جولائی سے نومبر تک پاکستانی اشیائے خورد ونوش کی برآمدات میں دو اعشاریہ چھ تین فیصد اضافہ ہوا ہے۔ پاکستان بیوروشماریات کے مطابق برآمداد ایک ارب اکسٹھ کروڑ پچاس لاکھ گیارہ ہزار ڈالر تک پہنچ گئی ہیں۔ گزشتہ پانچ ماہ میں فوڈ گروپ میں چاول کی برآمد میں اٹھارہ فیصد اضافہ ہوا۔
مچھلی میں سولہ ، پھلوں میں چالیس، سبزیوں میں تینتیس، دالوں میں ایک سوستاسی اور تمباکو میں انتیس فیصد اضافہ ہوا جبکہ گندم، چینی، اورمصالحہ جات کی برآمد میں کمی ہوئی ۔
متحدہ عرب امارات میں امریکی شہری پر سائبر کرائم ثابت ہونے پر جیل بھیج دیا گیا۔
جیل بھیجے جانے والوں میں امریکی شہری سمیت کینیڈین اور برطانوی خاتون اور دو بھارتی باشندے بھی شامل ہیں، انتیس سالہ امریکی شہری شیزان قاسم پر اماراتی نوجوانوں کی مضحکہ خیز ویڈیو بنانے اوریو ٹیوب پر اپ لوڈ کرنے کا الزام ہے۔
انیس منٹ کی ستوا کامیڈی اسکول نامی ویڈیو میں دبئی کےضلع ستوا میں واقع اسکول کے طلبہ کو مذاق کا نشانہ بنایا گیا تھا، اماراتی عدالت نے ایک سال قید سمیت ان ملزمان پر پانچ سے دس ہزار درہم جرمانہ بھی عائد کیا ہے۔
سابق صدر ارجنٹائن ڈی لا رُوا رشوت خوری کے الزامات ثابت نہ ہونے پر بری کردیئے گئے۔
سابق صدر پر دوہزار گیارہ میں رشوت خوری کے الزامات عائد کئے گئے تھے، جس کے بعد انہیں عہدے سے برخاست کر دیا گیا تھا، تاہم دو سال سے جاری مقدمے کے دوران گواہوں کے بیانات میں تضاد اور مضبوط پراسکیوشن کے باعث عدالت نے انہیں الزامات سے بری کر دیا۔
سابق صدر نے احاطہ عدالت میں میڈیا سے گفتگو کرتے ہوئے کہا کہ ان پر مقدمات سیاسی مخاصمت کی وجہ سے قائم کئےگئے، جن کا کوئی وجود نہیں تھا۔
لاہور میں پاک ترک بزنس فورم سے خطاب میں وزیراعظم پاکستان اور ترک وزیراعظم نے دو طرفہ تجارت میں توسیع کے مواقع پر کھل کر بات کی۔
لاہور میں پاک ترک بزنس فورم سے خطاب میں وزیراعظم نواز شریف نے ترک وزیراعظم رجب طیب اردگان کا خیر مقدم کرتے ہوئے کہا کہ پاک ترک اقتصادی تعلقات بڑھانے کے وسیع مواقع موجود ہیں۔
نواز شریف نے اس یقین کا اظہار کیا کہ ترکی کے تاجر پاکستان میں مزید سرمایہ کاری کریں گے، ترک تاجروں کے دورہ سے دونوں ملکوں کے درمیان تجارت کا نیا باب کھلے گا، اور مستقبل میں پاک ترک تعلقات کومزید فروغ حاصل ہوگا۔
ترک وزیراعظم نے کہا کہ ترکی اور پاکستان کے ساتھ تجارت کے حجم کو مزید بڑھانا چاہتا ہے اور وہ وزیراعظم نواز شریف کے ساتھ کندھے سے کندھا ملا کر چلنا چاہتے ہیں۔
