کالعدم تحریک طالبان پاکستان نے حکومت کی جانب سے مذاکرات کی کسی بھی پیشکش کومسترد نےکا اعلان کردیا، غیر ملکی خبر ایجنسی کے مطابق کالعدم طالبان کے سربراہ ملا فضل اللہ کا کہنا ہے کہ حکومت سے امن مذاکرات بے معنی ہیں، وہ پاکستان میں اپنی کارروائیاں جاری رکھیں گے، ملا فضل اللہ نے الزام عائد کیا کہ حکومت در پردہ ان کیخلاف ایکشن کا منصوبہ بنارہی ہے۔
کراچی : اورنگی ٹاون میں ہونے والا دھماکہ معمہ بن گیا
اورنگی ٹاون میں ہونے والا دھماکہ معمہ بن گیا ، پولیس کا کہنا ہے کہ دھماکہ گیس پائپ لائن پھٹنے سے ہوا جبکہ تحقیقاتی اداروں کا کہنا ہے کہ دھماکہ کریکر بم کا ہے۔
اورنگی ٹاون کے علاقے قصبہ کالونی میں عسکری اسپتال کے قریب زوردار دھماکہ ہوا۔ دھماکے کے کچھ دیر بعد ہی ایس پی اورنگی چودھری اسد نے دھماکے کو گیس پائپ لائن کا دھماکا قرار دیدیا۔ لیکن جب بم ڈسپوزل اسکواڈ اور تحقیقاتی ٹیموں نے تحقیقات کے بعد میڈیا کو بتایا کہ دھماکہ پائپ لائن پھٹنے کا نہیں بلکہ کریکر حملے کا ہے ۔
بم ڈسپوزل اسکواڈ کا کہنا تھا کہ جائے وقوعہ سے کریکر پھٹنے کے شواہد بھی ملے ہیں۔اورقریبی مکان کو جزوی نقصان پہنچا ہے ،پولیس ذرائع کا کہنا جس مکان کو نقصان پہنچا ہے وہ سابقہ یوسی ناظم صدیق اکبر کا ہے ، تحقیقاتی ادروں نے شبہ ظاہر کیا ہے کہ کریکر حملہ سابقہ یوسی ناظم کے گھر پر کیا گیا ہے۔
جماعت اسلامی سندھ لوکل باڈیز آرڈیننس عدالت میں چیلنج کرے گی، حافظ نعیم
جماعت اسلامی کراچی نے سندھ کےبلدیاتی آرڈیننس کو عدالت میں چیلنج کرنے کا فیصلہ کیا ہے، جماعت اسلامی کراچی کے امیر حافظ نعیم الرحمان کے مطابق سندھ بلدیاتی آرڈیننس دو ہزار تیرہ عوام کی توہین اور جمہوریت کی نفی ہے ، جس میں پینل کا نظام متعارف کروا کر فلور کراسنگ اور ہارس ٹریڈنگ کا راستہ کھولا گیا ہے ، انہوں نے کہا کہ سندھ بلدیاتی آرڈیننس کے ذریعے کراچی میٹروپولیٹن کارپوریشن کے اختیارات سلب کیے گئے ہیں۔
راولپنڈی: امام بارگاہ کے باہردھماکا، پولیس اہلکار سمیت 3 جاں بحق
راولپنڈی کے علاقے گریسی لائن کی امام بارگاہ کے باہرخود کش بم دھماکے میں ایک پولیس اہلکار سمیت تین افراد جاں بحق اور دس افراد زخمی ہو گئے۔
ابتدائی اطلاعات کے مطابق خود کش حملہ آورنے ایئرپورٹ کے قریبی علاقے گریسی لائن کی امام کے پارکنگ ایریا میں خود کواڑالیا جس سے ایک سب انسپکٹر اور دو شہری جاں بحق ہوگئے۔ زخمیوں میں ایس ایچ او سمبیت تین پولیس اہلکاربھی شامل ہیں جنھیں اسپتال منتقل کردیا گیا ہے۔
دھماکے سے کئی گاڑیوں اورموٹرسائیکلوں کونقصان پہنچا ہے۔ دھماکے کے وقت امام بار گاہ میں مجلس عزاجاری تھی۔ دھماکے کی اطلاع ملتے ہی امدادی عملہ اور پولیس حکام موقعے پرپہنچ گئے ہیں اور علاقے کو گھیرے میں لے لیا ہے جبکہ بم ڈسپوزل یونٹ علاقے کا سرچ آپریشن بھی کر رہا ہے۔
پاک بھارت ڈائرکٹر جنرل ملٹری آپریشنز ملاقات 24 دسمبر کوہوگی
