عراق کے دارالحکومت بغداد میں خود کش بم دھماکوں میں تقریبا چھتیس افراد ہلاک اور درجنوں زخمی ہوگئے۔

ذرائع کے مطابق ذیادہ ہلاکتیں بغداد کے جنوبی ضلع دورہ میں ہوئیں، جہاں ایک خود کش بمبار نے ایک مذہبی اجتماع میں اپنے آپ کو دھماکے سے اڑا دیا، جس کے نتیجے میں چودہ افراد جاں بحق اور اٹھائیس زخمی ہوگئے۔

دوسرا واقعہ بغداد کے جنوب مغرب یوسفیہ میں پیش آیا، جہاں دھماکے سے تقریبا دس افراد جاں بحق ہوئے اور متعدد زخمی ہوئے، اس علاوہ عراق کے دیگر حصوں سے بھی عراقی شہریوں کی ہلاکتوں کی اطلاعات موصول ہوئیں ہیں،عراقی حکومت کے اعداد و شمار کے مطابق سینکڑوں افراد گزشتہ ماہ جاں بحق ہوچکے ہیں۔
   

جنوبی سوڈان میں امن فوجیوں کے بیس پر باغیوں کے حملے میں اقوام متحدہ کے تین اہلکار مارے گئے۔

اقوام متحدہ کےنائب ترجمان فرحان حق کے مطابق جنوبی سوڈانی ریاست جونگلی میں باغیوں نے امن فوجیوں کے بیس کیمپ پر حملہ کردیا، حملے کے وقت بیس میں فوجیوں کے ساتھ پناہ لینے والے عام شہریوں کی بھی بڑی تعداد موجود تھی۔

اقوام متحدہ کے ترجمان کے مطابق جونگلی کی صورت حال انتہائی تشویش ناک ہے، باغیوں نے پناہ گزین افراد کو نشانہ بنانے کے لیے آپریٹینگ بیس پر حملہ کیا، اقوام متحدہ کے ترجمان کا کہنا ہے کہ غیر مسلح امن فوجیوں کو نکالنے کی کوشش کی جائے گی جبکہ مالاکل سے اضافی فوج طلب کرلی ہے۔
   
   

امریکی سیکریٹری دفاع چیک ہیگل نےکہا ہےکہ جنوبی چین کے سمندر کے بارے میں چین کا رویہ قابل اعتراض اور غیر ذمہ دارانہ ہے۔

چین کیجانب سے جنوبی کوریا کے کچھ علاقوں میں نو فلائی زون کے قیام کےمعاملے پرامریکہ اور چین کے درمیان ان دنوں تعلقات نازک موڑ پر آ گئے ہیں۔

چین نےالزام عائد کیا ہے کہ معمول کی گشت کرنے والے چینی بحریہ کے جہاز کے عملے کو امریکی نیوی کے جہاز پر موجود نیوی اہلکاروں نے مشتعل کیا، جس کے باعث فائرنگ کا واقعہ پیش آیا، دوسری طرف امریکن فوجیوں نے اس واقعےکو الگ انداز میں پیش کیا ہے۔

سعودی عرب حکام کا تارکین وطن کے خلاف کریک ڈاؤن جاری ہے، ایک لاکھ سے زائد ایتھوپین باشندے وطن واپس پہنچ گئے۔

سعودی حکام کی جانب سے ویزا پالیسی میں سختی کے بعد تارکین وطن کے خلاف کریک ڈاؤن میں لاکھوں باشندے اپنے ممالک جانے پر مجبور ہوگئے، وزارت خارجہ کے مطابق ایک لاکھ چالیس ہزار سے زائد ایتھوپین باشندوں کو ڈی پورٹ کیا جاچکا ہے اور ایک اندازے کے مطابق تعداد ایک لاکھ پچاس ہزار تک پہنچ جائے گی۔

حکام کا کہنا ہے کہ ڈی پورٹ افراد نے لیبر اور امیگریشن قوانین کی پاسداری نہیں کی، جسکے باعث انہیں یہ اقدام اٹھانا پڑا، سعودی عرب کے اس اقدام پر خلیجی ممالک میں عوامی سطح پر احتجاج کیا گیا۔
   

یوکرائن میں حکومت کے خلاف مظاہروں کا سلسلہ جاری ہے، یوکرائن کی پارلیمنٹ نے حکومت مخالف مظاہروں کے دوران گرفتار مظاہرین کی سزا معاف کرنے پر اتفاق کرلیا ہے۔