روپے کے مقابلے میں ڈالر کی اڑان مزید کمزور ہوگئی۔ اوپن مارکیٹ میں ڈالر ایک سو چھ روپے کی سطح پرفروخت ہورہا ہے,ڈالر کے مقابلے میں روپے نے اپنی گرتی ہوئی ساکھ کو کسی حد تک بحال کیا ہے۔
اوپن مارکیٹ میں ڈالر ایک سو چھ روپے کی سطح پر فروخت ہو رہا ہے اور گزشتہ دو دونوں میں ڈالر کی قدر میں کوئی رد وبدل نہیں آیا ہے ۔ وزیرخزانہ اسحاق ڈار کے ڈالر کو کیش کرانے کے بیان کے بعد لوگوں نے تیزی سے ڈالر کیش کرانا شروع کردیے ہیں جس کے باعث اب ڈالر کی قدر میں کمی ہوئی ہے۔
روپے کے مقابلے ڈالرچارماہ کی نچلی سطح پر پہنچ گیا ہے۔ دوسری جانب بینکوں کے درمیاں لین دین میں بھی روپے کی قدر میں استحکام ریکارڈ کیا جا رہا ہے۔ انٹر بینک مارکیٹ میں ڈالر ایک سو چھ روپے تیس پیسے میں فروخت ہو رہا ہے۔
بلوچستان میں خالی سیٹس پر بلدیاتی الیکشن کے لئے شیڈول کا اعلان کر دیا گیا ہے۔
الیکشن کمیشن کے مطابق بلوچستان کی خالی بلدیاتی سیٹوں پر انتخابات کے لئے کاغذات نامزدگی ستائیس اور اٹھائیس دسمبر تک جمع کروائے جاسکیں گے، تیس اور اکتیس دسمبر کو کاغذات نامزدگی کی جانچ پڑتال کی جائے گی۔
یکم اور دو جنوری کو امیدوار اعتراضات جمع کرواسکیں گے، تین اور چار جنوری کو اعتراضات نمٹائے جاسکیں گے، امیدوار پانچ جنوری کو کاغذات واپس لے سکیں گے۔
امیدواروں کی حتمی فہرست چھ جنوری کو جاری کی جا ئے گی، انتخابات کے لئے پولنگ انیس جنوری کو ہوگی اور انتخابی نتائج رئیٹنگ آفسران اکیس جنوری کو جاری کریں گے۔
نیب نے این آئی سی ایل کیس میں یوسف رضا گیلانی اور نندی پاور پروجیکٹ کیس میں بابر اعوان کے خلاف تحقیقات جلد مکمل کرنے کا فیصلہ کرلیا، جب کہ چیئرمین نیب کو الزامات ثابت نہ ہونے پرکلین چٹ دے دی گئی۔
قائم مقام چیئرمین نیب سعید احمد سرگانہ کی زیرصدارت اعلی سطح کا اجلاس ہوا، اجلاس میں چیرمین نیب قمر الزمان چوہدری، سابق ڈی جی ایف آئی اے اور ڈائریکٹر ایف آئی اے کے خلاف الزامات ثابت نہ ہونے پر انہیں بری الذمہ قرار دیا گیا۔
نیب ذرائع کے مطابق چیئرمین نیب جلد اپنی ذمہ داریاں سنبھال لیں گے، اجلاس میں اختیارات کا ناجائز استعمال کرنے پر سابق چیرمین پاکستان اسٹیل معین آفتاب شیخ اور ایم ڈی غلام رسول کے خلاف تحقیقات جلد مکمل کرنیکا حکم دیا گیا۔
اس کیس میں تریسٹھ کمپنیوں کو فائدہ دیتے ہوئے قومی خزانے کو ایک ارب تیئس کروڑ روپے کا نقصان پہنچایا گیا تھا، نندی پور اور چیچو کی ملیاں پاور پراجیکٹ میں تاخیری حربوں کے باعث قومی خزانے کو ایک کھرب تیرہ ارب روپے کا نقصان پہنچایا گیا۔