پاکستان اور بھارت کے ڈائرکٹر جنرلز ملٹری آپریشنز کی ملاقات چوبیس دسمبر کو ہوگی،اس ملاقات کی دعوت پاک فوج کے ڈائریکٹر جنرل ملٹری آپریشنز میجر جنرل عامر ریاض نے بھارتی ہم منصب کو دی تھی۔
آئی ایس پی آر کے ایک ترجمان نے اس کی تصدیق کرتے ہوئے بتایا کہ کہ ڈی جی ایم او میجر جنرل عامر ریاض کی جانب سے چوبیس دسمبر کو اپنے بھارتی ہم منصب کو ملاقات کی دعوت دی گئی ہے۔
ذرائع کے مطابق اس ملاقات میں پاک بھارت سرحدی صورتحال سمیت لائن آف کنٹرول کی صورتحال بالخصوص ماضی قریب میں ایل اوسی پر سیز فائر کی خلاف ورزی کے جس میں دونوں جانب سے جوانوں اور افسروں سمیت عام شہریوں کی ہلاکت کے واقعات سامنے آئے اور املاک کو نقصان پہنچا ، یہ ملاقات پاک بھارت وزرائے اعظم کی نیویارک میں ہونے والی ملاقات کے طے پانے والے فیصلوں کی روشنی میں ہو گی۔
مولانا فضل الرحمان کی بھارتی وزیر خارجہ سلمان خورشید سے نئی دہلی میں ملاقات
ملاقات میں مولانا فضل الرحمن نے کہا ہے کہ وہ پیغام امن کے ساتھ بھارت آئے ہیں، دنیا کی ترجیحات تبدیل ہوچکی ہیں، کشمیر سمیت تصفیہ طلب مسائل کو مذاکرات کے ذریعے حل کیاجائے، انہوں نے کہا کہ پاکستان بھارت سمیت تمام ممالک سے برابری کی سطح پر بہتر تعلقات کا خواہاں ہے ۔
بھارتی وزیر خارجہ سلمان خورشید نے مو لا نا فضل الرحمن کی بھارت میں آمد کا خیرمقدم کرتے ہوئے کہا ہے اس طرح کے دوروں سے عوام میں قربت بڑھے گی۔
مولانا فضل الرحمن کا اس موقع پر کہنا تھا امن کےلئے مسئلہ کشمیر سمیت تمام تصفیہ طلب معاملات کا مذاکرات کی میز پر حل ہونا چاہیئے ، سلمان خورشید نے اتفاق کیا کہ اگر دونوں ممالک کی عوام میں رابطوں میں تیزی لائی جائے تو خوشگوار تعلقات کا ایک نیا سلسلہ شروع ہوجائےگا۔
فیصلہ کرنا ہوگا کہ ملک کو لبرل ریاست بنانا ہے یا مذہبی ریاست، الطاف حسین
ایم کیو ایم انٹر نیشنل سیکریٹریٹ میں خطاب کرتے ہوئے الطاف حسین نے کہا ہے اب گومگوں کی کیفیت سے باہر نکل کر مستقبل کے بارے میں فیصلہ کرنا ہوگا کہ ملک کو لبرل ریاست بنانا ہے یا مذہبی ریاست ان کا کہنا تھا زندہ قومیں ماضی کی غلطیوں سے سبق سیکھتی ہیں۔
سقوط ڈھاکہ سے قبل بھی اجتماعی غفلت طاری تھی اور آج بھی غفلت کا مظاہرہ کیا جارہا ہے ۔ ان کا کہنا تھا بلوچستان میں علیحدگی کی تحریک چل رہی ہے ،خیبر پختونخواہ میں ڈیورنڈ لائن کا تنازع ہے۔
اندرون سندھ سندھو دیش تحریک کے حمایتی موجود ہیں ماضی میں گریٹر پنجاب کے منصوبے کا انکشاف بھی ہوا ۔۔ الطاف حسین نے کہا اردو بولنے والوں میں بھی یہ احساس جنم لے رہا ہے کہ انکا مستقبل کیا ہوگا ، الطاف حسین کا کہنا تھا پاکستان بین الاقوامی سطح پر تنہائی کا شکار ہوتا جارہا ہے پاکستان بچانے کیلئے اب فیصلے کرنا ہونگے۔
ریلیاں اور دھرنے عمران خان کا دھرم بن چکے ہیں ، حمزہ شہباز شریف
