینکس کو سیکیورٹی فراہم کردی ہے، اس کے علاوہ ذاتی سیکیورٹی کیلئے اگر ڈاکٹرز درخواست دیں گے تو انھیں فوری اسلحہ لائسنس فراہم کیا جائے گا۔
کیبل آپریٹرز ایسوسی ایشن نے حکومت کی جانب سے لگائے گئے ٹیکس مسترد کردیئے ہیں، ایسوسی ایشن کے چیئرمین خالد آرائیں اورمرکزی جنرل سیکرٹری عمران ندیم نے کہا ہے کہ چاہے کچھ بھی ہوجائے، ایف بی آر کی جانب سے لگائے جانیوالے نئے ٹیکس کوئی بھی کیبل آپریٹر ادانہیں کرے گا۔
نیشنل پریس کلب میں پریس کانفرنس سے خطاب کرتے ہوئے کیبل آپریٹرز ایسوسی ایشن کے عہدیداروں کا کہنا تھا کہ حکومت کو اپنے مطالبات کے حوالے سے آگاہ کردیا ہے، مطالبات نہ مانے گئے تو اگلے ماہ پمرا آفس کے سامنے دھرنا اور بھوک ہڑتالی کیمپ لگائیں گے۔
کیبل آپریٹرز کو ابھی انڈسٹری کا درجہ بھی نہیں دیا گیا اور اتنے ٹیکس نافذ کردیئے گئے ہیں، ہم پمرا کا آدھا بجٹ دیتے ہیں، ٹی وی مالکان نئے کیبل آپریٹرز کے گروپ کوتسلیم نہ کرے اورنہ ہی ان کے ہاتھوں بلیک میل ہوںں۔
ٹیکسز کا نفاذ جاری رہا تو اس شعبے سے وابستہ دس لاکھ افراد بحران کا شکار ہوجائیں گے، ہمارا مطالبہ ہے کہ وفاقی وزیر اطلاعات اس سارے معاملے کا نوٹس لیتے ہوئے ٹیکس کوختم کروائیں۔
