جنوبی افریقہ اور بھارت کے درمیان دو ٹیسٹ کی سیریز کا پہلا میچ کل جوہانسبرگ میں کھیلا جائے گا, بھارت کا ون ڈے سیریز میں تو کوئی حربہ نہ چل سکا، اب ٹیسٹ سیریز میں وہ قسمت آزمائی کرنے کے لئے پھر سے جنوبی افریقہ کے مدمقابل آرہے ہیں، اس بار فارمیٹ تبدیل کئے گئے ہیں لیکن ٹیمیں وہیں ہیں۔

آئی سی سی ٹیسٹ رینکنگ کی دو ٹاپ ٹیموں کے درمیان بدھ سے جوہانسبرگ میں اعصاب شکن مقابلہ ہوگا۔ بھارت کے پاس ون ڈے سیریز کی شکست کا بدلہ لینے کا بہترین موقع ہے۔ ادھر جنوبی افریقہ ہوم گراؤنڈ پر بھارتی سورماؤں کا غرور خاک میں ملانے کے لئے بے تاب ہیں۔

جنوبی افریقہ ہوم گراؤنڈ پر بھارت کے خلاف ٹیسٹ سیریز میں اب تک ناقابل شکست ہے۔ بھارت کے خلاف تینوں ون ڈے میں سینچری بنانے والے جنوبی افریقی اوپنر کوانٹن ڈی کوک ٹیسٹ اسکواڈ کا حصہ نہیں ہیں۔

بھارتی کپتان مہندر سنگھ دھونی کا کہنا ہے کہ ون ڈے سیریز گزر گئی کھلاڑیوں کو تمام تر توجہ اب ٹیسٹ پر مرکوز کرنا ہوگی۔ ادھر جنوبی افریقی ٹیم کے کپتان گریم اسمتھ نمبر ون پوزیشن مزید مستحکم کرنے کے لئے بے تاب ہیں۔

پاکستان اور سری لنکا کے درمیان پانچ میچز کی سیریز کا پہلا ون ڈے کل شارجہ میں کھیلا جائے گا۔ دونوں ٹیموں کے کپتان سیریز کا آغاز کامیابی کے ساتھ کرنے کے لئے پرعزم ہیں۔ شارجہ کا میدان پاکستان کے لئے ہوم گراؤنڈ جیسا ہی ہے۔

اس گراؤنڈ پر قومی ٹیم کی کئی سنہری یادیں بھی وابستہ ہیں۔ سری لنکا کے خلاف بھی پاکستان کا شارجہ میں ریکارڈ کافی اچھا ہے۔ دونوں ٹیموں کے درمیان شارجہ میں مجموعی طور پر تینتیس میچز کھیلے گئے۔ بیس میں پاکستان اور بارہ میں سری لنکا نے میدان مارا۔

اس ریکارڈ کو مزید بہتر کرنے کے لئے پاکستانی ٹیم پانچ میچز کی سیریز میں سری لنکا کے مدمقابل آرہی ہے۔ پہلے میچ کی تیاری کے لئے دونوں ٹیمیں بھرپور پریکٹس کررہی ہیں۔ شارجہ میں دونوں ٹیموں کے کپتانوں کی پریس کانفرنس سے قبل ٹرافی کی تقریب رونمائی کے موقع پر کپتان مصباح الحق کا کہنا تھا کہ ون ڈے سیریز میں بیٹسمینوں کا کردار بہت اہم ہوگا۔ ٹاپ چھ بلے بازوں کو پچاس اوورز کھیلنا ہوں گے۔

ادھر سری لنکن کپتان اینجلو میتھیوز نے سیریز کا آغاز کامیابی کے ساتھ کرنے کا عزم ظاہر کیا ہے۔ حیران کن طور پر دونوں ٹیمیں ڈیڑھ سال کے بعد ایک روزہ کرکٹ میں مدمقابل آرہی ہیں۔ اس سے قبل کھیلی گئی سیریز سری لنکا کے نام رہی تھی۔