قومی اسمبلی کے رکن اور وزیراعلی پنجاب کے صاحبزادے میاں حمزہ شہباز شریف نے کہا ہے کہ ریلیاں اور دھرنے عمران خان کا دھرم بن چکے ہیں وہ قوم کی آنکھوں میں دھول مت جھونکیں اور انتخابی نتائج کو تسلیم کریں ۔
لاہور میں میڈیا سے گفتگو میں رکن قومی اسمبلی میاں حمزہ شہباز شریف کا کہنا تھا قوم دھاندلی کے الزامات کا رونا سن کر تھک چکی ہے، تحریک انصاف کے چئیرمین اب قوم کی آنکھوں میں مزید دھول مت جھونکیں۔
انہوں نے تسلیم کیا کہ اشیا ءخوردونوش کی قیمتوں اور مہنگائی میں اضافہ ہوا ہے تاہم حکومتی اقدامات کے بعد ان پر قابو پالیا گیا ہے۔
ایک سوال کے جواب میں حمزہ شہباز کا کہنا تھا کہ ووٹوں کی تصدیق صرف مقناطیسی سیاسی سے ہی ممکن ہے تاہم عمران خان اب خیبرپختونخواہ کی حکومتی کارکردگی پر توجہ دیں۔
پولنگ اسٹیشن پرقبضے نہیں کرنے دیں گے، شرجیل میمن
سندھ کے وزیر اطلاعات شرجیل انعام میمن نے کہا ہے کہ اس بار کسی کو پولنگ اسٹیشن پر قبضہ کرنے نہیں دیا جائےگا، ترمیمی آرڈیننس پر اعتراض کرنے والوں نے شکست تسلیم کر لی۔
سندھ کے وزیر اطلاعات نے اطلاع دی ہے کہ حکومت سندھ اپوزیشن کی درخواست پر سندھ اسمبلی کا اجلاس جلد بلوائے گی، اور اس میں سندھ لوکل باڈیز آرڈیننس دو ہزرا تیرہ پر بحث بھی کرائے ،گی ، انہوں نے کہا کہ آرڈیننس پر تنقید کرنے والوں نے مشرف کے اقدامات پر لبیک کہا تھا ۔
انہوں نے دعویٰ کیا کہ اس بار صوبے میں بلدیاتی انتخابات شفاف ہوں گے اور ان کے نتائج بھی عام انتخابات کے مقابلے میں بہتر ہوں گے۔ شرجیل میمن نے کہا کہ ماضی میں دھاندلی اور پولنگ اسٹیشنز پر قبضے کیے جاتے رہے اور عوامی مینڈیٹ چوری کیا جاتا رہا تاہم اس بارکسی کو بھی پولنگ اسٹیشنز پر قبضہ نہیں کرنے دیاجائے گا۔
شرجیل میمن نے کہا کہ ایم کیو ایم جو اس آرڈیننس کو غیر قانونی قرار دے رہی ہے ان کے اپنے ہی گورنر نے 2 آرڈیننس پر دستخط کئے ہیں اور اب ایم کیو ایم کے ساتھی تیسرے آرڈیننس جاری کرنے کی مخالفت کررہے ہیں۔اور اپنی شکست کو چھپانے کے لئے واویلا کرہے ہیں۔انہوں نے یہ دعویٰ بھی کیا کہ نئی ضلعی حکومتیں بھی خودمختار ہوں گی۔
حیدرآباد میں بھی کراچی طرز کا آپریشن ہوگا ، ترجمان وزیر اعلی سندھ
ترجمان وزیر اعلی سندھ نے کہا ہے کہ حیدرآباد میں بھی رینجرز اور پولیس کی مدد سے کراچی طرز کا آپریشن کیا جائے گا، حیدر آباد اور کوٹری میں تاجروں سے ملاقات میں تاجروں اور صنعت کاروں نے وزیر اعلی سندھ کو امن و امان کی مخدوش صورت حال سےآگاہ کیا ۔
وزیر اعلی سندھ نے ڈی آئی جی اور ایس ایس پی کو ایک ماہ میں حیدر آباد سے بھتہ خوری کا خاتمہ کرنے کا حکم دیا ، وزیر اعلی سندھ نے حیدر آباد پولیس کو 10 نئی موبائلیں فراہم کرنے کا بھی اعلان کیا ۔ وزیر اعلی سندھ نے اس موقع پر تاجروں کو یقین دلایا کہ حیدر آباد ایئر پورٹ دوبارہ بحال کرنے کے لئے وفاقی حکومت سے رجوع کرینگے۔۔