مظاہرین نے یورپی یونین سے آزاد تجارتی معاہدہ نہ کرنے بعد حکومت کے خلاف مظاہرے کا آغاز کیا اورمظاہرین صدر وکٹر یانوکووچ کے استعفی کا بھی مطالبہ کر رہے ہیں۔

حکومت نے نومبر کے آخر میں حکومت مخالف مظاہرین کی بڑی تعداد کو گرفتار کیا، جس پر بین الاقوامی رہنماؤں نے حکومت کے اس اقدام کی سخت مذمت کرتے ہوئے تمام مسئلے بات چیت کے زریعے حل کرنے پر زور دیا تھا۔

یوکرائنی پارلیمنٹ نے حکومت مخالف مظاہروں کے دوران پولیس کے ساتھ جھڑپوں کے بعد گرفتار مظاہرین کی سزا معاف کرنے پر اتفاق کیا ہے، تاہم یہ معلوم نہیں ہوسکا ہے کہ گرفتار کئے گئے مظاہرین کی رہائی کب تک عمل میں آئے گی۔

تھائی لینڈ میں حکومت کے خلاف احتجاج جاری ہے، اپوزیشن کی قیادت میں مظاہرین تھائی لینڈ کی سڑکوں پرنکل آئے۔

تھائی لینڈ میں حکومت مخالف مظاہرے جاری ہیں، اپوزیشن کی قیادت میں مظاہرین نے بنکاک کی سڑکوں پر مارچ کیا، مظاہرین تھائی لینڈ کی نگراں وزیراعظم کی برطرفی کے خلاف مظاہرے کر رہے تھے۔

مظاہرین کا کہنا تھا کہ جب تک نگراں وزیراعظم مستعفی نہیں ہونگے، وہ ان کیخلاف احتجاج جاری رکھیں گے، اس قبل وزیراعظم ینگ لک شناواترا نے گذشتہ ہفتے پارلمینٹ تحلیل کردی تھی اور فروری میں انتخابات کا اعلان کیا تھا مظاہرے میں ہزاروں افراد نے شرکت کی۔
   

روسی صدر ولادیمیر پوٹن نے امریکی بل کے حوالے سے وائٹ ہاؤس کی جانب سے جاری بیان کا خیرمقدم کرتے ہوئے کہا ہے کہ پرامن جوہری پروگرام ایران کا حق ہے۔

ماسکو میں ایک نیوز کانفرنس سے خطاب کرتے ہوئے روسی صدرکا کہنا تھا کہ ایران کے خلاف نئی پابندیاں عائد کرنے سے ایران اورعالمی طاقتوں کے درمیان ہونے والے معاہدے کو نقصان پہنچ سکتا ہے، صدر ولادیمیر پوٹن کا کہنا تھا کہ پرامن جوہری پروگرام ایران کا حق ہے، جسے عالمی برادری کو تسلیم کرنا چاہیے۔
    
   

عیسائیوں کے مذہبی اور روحانی مرکز ویٹی کن سٹی کے سینٹ پیٹرز برگ اسکوائر میں ایک شخص نے خودسوزی کرلی۔

خود سوزی کرنے والے باون سالہ شخص کا دھڑ آگ لگنے کی وجہ سے شدید زخمی ہوگیا، ویٹی کن کے مذہبی پیشواؤں کا کہنا ہے کہ ریسکیو سروس کے پہنچنے سے قبل انہوں نے اس شخص کے جسم پر لگی آگ کو بجھانے کی کوشش کی تھی تاہم وہ اسے بچانے میں ناکام رہے، خود سوزی کرنیوالے شخص کی شناخت اور خود سوزی کی وجہ تا حال نہیں ہوسکی۔
   

امریکی خاتون اول مشل اوباما نے بچوں کے لئے کھلونے جمع کرنے کی مہم حصہ لیا۔

امریکی خاتون اول مشل اوباما نے اینا کوسٹیا بولنگ بیس کا دورہ کیا، جہاں انہوں نے ننھے بچوں کے لئےکھلونے نامی مہم میں حصہ لیا، اپنے دورے میں وہ امریکی فوجی اہلکاروں کے بچوں سے بھی ملیں۔

اس موقع پر خطاب کرتے ہوئے ان کا کہنا تھا کہ جن بچوں کا بچپن غربت کی لکیر کے نیچے کہیں کھو جاتا ہے، ان بچوں کے لئے تحائف اور کھلونے جمع کرنے سے انہیں بہت خوشی حاصل ہورہی ہے۔

یاد رہے کہ ننھے بچوں کے لئے کھلونے نامی یہ مہم انیس سو سینتالیس سے مسلسل ہرسال امریکا میں منائی جاتی ہے۔