اس پر وزارت خزانہ ،وزارت پانی و بجلی اور وزارت قانون کے افسروں کے خلاف جلد تحقیقات مکمل کرنے کا بھی حکم دیا گیا ہے۔
حضرت داتا گنج بخشؒ کے نو سو سترویں عرس کی تقریبات لاہور میں جاری ہیں، آج عرس کے دوسرے روز مزار شریف پر خصوصی دعا کی گئی۔
عرس کے پہلے روز حضرت داتا گنج بخش ؒ کے مزار پر چادر پوشی وفاقی وزیرخزانہ محمد اسحاق ڈار اور صوبائی وزیر اوقاف و مذہبی امور میاں عطا محمد مانیکا نے کی۔
اس موقع پر مزارپر پھولوں کی چادر بھی چڑھائی گئی اور نامور نعت خواں حضرات نے نعت خوانی بھی کی، اس موقع پر ملک و قوم کی سلامتی اور امت کی فلاح کے لیے خصوصی دعائیں بھی کی گئی۔
عرس کے موقع پر سیکیورٹی کے خاص انتظامات کیے گئے تھے، سترہ سو پولیس اہلکار مزار کے اردگرد تعینات کیے گئے تھے۔
فرانس، جرمنی اور انگلینڈ سمیت مختلف یورپی ممالک میں برف باری کے باعث معمولات زندگی متاثر ہیں، شہریوں سمیت مختلف ممالک سے آئے سیاحوں کو بھی شدید مشکلات کا سامنا کرنا پڑا۔
براعظم یورپ ان دنوں شدید سردی کی لپیٹ میں ہے، برفباری اور خراب موسم کے باعث مختلف ممالک کے درمیان سینکڑوں پروازیں منسوخ ہوگئیں، سڑکوں پر کئی کئی فٹ برف جمع ہے، جسکی وجہ سے ٹریفک کا نظام بھی بری طرح متاثر ہے۔
شدید سردی کے باعث شہریوں سمیت سیر و تفریح پر آئے سیاح بھی شدید مشکلات کا شکار ہیں، برف باری کی شدت کے باعث جرمنی کے ایک اسکول میں سو سے زائد بچے پھنس گئے جنہیں ریسکیو آپریشن کے بعد اسکول سے نکال کر ہیسٹنگ ٹاؤن ہال پہنچا دیا گیا ہے۔
سال کا اختتام ہورہا ہے، دنیا بھر کی اہم شخصیات میں سال دوہزار تیرہ میں کس شخصیت کو سب سے زیادہ انٹرنیٹ پر سرچ کیا گیا۔
سال دوہزارتیرہ میں گلوکار جسٹن بیبر کو سب سے زیادہ انٹرنیٹ پر سرچ کیا گیا، بیبر کی شہرت کا عالم یہ ہے کہ ٹوئیٹر پرسال کے شروع میں نمبر ون رہے، دوسرے نمبر پر سب سے زیادہ سرچ کی جانے والی شخصیت کا اعزاز پوپ سنگر ریحنا کو ملا، جن کو متنازعہ خبروں کی وجہ سے بھی شہرت ملی۔
ہالی ووڈ کی دنیا سے تعلق رکھنے والی سیلیبرٹی کم کرڈیشین نے میدان مار کر تیسری پوزیشن حاصل کی، اس سال کیٹی پیری نے بھی کمال کیا اور مداحوں کی توجہ حاصل کئے رکھی، شہرت اور مقبولیت میں کیٹی کا چوتھا نمبر ہے۔
ان سب کے بعد شکیرا، بیونسے اور لیڈی گاگا ایڈیلی اور میڈونا ٹاپ ٹین موسٹ سرچڈ سیلیبرٹیز میں شامل ہوئیں جبکہ انٹرنیٹ پر پانچویں نمبر پر ہالی ووڈ ایکشن گرل انجلینا جولی مقبول رہیں۔
