وزیر دفاع خواجہ آصف کا کہنا ہے کہ سکیورٹی فورسز پر حملے برداشت نہیں، شمالی وزیرستان میں غیر ملکی دہشت گردوں کیخلاف کوئی رعائیت نہیں برتی جائے گی۔

وزیر دفاع خواجہ آصف نے کہا ہے کہ سکیورٹی فورسز پر حملے برداشت نہیں کئے جائیں، وزیرستان میں سکیورٹی فورسز کے قافلوں کو نشانہ بنایا گیا جس کے نتیجے میں سکیورٹی فورسز کے کئی اہلکار شہید ہوئے، حملوں میں غیر ملکی دہشت گردوں کے ملوث ہونے کے شواہد ملے ہیں ۔

وزیر دفاع نے کہا کہ سکیورٹی فورسز کو دہشت گردوں کے خلاف جوابی کاروائی کا مکمل حق حاصل ہے اور اس حق سے دستبردار نہیں ہوں گے، ۔ انھوں نے کہا شمالی وزیرستان میں غیر ملکی شدت پسندوں کیخلاف کاروائی سکیورٹی فورسز پر حملوں کا نتیجہ ہے۔
       

مولانا فضل الرحمٰن نے وزیراعظم نوازشریف سے شمالی وزیرستان میں آپریشن بند کرنے کا مطالبہ کر دیا، جے یو آئی کے سربراہ آج بھارتی وزیراعظم سے ملاقات بھی کریں گے، مولانا فضل الرحمان ان دنوں بھارت کے دورے پر ہیں۔

مولانا فضل الرحمٰن نے نئی دہلی سے وزیراعظم نوازشریف کو ٹیلی فون کیا اور شمالی وزیرستان میں آپریشن بند کرنے کا مطالبہ کردیا، مولانا فضل الرحمان کا کہنا ہے کہ شمالی وزیرستان میں آپریشن بند کرکے وہاں پر زخمیوں کو اسپتالوں میں منتقل کیا جائے۔

انکا کہنا تھا کہ حکومت قیام امن کے لئے بات چیت کرے، جے یو آئی کے سربراہ کا مطالبہ ایسے وقت سامنے آیا ہے، جب شمالی وزیرستان میں فورسز پر حملے کے بعد آپریشن شروع کر دیا گیا ہے، عسکری حکام کے مطابق خود کش دھماکے میں زخمی جوانوں کو واپس لے جانے والے سیکورٹی فورسز کے قافلے پر حملہ کیا گیا تھا۔

فورسزکی موثر کاروائی میں تینتیس شدت پسند مارے گئے، مارے جانے والوں کی اکثریت ازبک نژاد ہے، سیکورٹی فورسز اردگرد کےعلاقوں میں سرچ آپریشن کررہی ہیں۔

ملک کے مختلف شہروں میں سردی کا راج ہے، آئندہ چند روز تک ملک کے بیشتر میدانی علاقوں میں دھند کا سلسلہ جاری رہے گا جبکہ ملک کے بیشتر علاقوں میں موسم سرد اور خشک رہنے کا امکان ہے۔

موسم سرما کی یخ بستہ ہواؤں نے ملک کے مختلف شہروں کا رخ کرلیا ہے، گرم کپڑے اور کمبل سب باہر نکل آئے، تھر تھر کرتی سردی نے گرما گرم قہوے ، چائے اور سوپ کا مزہ دوبالہ کردیا ہے۔

محکمہ موسمیات کے مطابق پنجاب کے بیشترعلاقوں لاہور، گوجرانوالہ، فیصل آباد، ساہیوال، ملتان اور بہاولپور ڈویژن سمیت پشاور اور سکھر میں دھند کا راج رہے گا جبکہ آئندہ چند روز میں دھند کی شدت میں کمی آنے کا امکان ہے۔

رواں ہفتے ملک کے بیشتر علاقوں میں موسم سرد اور خشک رہے گا تاہم اسلام آباد، راولپنڈی، گوجرانوالہ اور کشمیر میں سورج بادلوں کی اوٹ میں چھپا رہے گا اور پہاڑوں پر برفباری بھی ہوسکتی ہے، کوئٹہ سمیت بلوچستان کے بالائی علاقے شدید سردی کی لپیٹ میں ہیں۔

سرد علاقوں میں سوئی گیس ہیٹر کے استعمال میں اضافہ ہوگیا ہے، گیس پریشر میں کمی سے لوگوں کو سخت پریشانی کا سامنا ہے، ملک میں سب سے کم درجہ حرارت قلات میں منفی آٹھ ڈگری سینٹی گریڈ ریکارڈ کیا گیا۔
   

میرپور بھٹورو میں ٹرک اور موٹر سائیکل میں تصادم نے تین افراد کی جان لے لی جبکہ پشاور میں اسکول وین الٹنے کے سبب گیارہ بچے زخمی ہوگئے۔

ملک کے مختلف شہروں میں سڑکوں کی مخدوش حالت اور سردی میں دھند کے باعث ٹریفک حادثات معمول بن گئے، سندھ کے علاقے میرپور بھٹورو میں ٹرک اور موٹر سائیکل میں تصادم کے باعث تین افراد زندگی سے ہاتھ دھو بیٹھے۔

پشاور میں رنگ روڈ پل کے قریب اسکول وین الٹ گئی، جائے حادثہ پر موجود افراد نے وین میں پھنسے بچوں کو باہر نکالا، حادثے میں گیارہ بچے زخمی ہوئے، چار بچوں کو ابتدائی طبی امداد کے بعد فارغ کر دیا گیا۔

سات بچے اسپتال میں زیر علاج ہیں، پولیس نے وین ڈرائیور کو گرفتار کرلیا، حادثے کی وجہ غلط اوور ٹیکنگ بتائی جاتی ہے، ہری پور میں دو مختلف ٹریفک حادثات میں ایک خاتون جاں بحق اور چار زخمی ہوگئیں۔

زخمی خواتین کو فوری طبی امداد کے لئے اسپتال منتقل کر دیا گیا، کراچی میں کاٹھور پل کے قریب گاڑی الٹ گئی، حادثے میں تیرہ افراد زخمی ہوگئے جنھیں طبی امداد کے لئے اسپتال منتقل کر دیا گیا۔
 

معروف تجزیہ نگار اور سینئرصحافی ہارون الرشید نے کہا ہے کہ خواجہ سعد رفیق تحریک انصاف میں شامل ہونا چاہتے تھے۔

اے آر وائی کے پروگرام الیونتھ آور میں ہارون الرشید نے بتایا کہ انہوں نے سعد رفیق کی عمران خان سے ملاقات کرائی، جس میں سعد رفیق تحریک انصاف میں شامل ہوگئے اور انکے عہدے کا فیصلہ بھی کرلیا گیا، لیکن بعد میں دونوں جانب سے خاموشی چھاگئی۔